د سوریې د بهرنیو چارو وزیر وايي چې عرب لیګ ته د ور تللو په لټه کې دی
د سوریې د بهرنیو چارو وزیر د سې شنبه په ورځ وویل، چې دی او د سوریې نوي واکمنان په دې لټه کې دي، چې په سیمه ییز سیاسي ډګر کې د عربي ټولنې غړي شي.
د سوریې د بهرنیو چارو وزیر د سې شنبه په ورځ وویل، چې دی او د سوریې نوي واکمنان په دې لټه کې دي، چې په سیمه ییز سیاسي ډګر کې د عربي ټولنې غړي شي.
اسد حسن الشیباني دا څرګندونې په دمشق کې د عربي لیګ د عمومي منشي له مرستیال حسام ذکي سره په ګډه خبري غونډه کې کړي دي.
نوموړي وویل، چې عرب لیګ د سوریې د ګډون د فعالولو لپاره د غړو هېوادونو سره ګډ کار کوي.
تر دې څو ورځې وړاندې د منځني ختیځ د هېوادونو د بهرنیو چارو وزیران او یو شمېر لوړپوړي لوېدیځ ډيپلوماټان د سعودي په پلازمېنه ریاض کې ټول شوي وو، چې د سوریې پر راتلونکي خبرې وکړي.
په دغه غونډه کې د سعودي د بهرنیو چارو وزیر فیصل بن فرحان له نړۍوالې ټولنې غوښتنه وکړه، چې پر سوریې لګول شوي بندیزونه دې د سوریې چټکې بیارغونې په موخه لرې کړل شي.
د عرب ليګ غړو هېوادونو په ۲۰۱۱ کې له لاریون والو سره د تاوتريخوالي په غبرګون کې د سوريې غړيتوب ځنډولی وو، خو له ١٢ کلونو وروسته د بشار الاسد حکومت ته یو ځل بیا په مشروط ډول په دغه ټولنه کې د ګډون اجازه ورکړل شوه.
د نوي اساسي قانون د طرحې او په سوریه کې د ازادو انتخاباتو د ترسره کولو لپاره له مخالفو وسله والو سره د خبرو بیا پیلول د عربي هېوادونو ترمنځ د دمشق د بیا منلو له شرطونو څخه بلل کېږي.
اوس چې په سوریه کې د بشار الاسد واکمني پای ته رسېدلې او نوی حکومت رامنځته شوی، هڅې یې پېل کړي چې سوریه یو ځل بیا د عرب لیګ برخه شي.
