د لوهانسک د عملیاتي تکتیکي ډلې ویاند ډیمیټرو زاپوروزیتس د فېبرورۍ په ۱۰ مه وویل، چې روسي ځواکونه د دونیتسک اوبلاست په چاسیو یار کې د تازه بریدونو لپاره پر پوځیانو تمرکز کوي.
د اوکرایین په ختیځ کې چاسیو یار په دونیتسک اوبلاست کې د روسیې د برید یو له مرکزي نقطو څخه و.
دغه ښارګوټی چې له کرماتورک څخه ۲۵ کیلومتره لرې موقعیت لري، د ۲۰۲۴ کال په جولای کې له ختیځ کانال سیمې څخه د اوکرایني ځواکونو له وتلو وروسته یو څه برخه د روسیې تر کنټرول لاندې ده.
زاپوروزیتس په ملي ټلویزیون کې وویل: «اوس د چاسیو یار په لاره کې د (روسي ځواکونو) د راټولېدو او تمرکز دوره ده او په ښار کې د نورو بریدونو لپاره بیا تنظیم شوي دي.»
ویاند زیاته کړه، چې په تېره اونۍ کې روسي ځواکونو د زغره لرونکو موټرو له کارولو ډډه کړې او د لوژیستیکي ملاتړ لپاره په کواډ موټرسایکلونو او بګیو تکیه کوي.
د جنورۍ په ۲۹ مسکو ټایمز د پنځو اوکرایني او اروپايي پوځي او حکومتي سرچینو په حواله راپور ورکړ، چې چاسیو یار د روسیې ځواکونو ته تسلیم شوی دی.
خو نه اوکراین او نه هم روسیې په رسمي توګه دا ادعا تایید کړې ده.
د اوکراین د پوځي چارواکو، شنونکو او ان د روسیې د پوځي بلاګرانو نظرونه په ډاګه کوي، چې په ښار کې سخته جګړه روانه ده.
د چاسیو یار جګړه له میاشتو راهیسې روانه ده، چې د اوکراین ځواکونو له سړکه تر کوڅې د سختې جګړې له لارې د روسیې پرمختګ ورو کړی.
د روسیې د فشار سره - سره، د اوکراین مدافعین مقاومت کوي، ترڅو د چټک پرمختګ مخه ونیسي.
