تحریک طالبان پاکستان وايي، چې د بلوچستان له قلات او مکران څخه د شاهد عمر بلوچ په مشرۍ یوه بله وسلهواله ډله ورسره یو ځای شوې ده. په دې وروستیو کې له ټي ټي پي سره د نورو وړو ډلو د یو ځای کېدو لړۍ چټکه شوې ده.
افغانستان انټرنشنل پښتو ته د ټي ټي پي له لوري په لېږل شوې خبرپاڼه کې راغلي چې د بلوچستان له قلات او مکران څخه د شاهد عمر بلوچ په مشرۍ یوه وسله واله ډله ورسره یو ځای شوې او د دغې ډلې مشر د تحریک طالبان پاکستان له مشر ابو منصور عاصم (نور ولي محسود) سره بیعت کړی؛ خو دا یې نه دي ویلي چې د دغې ډلې د وسلهوالو شمېر څومره دی او کله یې له دغې ډلې سره د بیعت خبره کړې ده.
تر دې وړاندې هم ټيټيپي په بلوچستان او وزیرستان کې له دوی سره د ځینو وسلهوالو ډلو د یو ځای کېدو خبره کړې وه.
ټي ټي پي په خپره شوې خبرپاڼه کې ویلي، چې دغې بلوڅې ډلې ژمنه ورسره کړې چې د ټي ټي پي وسلوالو شرعي قوانین او تګلارې به مني.
تحریک طالبان پاکستان تر دې مخکې هم په پاکستان کې د حکومت له ټولو مخالفو ډلو غوښتي، چې له دوی سره یو ځای شي چې په دې توګه په ټول پاکستان کې«اسلامي او شرعي نظام » ټینګ شي.
د پاکستان پوځ او نورو امنیتي ادارو په وړاندې د ټي ټي پي وسله والې ډلې بریدونه په دې وروستیو کې تر پخوا ډیر شوي او دغه بریدونه یوازې په پښتنو قبایلي سیمو کې ترسره کیږي، چې د پاکستان پوځ یې په هغو سیمو کې په وړاندې په عملیاتو کې دغې ډلې د مرګ ژوبلې راپورونه خپروي.
ظاهرآ دواړه لوري یو بل ته د مرګ ژوبلې د اوښتو په اړه دعوې کوي خو پر دوی نیوکې دي چې دغه جګړې تر وړاندې پلان شوې دي او هدف یې په پښتنو سیمو د تاوتریخوالي زیاتېدل او هلته د پوځ راج چلول دي، چې د پښتنو سیمو زېرمې یې تل تر واک لاندې وي.
