د افغانانو یوه ۳۰۰ کسیزه ډله د دوشنبې په ورځ فلیپین ته ورسېده،چې د کډوالۍ د ځانګړو ویزو پروسې په طی کولو سره په امریکا کې د بیا میشتېدنې جوګه شي. دا د مانيلا او واشنګټن ترمنځ د یوه تړون برخه ده.
فلیپین تېر جولای هوکړه وکړه چې په لنډمهالي ډول د امریکا د کډوالۍ ویزو د پړاوونو طی کېدو لپاره افغانانو ته یو محدود مرکز جوړ کړي.
د فلیپین د بهرنیو چارو وزارت ویاندې تیریسیتا دازا اې پي ته وویل،« هغو افغان وګړو ته چې د دوشنبې په ورځ فلیپین ته رسېدلي، د داخلېدو ویزې ورکړل شوې دي». هغې وویل چې دوی له سختو امنیتي څېړنو تېر شوي او فلیپین ته له راتګ مخکې یې بشپړې طبي معاینې کړې وې.
هغې زیاته کړه چې په فلیپین کې د افغان وګړو د استوګنې، خوړو، امنیت، روغتیايي خدماتو او ټرانسپورټ ټول لګښتونه د امریکا حکومت ورکوي.
دازا دا ونه ویل چې څو افغانان ورغلي دي او د ویزو پروسه به څومره وخت ونیسي. د فلیپین د اصولو له مخې، د ویزې غوښتونکي له ۵۹ ورځو زیات په دغه هېواد کې نه شي پاتې کېدای.
تېر کال یوه جګپوړي فلیپیني چارواکي اسوشیېټډ پریس ته وویل چې یوازې ۱۵۰ تر ۳۰۰ پورې غوښتونکي به د دغه تړون له مخې په فلیپین کې منل کېږي.
هغه افغانان چې په امریکا کې د بیا مېشتېدو غوښتنه کوي، په عمده ډول یې د واشنګټن لپاره په افغانستان کې کار کړی و، یا د امریکا د مهاجرت ځانګړو ویزو لپاره وړ بلل شوي وو، خو کله چې امریکایي ځواکونه له افغانستان څخه ووتل ددوی چارې وځنډېدې.
په لومړي ځل په ۲۰۲۲ کال کې دغه غوښتنه د امریکا د بهرنیو چارو وزیر انتوني بلېنکن د فلیپین د بهرنیو چارو وزیر ته وړاندې کړه او ولسمشر جو بایډن تېر کال د فلیپین له مشر فردیناند مارکوس سره د هغه د امریکا د سفر پر مهال پر دې خبرې وکړې.
مارکوس، چې دوه کاله وړاندې په ستر اکثریت د ولسمشر څوکۍ وګټله، له امریکا سره اړیکې بیا تازه کړې دي. د تېر کال فبرورۍ میاشت کې هغه د ۲۰۱۴ کال د دفاعي تړون له مخې د امریکا د پوځي حضور پراختیا ته اجازه ورکړه، چې دې پرېکړې یې د چین نارضایتي وپاروله.
په «جنرال مبین» د مشهور طالب رسنیز فعال د پاسپورټ په کډون ځینې سندونه افغانستان انټرنشنل پښتو ترلاسه کړي دي.
د نوموړي پاسپورټ شمېره هم د دوبۍ چارواکو په مکتوب کې درج شوې شمېرې سره توپیر نه لري.
د اقامې تر ردېدو وروسته بیا جنرال مبین د دوبۍ له دولتي ادارو غوښتنه کړې ده، چې د کار وېزې د غوښتنلیک د رد په اړه دې یوځل بیا کتنه وکړي.
جنرال مبین په خپل دغه مکتوب کې په عربي ژبه لیکلي:« ستاسې درانه حضور ته دا غوښتنه وړاندې کوم، چې زما د کار وېزې د رد پرېکړې ته بیا کتنه وکړي»
د مکتوب په یوه بله برخه کې راغلي:« زه غواړم تاسې ته خبر درکړم چې ما په دې وروستیو کې د وفي وفي د تخنیکي خدمتونو شرکت کې وظیفه ترلاسه کړې ده، دغه د شرکت زما لپاره د وېزې غوښتنه کړې وه خو دغه غوښتنه رد شوې ده.»
جنرال مبین د دوبۍ حکومت ته لیکلي چې تاسې ته څرګنده ده، چې زمونږ هېواد «افغانستان» کې د کار او تجارت وضعیت ډېر خراب دی او د وظیفې او عاید امکانات ډېر کم دي.
جنرال مبین په ټینکار سره ویلي «د دې غوښتنلیک منل به ماته د یوې واحدې عایداتي سرچینې فرصت راکړي څو خپل ځان او کورنۍ ته د عزت او ثبات ژوند برابر کړم.»
په دوبۍ کې یکې د یوه ځايي شرکت مسوولینو افغانستان انټرنشنل ته وویل چې دا ځل هم معلومه نه ده، چې د دوبۍ حکومت به د جنرال مبین د د اقامې او یا هم د کار وېزې غوښتنلیک ومني او کنه.
د طالبانو رسنیز فعال جنرال مبین چې په وروستیو کې دوبۍ ته په سفر دی او په دغه هېواد کې د طالبانو له سفیر سره دلیدنې انځورونه یې هم خپاره کړي و.
تر اوسه نه ده، معلومه چې په کومو دلایلو د دوبۍ حکومت د طالبانو د رسنیز فعال جنرال مبین د اقامې یا هم د کار وېزې غوښتنلیک رد کړی دی.
دجنرال مبین د طالبانو په روانه واکمنۍ کې څو ځلې د دې ډلې د حکومت له لوري ترې تم شوی او د ده د رسنیزو فعالیتونو په اړه یې ورته ګوتڅنډنې کړې چې د دغې ډلې د ارادې خلاف دې رسنیز فعالیت بند کړي.
جنرال مبین وخت ناوخت په ټولنیزو رسینو کې نیوکه کوله چې له خبرو معنه شوی دی او د طالبانو استخباراتو ورته ویلي چې په ټولنیزو رسنیو کې به سیاسي بحثونه او په پاکستاني چارواکو پسې به خبرې نه کوي.
