د طالبانو د کډوالو چارو وزارت: د پاکستان له زندانونو ۱۶ تنه افغان بندیان خوشې شول
د طالبانو د کډوالو او بېرته راستنېدونکو چارو وزارت وایي، چې د پاکستان له زندانونو ۱۶ تنه خوشې شوي افغان بندیان (د مرغومي په ۲۶مه) بېرته هېواد ته راستانه شول.
د طالبانو د کډوالو او بېرته راستنېدونکو چارو وزارت وایي، چې د پاکستان له زندانونو ۱۶ تنه خوشې شوي افغان بندیان (د مرغومي په ۲۶مه) بېرته هېواد ته راستانه شول.
دغه وزارت په یوې خپرې شوې خبرپاڼه کې په ننګرهار ولایت کې د طالبانو د تورخم سرحدي امریت د مالوماتو پربنسټ دغه کسان د قانوني اسنادو د نه لرلو په تور د پاکستان له بېلابېلو سیمو نیول شوي وو.
د خبرپاڼې له مخې، دغه کسان له دوه تر شپږو ورځو پورې بندیان وو او تر خوشې کېدو وروسته هېواد ته راستانه شول.
خبرپاڼه زیاتوي، چې دغه کسان تر راستنېدو وروسته د مرستو ترلاسه کولو په موخه نړۍوالو بنسټونو ته وروپېژندل شول.
که څه هم طالبانو د دغو راخوشې شویو کسانو په منځ کې د ماشومانو په اړه څه نه دي ویلي؛ خو د دغه وزارت لهخوا د دغو راستنو شویو بندیانو په خپور شوي تصویر کې یو ماشوم هم ښکاري.
له دې سره د طالبانو د کډوالو چارو وزارت په تېرې یوه اونۍ کې له پاکستانه د شاوخوا ۹۶ تنو هغو افغان بندیانو د راستنېدو خبر هم ورکړی، چې د قانوني استادو د نه لرلو په تور نیول شوي وو.
تېره ورځ هم دغه وزارت خبر ورکړی و، چې د پاکستان له زندانونو ۱۴ تازه خوشې شوي افغان بندیان (د مرغومي په ۲۵مه نېټه) بېرته خپل هېواد ته راستانه شول.
له تېرو دوو اونیو راهیسې پاکستاني پولیسو په اسلام اباد او راولپنډۍ کې د یو لړ عملیاتو په ترڅ کې د ښځو او ماشومانو په ګډون تر زرو ډېر افغان کډوال نیولي دي.
د اسلام اباد او راولپنډۍ په هره برخه کې هره ورځ افغان کډوال د پولیسو له ځورونې سره مخامخېږي.
له بل پلوه تېره ورځ په اسلام اباد کې د طالبانو سفارت ویلي و، د پولیسو له لوري افغانانو ته ویل شوي چې د جنورۍ له ۱۵مې نیټې وروسته دې ټول بې اسناده او اسناد لرونکي افغانان له اسلام اباد او راولپنډۍ څخه ووځي.
