طالبان: یو ایراني شرکت افغانستان کې د انرژۍ د تولید په پروژو کې پانګونې ته لېوالتیا ښودلې
د طالبانو د اوبو او انرژۍ وزارت خبر ورکړی، چې یو ایراني شرکت په افغانستان کې د انرژۍ د تولید په پروژو کې پانګونې ته لېوالتیا ښودلې ده.
د طالبانو د اوبو او انرژۍ وزارت خبر ورکړی، چې یو ایراني شرکت په افغانستان کې د انرژۍ د تولید په پروژو کې پانګونې ته لېوالتیا ښودلې ده.
دغه وزارت د یوې خبرپاڼې په خپرولو سره ویلي، چې د طالبانو د اوبو او انرژۍ وزیر عبداللطیف منصور د ایراني شرکت «نیروی برق دیبا» له مسوولینو سره لیدلي او په دغې لیدنه کې یې له بېلابېلو سرچینو څخه د انرژۍ د تولید په برخه کې د پانګونې په اړه خبرې کړې دي.
په دغې خبرپاڼه کې د دغه ایراني شرکت مسوولینو په حواله راغلي، چې دوی لېواله دي په افغانستان کې د اوبو، ډبرو سکرو، ګازو او لمریزو سرچینو څخه د انرژۍ د تولید پروژو په برخه کې پانګونه وکړي.
له دې سره سم د طالبانو د اوبو او انرژۍ وزیر هم په دې برخه کې د همکارۍ ډاډ ورکړی.
نوموړي د دغه شرکت له مسوولینو غوښتي، چې د وزارت له تخنیکي ډلې سره د پروژو د ټاکلو او د پانګونې د څرنګوالي په اړه همغږي وکړي.
د خبرپاڼې له مخې، د دواړو خواوو ترمنځ تر همغږۍ وروسته به د همکارۍ هوکړه لیک لاسلیک شي او له هغه وروسته به د چارو د ترسره کولو لپاره یې عملي ګامونه هم واخیستل شي.
افغانستان هغه هېواد دی، چې د برېښنا د تولید لپاره د اوبو، لمر او بادونو پراخې سرچېنې لري؛ خو لا هم دغه هېواد په وارداتي برېښنا متکي دی او په دغو برخو کې نه کار شوی او نه هم خلکو پانګونې ته زړه ښه کړی.
