د طالبانو د بهرنیو چارو وزارت د ( سلواغې دوېیمه) نېټه په یوې خبرپاڼه کې خبر ورکړی چې د امریکایي ځواکونو سره د زندانیانو اړوند د خبرو اترو په پایله کې یو افغان زنداني له بنده خوشې شوی دی.
په خبرپاڼه کې راغلي چې دغه افغان بندي «خان محمد» نومېږي او د امریکایي وګړو سره د تبادلې په پایله کې خوشې شوی دی. د طالبانو د بهرنیو جارو وزارت د معلوماتو په پر بنسټ یاد بندي دوه لسیزې وړاندې امریکایي ځواکونو په ننګرهار کې نیولی و او د امریکا د کلفورنیا ایالت په یوه زندان کې ساتل کیدو.
په خبرپاڼه کې دغه را خوشې شوي زنداني ته د «مجاهد» کلیمه کارول شوې ده.
هغه ته د امریکا یوې محکمې د عمر بند سزا اورولې وه او د خوشې کیدو په تړاو یې په دوحه کې د امریکایانو او طالبانو ترمنځ خبرې اترې هم شوې وې.
د طالبانو د بهرنیو چارو وزارت په خپرې شوې خبرپاڼه کې د خبرو اترو له لارې د دغه افغان زنداني خوشې کیدل ګټور ګام بولي او د مسئلو د حل په تړاو پر مذاکراتو ټینګار کوي. طالبانو همدا راز له قطره هم مننه کړې چې په دې تړاو یې ورسره لازمه همکاري کړې ده.
په خبرپاڼه کې د امریکایي وګړو د تبادلې په تړاو جزییات نه دي ورکړل شوي چې د څو تنو یا کومو امریکایي وګړو په بدل کې دغه افغان زنداني خوشې شوی دی.
د طالبانو بهرنیو چارو وزارت په خبرپاڼه کې ټینګار کړی چې دوی د متحده ایالاتو دغه اقداماتو ته په مثبت نظر ګوري او هیله څرګندوي چې د دواړو هېوادونو د اړیکو په عادي کیدو او پراختیا کې به ځانګړې ونډه ولري.
۵۴ کلن خان محمد د ۲۰۰۶ زېږدیز کال د اکټوبر میاشتې په ۲۹مه نېټه د امریکایي ځواکونو له لوري په ننګرهار کې نیول شوی و او په ۲۰۰۷ کال کې امریکا ته ولېږدول شو. هغه د نشه یي توکو په ځانګړي ډول د اپینو او هېروینو په قاچاق کې ښکېل بلل شوی او همدا راز پرې د ترهګریزو فعالتیونو تور هم پورې و. د محکمې په یوې دوسیه کې راغلي چې دغه کس تر نیول کیدو دمخه هڅه کوله چې امریکا ته نشه یې توکي ولېږدوي.
د امریکا د کلفورنیا ایالت د کولمبیا ډسټرکټ محکمې د معلوماتو له مخې خان محمد هڅه کوله چې په راکټی بریدونو کې امریکايي سرتېري ووژني او پر جلال اباد هوايي ډګر یې د یوه برید تابیا هم کړې وه.
ځو ورځې وړاندې د امریکا پخواني ولسمشر جوبایډن د درې تنو هغو امریکایي وګړو چې له طالبانو سره بندیان دې خبرې وکړې او ډاډ یې ورکړ چې د کورنیو د غړو خوشې کیدو لپاره یې هڅې کوي؛ خو لا هم د هغو بندیانو د برخلیک په تړاو معلومات نه شته.
په دغو بندیانو کې یو هم یو افغاني الاصله امریکايي محمود شاه حبیبي هم دی چې طالبانو یې له بندي کېدو څخه انکار کړی، خو کورنۍ یې ادعا لري چې له همدوی سره دی.
دا په داسې حال کې ده چې پرون دوشنبه د امریکا نوي ولسمشر ډونالډ ټرمپ د لوړې مراسم ترسره کړل او اټکل کېږي چې د افغانستان په تړاو به تازه تګلارې هم رامنځته کړي.
د صالح په وینا؛ د طالبانو د استخباراتو ریاست مشرانو په خپلو کې تر یوې غونډې وروسته پرېکړه کړې چې ژر تر ژره باید د ښځینه جاسوسانو په شمېر کې زیاتوالی راشي او په دې برخه کې نوې ښځینه جاسوسانې هم پر دندو وګومارل شي.
هغه اټکل کړی چې ښايي طالبان د بې وزله ښځو له غریبۍ ګټه پورته کړي او د خپلې ډلې لپاره یې د جاسوسو په توګه وکاروي.
د جمهوي نظام د دغه پخواني مرستیال په مشرۍ د زرغون بهیر له لوري د طالبانو د استخباراتو ریاست اړوند یو مکتوب هم خپور شوی چې په کې اړونده ادارو ته د نویو ښځینه جاسوسانو د موندلو او ګومارلو امر شوی دی.
د طالبانو په یاد مکتوب کې د طالبانو د استخباراتو مرکزي، ولایتي او اوپراتیفي برخو ته سپارښتنه شوې چې په بېلابېلو برخو کې د ښځینه سرچینو د ګومارنې کچه لوړه کړي.
په مکتوب کې راغلي چې د دوی ښځینه جاسوسانو ښه پایله ورکړې او له همدې امله باید دغه شمېر ډېر شي.
زرغون بهیر ادعا کړې چې دغه مکتوب د (مرغومې ۲۸مه) نېټه د طالبانو د استخباراتو ریاست د لوړ پوړ غړو تر یوې ګډې غونډې وروسته صادر شوی او د طالبانو ولایتي ریاستونو ته هم استول شوی دی.
د طالبانو په لیکو کې د ښځینه غړو د جذب خبره نوې نه ده بلکې له دې پخوا د نسکور شوي جمهوري نظام پر مهال هم طالبانو له ورته تکتیکونو کار اخیستی او حتی دغه ډلې ځنې ښځینه د ځانمرګو بریدګرو په توګه هم کارولي دي.
د دې تر څنګ د طالبانو تر واکمنۍ د مخه له جمهوري نظام سره د جګړو پر مهال د دغه ډلې نارینه غړو هم له یوې سیمې څخه بلې ته د تګ راتګ او تېښتو پر مهال د ښځو جامې اغوستې. د طالبانو باور دا و چې د ښځو جامو په اغوستو سره په کولتوري لحاظ دوی خوندي دي او دا یې د خپل امنیت لپاره ښه لاره ګڼله.
د راپورونو له مخې د پخواني جمهوري نظام د ملي امنیت پر پخواني رئیس اسدالله خالد هم د طالبانو د ډلې یوې ښځینه ځانمرګی برید کړی و چې په پایله کې یې هغه سخت ټپي شوی و.
د معلوماتو پر بنسټ د طالبانو له لوري ټاکل کیدونکي ښځینه جاسوسانو ته د دغه ډلې مخالف کسان په ګوته کېږي او بیا ترې د بېلابېلو لارو څخه معلومات راټولوي.
طالبان په داسې حال کې د ښځینه جاسوسانو د شمېر د ډېروالي په تړاو اقدام کوي چې دغې ډلې په ټول هېواد کې د ښځو پر کار او د نجونو پر زده کړ سخت بندیزونه لګولي دي.
کارپوهان د طالبانو له لوري دغه ډول چلند دوه مخي توب بولي او له ښځینه وو څخه د استخباراتي وسیلو په توګه کار اخیستل یې غندي.
