راپورونه وایي چې د بندیانو د خوشې کولو لپاره د عراق، حزب الله او اسراییل ترمنځ روانې خبرې اترې چې په لبنان کې د اوربند د مودې د غځولو د یوې برخې په توګه اعلان شوي، ښایي په عراق کې د ایران پلوه ملیشو په ګډون د الیزابیت د خوشې کېدو لامل شي.
الیزابیت تورکوف په پرنسټن پوهنتون کې د اسراییل د دوکتورا محصله وه، چې نږدې دوه کاله وړاندې په عراق کې د ایران پلوه ملیشو له خوا تښتول شوې ده.
په عراق او لبنان کې سرچینو رسنیو ته ویلي، چې د حزب الله له خوا د بندیانو د نومونو نوملړ لبناني چارواکو ته استول شوی، چې د دوی د خوشې کولو لپاره د خبرو اترو پروسه پیل کړي.
د دوی په منځ کې عماد امحاز د لبنان د سوداګریزې بېړۍ کپتان دی، چې د ۲۰۲۴ کال د نومبر په لومړیو کې په بطرون کې د اسراییلي کمانډو له خوا په ډراماټیک ډول وتښتول شو.
د شپږو نورو کسانو نومونه هم په نوملړ کې ښکاري، چې ټول په سوېلي لبنان کې تښتول شوي.
خو حزب الله ته نږدې یوې سرچینې ویلي، چې د اسراییلو له خوا د نیول شویو کسانو کره شمېره معلومه نه ده، ځکه د لبنان په سوېل کې تر خاورو لاندې ډېر کسان لادرکه دي.
په بغداد او بېروت کې باخبرو سرچینو د نوم د نه ښودلو په شرط امواج میډیا ته ویلي، چې د عراقي بندیانو د تبادلې وړاندیز کېدای شي اسراییل د حزب الله نیول شوي جنګیالي او کپټان امحاز د څېړونکې الیزابیت تورکوف په بدل کې خوشې کړي، چې دوه ګونی اسراییلي- روسی تابعیت لري.
یوې لوړپوړې عراقي سرچینې چې شیعه وسله والو ډلو ته نږدې دی، څرګنده کړه: "د څېړونکې تښتوونکو د تبادلې په برخه کې خپل لېوالتیا ښودلې ده،" خو اسراییلو ظاهراً تر اوسه کومه ژمنه نه ده کړې.
