په اسلام اباد کې د طالبانو تر واک لاندې د افغانستان سفارت وايي، چې د کورمې ولسوالۍ قومي مشرانو او ځوانانو د طالبانو له سفیر سره په لیدنه کې پر ډیورنډ کرښه د تګ راتګ لپاره د نويو لارو د خلاصولو غوښتنه کړې ده.
دغه سفارت پر خپل اېکس لیکلي، چې د سې شنبې په ورځ د کورمې ولسوالۍ د اهل سنت قومي مشرانو، د کورمې د انجمن فاروقي غړو او په اسلام اباد کې د کورمې د ځوانانو شورا یوه ګډ پلاوي په اسلام اباد کې د طالبانو له سرپرست سفیر سره کتلي.
یاد سفارت وايي، چې د کورمې ولسوالۍ دغو اوسیدونکو د ډیورنډ کرښې دواړو غاړو ته د پرتو ولسونو ترمنځ د اړیکو، تګ راتګ لپاره د نویو لارو خلاصون او په کورمه ولسوالۍ کې د فرقه يي شخړو په اړه خبرې کړې دي.
په اسلام اباد کې د طالبانو سفارت وايي، چې سرداراحمد شکیب په دې ناسته کې ټینګار وکړ چې طالبان له ټولو خواوو سره د نیکو اړیکو پلوي کوي او غواړي د کرښې دواړو غاړو ته پراته ولسونه په کامل امن او ثبات کې ګډ ژوند ولري.
د طالبانو سفیر په باور، د ولسونو په مینځ کې د «را ایجاد کړل شویو» ستونزو د دوام پرځای باید مناسبې حل لارې ورته وموندل شي.
په کورمه ولسوالۍ کې څه باندې دوه میاشتې د سني او شیعه مذهبو ترمنځ جګړې وشوې، چې له امله یې له دواړو لوریو لسګونه کسان وژل شوي او د دې ولسوالۍ او پېښور تر منځ د تګ راتګ لارې بندیدو له امله خلک د خوراکي توکو او درملو له سخت کمښت سره مخ شوي.
د کورمې ولسوالۍ قومي مشران په داسې حال کې په اسلام اباد کې د طالبانو له سرپرست سفیر سره پر ډیورنډ کرښه د لارې د خلاصون په تړاو لیدنه کوي، چې له تېرو څو میاشتو راهیسې د افغانستان او پاکستان ترمنځ د خرلاڅي سوداګریزه لاره د هر ډول تګ راتګ پرمخ تړل شوې ده.
د طالبانو د اطلاعاتو او فرهنګ وزارت له خوا د منع شویو کتابونو یو نوملړ خپور شوی، چې په کې لیدل کېږي یادې ډلې د ملنګ جان د کتاب پېر او پلور منع کړی او د هغه کتابونه یې د ملي ګټو خلاف بللي دي.
له دغه وزارت څخه یوې باوري سرچینې له افغانستان انټرنشنل - پښتو سره په خبرو کې دغه نوملړ تایید کړی دی.
د سرچینې په خبره، د منع شویو کتابونو نوملړ تر پخوا اوږد شوی او په وروستیو میاشتو کې بیا په ډېر شمېر نورو کتابونو هم بندیزونه لګېدلي دي.
د راپورونو له مخې، طالبانو په هر ولایت کې په دې اړوند کمېټې جوړې کړي، چې یادې کمېټې د حاکم نظام د خوښې خلاف کتابونه راټولوي او تر ثبت کېدو وروسته یې ممنوع اعلانوي.
سرچینې افغانستان انټرنشنل - پښتو ته دغه راز په خپلو خبرو کې ویلي، چې، په دغه نوملړ کې ډېری د پاکستان ضد کتابونه شامل دي.
پاکستان د ګړنګ پر غاړه، د افغانستان په خونړۍ تراژیدي کې د پاکستان رول، له مسعود وروسته د افغانستان د جګړو ریښې، زما د دښمن ـ دښمن هند، پاکستان محور شرارت، مرګوني غېږ، دوه مخی کرنل امام او یو شمېر نور هغه کتابونه دي، چې د افغانستان د ملي ګټو خلاف یاد شوي دي.
دا په داسې حال کې ده، چې د ملنګ جان کتابونه او شعري ټولګې تر دې وړاندې په پاکستان کې هم منع شوي وو.
د طالبانو دغه اقدام په ټولنیزو رسنیو کې د یو شمېر پخوانیو چارواکو او لیکوالانو غبرګونونه راپارولي دي.
د افغانستان د پخواني نظام د چارو ادارې مشر فضل محمود فضلي د ملنګ جان پر کتابونو د طالبانو بندیز غندي او وایي: «د حاکمې او استبدادي ډلې له خوا په هر ډول کتاب بنديز د غندلو وړ دی او دا له پوهې او عقل سره د دوښمنۍ څرګنده بېلګه ده.»
نوموړي یاد نامتو شاعر ولسي او وطنپال شاعر بللی او زیاته کړې یې ده، چې د نوموړي په کتاب بنديز ښيي، چې طالبانو له وطن او خلکو سره مینه هم ګناه بولي.
د افغانستان د پخواني نظام د چارو ادارې یاد مشر همداراز وویل: «د ملنګ جان “خوږې نغمې” شعري ټولګه په اویایمو او اتیایمو کلونو کې د استعمار د لاسپوڅي پاکستاني پوځ له خوا په کوزه پښتونخوا کې ممنوع شوې وه او اوس هماغه استعمار ته ژمنې، افراطي او استبدادي حاکمې ډلې په افغانستان کې د ملنګ جان په کتاب بندیز لګولی.»
د یادولو ده، چې ملنګ جان په ١٢٩٣ لمريز کال د ننګرهار د بهسودو په چميار کلي کې زېږېدلی و او په ١٣٣٦ لمريز کال د يوې ترافيکي پېښې له امله مړ شو.
د افغانستان د سټراټیژیکو څېړنو د نړۍوال مرکز مشر هاتف مختار هم د طالبانو له خوا د ملنګ جان د کتابونو د بندیزونو په غبرګون ویلي: «دا د ادب او کلتور سره ښکاره دوښمني او شرمونکی عمل دی.»
نوموړي په خپل اېکس کې له طالبانو پوښتنه کړې: «تاسو به وکړای شي چې د ټولو کتابونو د لیکونکو فکر بدل کړی؟»
دا په داسې حال کې ده، چې د طالبانو د اطلاعاتو او کلتور وزارت د لېندۍ په میاشت کې اعلان کړی و، چې له کتاب پلورنځیو یې هغه لسګونه کتابونه ټول کړي، چې «د اسلامي ارزښتونو او د دوی د پاليسۍ خلاف» وو.
د روان کال د لړم مياشتي په دویمه بیا دغه وزارت په کابل کې ۴۰۰ عنوانه کتابونه منع اعلان کړل او په ټول هېواد کې يې د دغو کتابونو د ټولولو کمپاين پیل کړ.
د طالبانو د اطلاعاتو او کلتور وزارت ویاند ویلي و، چې دغه وزارت «د اسلامي ارزښتونو، د اسلامي امارت د پاليسي خلاف» د کتابونو د ټولو لپاره کمېسیون جوړ کړی او په کار يې پيل کړی.
نوموړي ویلي، چې دغه کمېسیون د کمپاين پر مهال لسګونه عنوانه بېلابيل کتابونه ټول کړي دي.
یو شمېر لیکوالانو او هېوادوالو په وار - وار د طالبانو په ورته کړنو نیوکې کړي او ویلي یې دي؛ که څه هم پر افغانستان د طالبانو له واکمنۍ وروسته د کتاب لوستلو دود کمرنګه شوی دی، خو د طالبانو په دغو بندیزونو سره به په هېواد کې د کتاب لوستلو فرهنګ په بشپړه توګه له منځه ولاړ شي.
