د خوړو نړیوال پروګرام وایي په روان ژمي کې ملیونونه افغانان بیړنیو مرستو ته اړتیا لري
د ملګرو ملتونو د خوړو نړیوال پروګرام (ډبلیو ایف پي) وایي په روان ساړه ژمي کې د افغانستان ملیونونه وګړي بیړنیو مرستو ته اړتیا لري.
د ملګرو ملتونو د خوړو نړیوال پروګرام (ډبلیو ایف پي) وایي په روان ساړه ژمي کې د افغانستان ملیونونه وګړي بیړنیو مرستو ته اړتیا لري.
په افغانستان کې د خوړو نړیوال پروګرام د سې شنبې په ورځ د (مرغومي ۱۸مه) لیکلي: «ډیر افغانان د ژمي په سړو سیلیو کې هک حیران دي چې لومړی د خپلو ماشومانو تشې ګېډې ډکې کړي که هغوی ته د خونو د تودولو غم وخوري.»
دغه بنسټ په افغانستان کې د لوږې او بیوزلۍ په اړه اندېښنه ښودلې او له مرستندویه بنسټونو یې غوښتي چې د دغو خلکو لاس نیوي ته راودانګي.
څه موده وړاندې هم دغه بنسټ ویلي و چې دوی په افغانستان کې د بیوزلو کسانو سره د مرستې لپاره له ۷۰۰ ملیون ډالرو زیاتو پیسو ته اړتیا لري، دغه بنسټ دا هم ویلي و چې په افغانستان کې پنځه ملیونه خلک په دې نه پوهیږي چې د بل وخت ډوډۍ له کومه کړي.
سره له دې چې په افغانستان کې خلک د لوږې او بېوزلۍ له سخت ناورین سره مخامخ دي، خو طالبان لا هم د هغو فرمانونو او بندیزونو په لګولو بوخت دي چې د نړیوالې ټولنې له خوا پرې نیوکې کیږي.
د طالبانو دغه دریځ نړیوالې بشري مرستې کمې کړې او خلک یې د سختو کړاوونو سره مخامخ کړي دي.
