د امریکا سترې محکمې په دغه هېواد کې پر ټیکټاک د بندیز قانون تایید کړ
د امریکا سترې محکمې د جمعې په ورځ هغه قانون تایید کړ چې د دغه هېواد ملي امنیت ته د ورپېښو امنیتي ننګوونو پر بنسټ د خواله رسنیو له ډلې د چین پر ټیکټاک اپلیکیشن یې بندیز ولګاوه.
د امریکا سترې محکمې د جمعې په ورځ هغه قانون تایید کړ چې د دغه هېواد ملي امنیت ته د ورپېښو امنیتي ننګوونو پر بنسټ د خواله رسنیو له ډلې د چین پر ټیکټاک اپلیکیشن یې بندیز ولګاوه.
دا پرېکړه په داسې حال کې شوې چې د قانون له مخې د ټیکټاک ملکیت لرونکی شرکت بایت ډنس اړ دی چې د یکشنبې تر ورځې پورې دا اپلیکیشن وپلوري، کنه په امریکا کې به یې فعالیتونه په بشپړ ډول بند کړای شي.
د امریکا د سترې محکمې قاضیانو په یو غږ دې قانون ته د اساسي قانون له مخې د مشروعیت ضمانت ورکړ. د دې پرېکړې ملاتړ هغه مهال زیات شو چې د کانګرس غړو، په ځانګړي ډول د ملي امنیت پلویانو، ټینګارکاوه چې د ټیکټاک له خوا د کاروونکو د معلوماتو راټولول او د چین سره د دې شرکت اړیکې د ملي امنیت لپاره جدي خطر جوړوي.
د ټیکټاک پر ضد د قانون تصویب شالید
دغه قانون تېر کال په کانګرس یا د استازو په جرګه کې د پراخ اکثریت په ملاتړ تصویب او ولسمشر جو بایډن لاسلیک کړ. د دغه قانون په دفاع کې ویل شوي چې ټیکټاک د شخصي معلوماتو راټولولو او د احتمالي جاسوسۍ له امله په متحده ایالاتو کې ملي امنیت ته ګواښ پېښوي. د دغو اندېښنو په پایله کې کانګرس غوښتنه وکړه چې دا اپلیکیشن باید یا د امریکایي مالکیت لاندې راشي یا په بشپړ ډول بند شي.
د سپینې ماڼۍ غبرګون
د دغې پرېکړې په اړه د سپینې ماڼۍ له خوا ویل شوي چې ولسمشر جو بایډن د ټاکل شوي مهلت د اوږدولو لپاره هېڅ اقدام نه کوي. د سپینې ماڼۍ ویاندې کارین ژان-پی یر په یوې مرکه کې ټینګار کړی چې بایډن په دې باور دی چې ټیکټاک باید د امریکایانو لپاره د لاسرسي وړپاتې شي؛ خو یوازې د داسې مالکیت لاندې چې ملي امنیت ته کومه اندېښنه پېښه نه کړي.
بل لوري د نوي منختب ولسمشر ډونالډ ټرمپ ته د واک لېږد لپاره چارې هم روانې دي او تمه کېږي چې د دې قانون عملي کول به د راتلونکې ادارې پر غاړه واچول شي. ټرمپ تازه ویلي چې د سترې محکمې پرېکړه د تمې وړ وه او د هغه اداره به د ټیکټاکپه اړه خپله راتلونکې پرېکړه ژر اعلان کړي.
د ټیکټاک او شریکانو راتلونکې
د ټیکټاک مشرتابه هم تایید کړې چې که د قانون له مخې د دوی د فعالیتونو بندیز عملي شي، دوی به د امریکا دننه خپل خدمتونه ودروي. دا بندیز به یوازې د ټیکټاک پر فعالیت اغېز ونه کړي، بلکې هغه شرکتونه به هم قانوني ستونزو سره مخ کړي چې دې اپلیکیشن ته تخنیکي او تخلیقي خدمات وړاندې کوي.
تمه ده چې د ایپل او ګوګل په څېر شرکتونه چې د ټیکټاک اپلیکیشن د خپلو پلورنځیو له لارې وړاندې کوي، د دې قانون عملي کېدو په صورت کې د خپلې همکارۍ په اړه نوې پرېکړې وکړي.
ټیکټاک په وروستیو کلونو کې د نړۍ په ډېرو هېوادونو کې د څارنې او بندیزونو سره مخ دی. د هند او پاکستان په څېر هېوادونو کې لا له وړاندې پرې محدودیتونه لګول شوي دي او په اروپایي هېوادونو کې هم د دې د معلوماتي پالیسۍ په اړه اندېښنې راپورته شوي دي. د امریکاپرېکړه به په نړیواله کچه د نورو هېوادونو لپاره د دې اپلیکیشن په اړه د ورته اقداماتو لپاره لار پرانیزي.
په ټوله کې، په امریکا کې د ټیکټاک راتلونکې مبهم دی. د دې پرېکړې عملي کېدل به یوازې پر دې اپلیکیشن اغېز ونه کړي، بلکې د کاروونکو، تجارتي شریکانو او د ټیکټاک له لارې د منځپانګې جوړوونکولپاره به هم مهمې پایلې ولري.
