د هغو اسنادو له مخې چې د انټرنېټي هېکرانو یوې ډلې د طالبانو د معلوماتي بانک څخه افشا کړي، پکې په ډاګه شوې چې د دغې ډلې کرنې وزارت د عشر او زکات راټولولو لپاره یو خپلواک ریاست جوړ کړی دی. خپاره شوي اسناد ښيي چې دغه ریاست ۱۲۰۰ کارکوونکي لري.
د طالبانو د کرنې وزارت د ۱۴۰۲ کال (د زمري په ۸مه نېټه) د دغې ډلې رییسالوزرا ته یو رسمي لیک استولی چې پکې ویل شوي، چې د عشر او زکات ټولولو مسوولیت د کرنې وزارت ته سپارل شوی دی.
په دغه لیک کې د طالبانو د کرنې وزارت سرپرست عطاءالله عمري لیکلي:« د عشر او زکات ټولولو بهیر پخوا بېنظمه و؛ خو د اسلامي امارت د رهبرۍ د هدایت د تطبیق او د چارو د لا ښه انسجام لپاره موږ د ۱۴۰۲ مالي کال په تشکیل کې د عشر او زکات عمومي ریاست شامل کړی دی.»
هغه له رییسالوزرا غوښتنه کړې، چې د طالبانو مسوولینو ته هم په مرکز او هم په ولایتونو کې لارښوونه وکړي چې د عشر او زکات راټولولو په برخه کې دې له دغه وزارت سره همکاري وکړي.
طالبانو واک ته له رسېدو وروسته نه یوازې له خلکو څخه درنې مالیې راټولې کړې؛ بلکې د عشر او زکات راټولولو ته یې هم ځانګړې پاملرنه کړې.
دغه ډله د خلکو له زراعتي حاصلاتو او مالدارۍ عشر او زکات اخلي.
دغې ډلې تر خپلې بشپړې واکمنۍ مخکې هم د هېواد په بېلابېلو ولایتونو کې د جمهوري نظام پر مهال له بزګرانو څخه د عشر او زکات په نوم باجونه ټولول.
نیوکې دا دي، چې د طالبانو دغه کارکوونکي له بزګرانو له خپلې کچې ډېر عشر غواړي چې عام بزګران یې له ګڼو ستونزو سره مخ کړي دي.
په بېلابېلو ولایتونو کې شتمنو کسانو هم شکایتونه کړي، چې دوی چمتو نه دي چې طالبانو ته زکات ورکړي او دوی غواړي چې خپله په ټولنه کې اړمنو کسانو ته زکاتونه ووېشي؛ خو طالبانو یې مخه نیولې ده.
