د ملګرو ملتونو د ماشومانو د ملاتړ صندوق یونېسف وايي، چې د سعودي پاچا ملک سلمان د بشري مرستو مرکز په همکارۍ یې د افغانستان په ۱۲ ولایتونو کې ۱۳ روغتونونو ته د واکسین ساتلو په موخه بریښنا چمتو کړې ده.
د یونېسف د افغانستان څانګې تېره ورځ پنجشنبه د (مرغومي ۲۷مه) د یوې خبرپاڼې په خپرولو سره ویلي، چې د ملک سلمان د بشري مرستو مرکز په همکارۍ یې د افغانستان د هغو ۱۲ ولایتونو په روغتونونو کې د جنراتوري برېښنا اسانتیا رامنځته کړې چې هلته د برېښنا ستونزه ډیره وه.یونیسف وايي، دغه جنراتورونه یې د سمنګان، پکتیا، بادغیس، غور، ننګرهار، سرپل، فاریاب، هرات، کونړ، روزګان، تخار او فراه ولایتونو په روغتونونو کې لګولي او فعاله کړي دي.د ملګرو ملتونو د ماشومانو د ملاتړ صندوق وايي، چې دغه بریښنا یې په روغتونونو کې د پولیو او شري واکسین ساتلو په موخه چمتو کړې، چې واکسین خپل اغېز له لاسه ورنه کړي او په سم ډول وساتل شي.دغه سازمان وايي، چې د دې تر څنګ به دغه بریښنا د روغتونونو ورځنيو عملیات خونو ته هم بریښنا ورکوي چې په کې جراحي او د نويو زیږیدلو ماشومانو ساتنه او پالنه هم شامله ده.په دې خبرپاڼه کې د ملک سلمان د مرکز د روغتیا او چاپیریالي مرستو د څانګې مشر ډاکټر عبدالله صالح المعلم له قوله لیکل شوي: «د واکسین خدمتونه او د واکسین کمپاینونه یوازې له اغېزمن سوړ زنځیري سیسټم سره ممکن دي، چې بریښنا یې تر ټولو ډیره مهمه ده. له دې مرستې سره، موږ د مخنیوي وړ ناروغیو څخه د ماشومانو د ساتنې فرصت لرو.»دغه راز یونېسف وايي، چې د پاچا سلمان د بشري مرستو مرکز پخوا هم د یونیسف په هڅو په افغانستان کې د ماشومانو لپاره د اوبو، روغتیا ساتنې او همدارنګه د تغذیې خدمتونو په برخو کې له افغان ماشومانو ملاتړ کړی.د سعودي پاچا ملک سلمان د بشري مرستو مرکز د روان لمریز کال په لیندۍ میاشت کې په افغانستان کې د پولیو پر ضد د مبارزې لپاره د درې میلیونه ډالرو مرستې ژمنه کړې وه.پاکستان او افغانستان د نړۍ هغه دوه هیوادونه دي چې د ګوزڼ ناروغۍ له امله ماشومان په دایمي معولیت اخته کیږي.
