د پاکستان د حکومت او تحریک انصاف ګوند ترمنځ د مذاکراتو درېیم پړاو پیل شو
پاکستانۍ رسنۍ جیونیوز راپور ورکړی، چې د حکومت او پاکستان تحريک انصاف د ګوند مذاکراتي ډلو ترمنځ د مذاکراتو درېيم پړاو پیل شو.
پاکستانۍ رسنۍ جیونیوز راپور ورکړی، چې د حکومت او پاکستان تحريک انصاف د ګوند مذاکراتي ډلو ترمنځ د مذاکراتو درېيم پړاو پیل شو.
د دغې رسنۍ د راپور له مخې، د حکومت او پي ټي ای د مذاکراتي ډلو ترمنځ د مذاکراتو درېيم پړاو د سردار اياز صادق په مشرۍ د پاکستان د پارلمان په ودانۍ کې روان دی.
په دغو خبرو اترو کې د حکومت لهخوا عرفان صديقي، رانا ثناءالله، خالد مقبول صديقي او فاروق ستار شامل دي دا رنګه د بلې غاړې په استازولۍ عمر ايوب، اسد قيصر، علي امين ګنډاپور، علامه راجا ناصر عباس او صاحبزاده حامد رضا په دغو مذاکراتو کې برخه لري.
د پي ټي ای د ډلې لهخوا د دغې مذاکراتي ډلې مشر عمر ايوب ليکلي، د دوی وړاندیزونه ناستې ته وړاندې شول، چې د پي ټي ای د غوښتنو په مسوده کې د کميټې شپږو غړو لاسليکونه هم پرې کړي دي.
دغه ګوند غوښتنه کړې، چې د دوی د پلویانو د لاریون پرمهال د لاریونوالو پر وړاندې د زور زياتي پېښو پلټنه دې وشي.
په لیکل شوې وړاندیزونو کې راغلي، چې د مرکزي او پنجاب حکومتونو په ګډون دې د سند او بلوچستان حکومتونه باید د ټولو سياسي بنديانو د ضمانت يا سزا معطلولو په اړه پرېکړه وکړي.
له بل پلوه د افغانستان د سولې په چارو کې د امریکا پخواني ځانګړي استازي زلمي خلیلزاد ویلي، چې د جنورۍ له ۲۰مې نیټې مخکې دې عمران خان له بنده خوشې شي.
هغه خبرداری ورکړی، که حکومت د پاکستان ژغورل غواړي؛ نو عمران خان دې خوشې کړي.
