د طالبانو ملاتړو د غزې اوربند د حماس بریا وبلله
د اسراییل او حماس ترمنځ د اوربند له اعلان وروسته د طالبانو ملاتړو په ټولنیزو رسنیو کې دا تړون د "حماس مقاومت" د بریا په توګه بللی.
د اسراییل او حماس ترمنځ د اوربند له اعلان وروسته د طالبانو ملاتړو په ټولنیزو رسنیو کې دا تړون د "حماس مقاومت" د بریا په توګه بللی.
دوی په ټولنیزو رسنیو کې لیکلي، چې "حماس د یو نیم کال مقاومت او قربانۍ وروسته ازادي او بریا ترلاسه کړه."
طالبانو تر اوسه په رسمي ډول د اوربند تړون ته غبرګون نه دی ښودلی، خو د دې ډلې ځینو چارواکو او ملاتړو د جګړې په پای ته رسېدو خوښي څرګنده کړې او په غزه کې د پراخې ویجاړۍ سره - سره، دا تړون د غزې خلکو لپاره بریا ګڼلې ده.
د طالبانو د ملي راډیو او ټلویزیون مرستیال هدایت الله هدایت په خپل اېکس کې لیکلي، چې "د فلسطین د خوښۍ سهار پیل شو."
حقاني شبکې ته نږدې کس محمد جلال بیا د حماس د سیاسي مشرانو اسماعیل هنیه او یحیی سینوار یوه ویډیو خپره کړې، چې دواړه د اسراییل له خوا وژل شوي دي او لیکلي یې دي "اسراییلیان سپک شول او غزه بریا ته ورسېده."
هغه له قطر څخه مننه وکړه، چې د دغه اوربند په ټینکولو کې یې مرسته کړې.
د طالبانو پورې تړلې حریت راډیو په یوې مقالې کې لیکلي، چې "د ۱۵ میاشتنۍ جګړې او جرمونو وروسته اسراییلي اشغالګرو ځواکونو بالاخره د حماس جهادي غورځنګ غوښتنو او شرایطو ته تسلیم شول او د اوربند، له غزې څخه د وتلو او د دوی د بندیانو تبادلې ته غاړه کېښوده.»
دغې رسنۍ زیاته کړې، چې اسراییل د حماس د له منځه وړلو او د خپلو یرغملو د ازادولو توان نه لري.
یادې رسنۍ دا هم لیکلي، چې اسراییل اوس د حماس ټول هغه شرایط چې د جګړې په پیل کې رد کړي وو، منلي دي.
په پاکستان کې د طالبانو پخواني سفیر عبدالسلام ضعیف د اوربند د لومړي پړاو مبارکي ویلې ده او هیله یې څرګنده کړې، چې د فلسطین خلک سوله، امنیت او ارامي تر لاسه کړي.
د طالبانو یوه پخواني چارواکي سعید خوستي هم د اوربند په خاطر خوښي څرګنده کړې او دا یې د عزت خبره بللې ده.
د طالبانو یوه ملاتړي د اوربند له اعلان وروسته د فلسطینیانو د لمانځلو انځورونه خپاره کړي او لیکلي یې دي: "غزې د ۴۶۶ ورځو مقاومت وروسته خپله بریا د نړۍ په وړاندې ولمانځله."
تر دې مخکې، د طالبانو د رسنیو فعالانو د اسراییل سره د لبنان د حزب الله د اوربند په اړه چوپ پاتې وو.
په غزه کې د اسراییل او حماس ترمنځ جګړې د ۲۰۲۳ کال د اکټوبر په ۷ مه نېټه د حماس ځواکونو له خوا په اسراییل د مرګوني برید وروسته پیل شوه.
په دې برید کې لږ تر لږه ۱۲۰۰ اسراییلیان ووژل شول او شاوخوا ۲۰۰ یې یرغمل شول.
د دې برید په ځواب کې اسراییل بیا په غزې پراخ عملیات پیل کړل، چې تر اوسه پورې یې له ۴۶۰۰۰ څخه ډېر فلسطینیان وژلي دي.
د حماس سیاسي مشران اسماعیل هنیه او یحیی سنوار هم د اسراییل په بریدونو کې ووژل شول.
