د طالبانو له لوري د «بېګم» راډیو د نشراتو بندولو ته د غبرګونونو په دوام، د ملګرو ملتونو ښوونیز، علمي او کلتوري بنسټ یا یونسکو وايي، چې د دغې ډلې له لوري د یادې رسنۍ د نشراتو بندول، په حقیقت کې د ښځو د غږ د خاموشه کولو په معنا دی.
یونسکو د سېشنبه په ورځ (د سلواغې ۲۳مه) د خپلې اېکسپاڼې له لارې په یوه بیان کې د «بېګم» راډیو د نشراتو بندېدو په تړاو خواشینې ښودلې او زیاتوي، چې د دغې راډیو په تړلو سره د ښوونیزو خپرونو فرصتونه له منځه تللي دي.
د ملګرو ملتونو د ښوونیز، علمي او کلتوري بنسټ په وینا، «بېګم» راډیو په افغانستان کې د ښځینهوو یوازینۍ اختصاصي رسنۍ وه چې دا هم د طالبانو له لوري وتړل شوه.
دا په داسې حال کې ده، چې څو ورځې وړاندې د بېپولې خبریالانو سازمان ویلي و چې په افغانستان کې د طالبانو له لوري د څه کم یو کال په موده کې د لږترلږه ۱۲ رسنیو تړل کېدل، په دغه هېواد کې د رسنیو پر وړاندې د یادې ډلې د بریدونو زیاتوالی په ګوته کوي.
دغهراز، نوموړي سازمان له طالبانو غوښتي وو چې د «بېګم» راډیو کارکوونکي سملاسي خوشې کړي او د رسنیو پر وړاندې روان بندیزونه پای ته ورسوي.
د یادونې ده، چې د تېرې اوونۍ د سېشنبې په ورځ د طالبانو د اطلاعاتو او کلتور وزارت د یوې پرېکړې له مخې، د «بېګم» راډیو خپرونې بندې کړې.
یاد وزارت «بېګم» راډیو له نشراتي پالیسۍ څخه د سرغړونې تر څنګ له یوې بهر مېشتي ټلوېزیوني شبکې سره پر همکارۍ تورنه کړې ده.
په داعش ډلې پورې اړوند اعماق خبري اژانس خبر ورکړی، چې د یادې ډلې یوه جنګیالي نن سهار هغه وخت خپلو چاودېدونکو توکو ته چاودنه ورکړه، چې د طالبانو لسګونه غړي یاد بانک ته د خپلو تنخواوو د ترلاسه کولو په موخه تللي و.
که څه هم په دغه راپور کې د مرګژوبلې د کره شمېرې په اړه څه نه دي ویل شوي، خو په کې راغلي چې په دې پېښه کې د طالبانو د امنیتي قومندانانو په ګډون سلګونو کسانو ته مرګژوبله اوښتې ده.
اخوا په کندوز کې د طالبانو د امنیه قومندانۍ ویاند بیا نن وویل، چې په دغه برید کې لږ تر لږه پنځه نظامي او ملکي وګړي وژل شوي او اووه نور ټپيان دي، خو ځايي سرچینو افغانستان انټرنشنل ته وویل، چې د کندوز ولایت په ننني ځانمرګي برید کې لږ تر لږه ۱۸ کسان وژل شوي او ۱۴ نور ټپيان دي.
ویل کېږي، چې په دې پېښه کې د طالبانو سرتېرو او ملکي کسانو ته مرګ ژوبله اوښتې.
دغه برید داسې مهال کېږي، چې له دې وړاندې د طالبانو دفاع وزارت او استخباراتو ولایتي چارواکو او د اردو قوماندانانو ته سپارښتنه کړې وه، چې تنخواوې د بانک پرځای په خپلو قرارګاوو کې واخلي.
د یادولو ده، چې دغه برید د طالبانو ترڅنګ د پخوانیو چارواکو حامد کرزي، عبدالله عبدالله، عبدالهادي مسلمیار او یو شمېر نورو کسانو له خوا غندل شوی دی.
سرچینو د سېشنبه په ورځ (د سلواغې ۲۳مه) زیاته کړې، چې طالبانو دا څاروي د ننګرهار په نهو ولسوالیو کې له شپنو او ولسي خلکو څخه اخېستي دي.
سرچینو د هغو ولسوالیو چې طالبانو پهکې له یو شمېر ولسي خلکو او شپنو څخه د عُشر او زکات په نوم څاروي اخیستي، نومونه نه دي ښودلي.
د سرچینو په وینا، طالبانو له خلکو نږدې ۴۰۰ څاروي راټول کړي او په خبره یې هغو کسانو چې نه یې غوښتل دغې ډلې ته څاروي ورکړي، د زنداني کېدو ګواښ ورته شوی دی.
ورته مهال، د طالبانو د کرنې او اوبو لګولو وزارت په خپله اېکسپاڼه منلې، چې د ننګرهار د کرنې او اوبو لګونې ریاست د عُشر او زکات ډلې د دغه ولایت په نهو ولسوالیو کې له خلکو ۳۹۲څاروي را ټول کړي دي.
دغه وزارت ادعا کړې، چې دا څاروي د یوې داوطلبۍ له لارې پلورل شوي او له درکه یې ۲ مېلیونه ۵۸ زره او ۳۱۰ افغانۍ ترلاسه کړي دي.
طالبان وايي، چې دا لړۍ لا هم روانه ده او د ننګرهار نورو ولسوالیو ته به هم وغځېږي.
د هغو سندونو له مخې چې د انټرنېټي هېکرانو یوې ډلې د طالبانو د معلوماتي بانک څخه افشا کړي، په کې په ډاګه شوې چې د دغې ډلې د کرنې وزارت د عشر او زکات راټولولو لپاره یو خپلواک ریاست جوړ کړی دی.
خپاره شوي اسناد ښيي، چې دغه ریاست ۱۲۰۰ کارکوونکي لري.
پر افغانستان د طالبانو له بیا واکمنېدو وروسته دغې ډلې له خلکو څخه د درنې مالیې ترڅنګ د عُشر او زکات راټولولو ته هم ځانګړې پاملرنه کړې.
طالبان د خلکو له زراعتي حاصلاتو او مالدارۍ په پراخه توګه عُشر او زکات اخلي.
دغې ډلې تر خپلې بشپړې واکمنۍ مخکې هم د هېواد په بېلابېلو ولایتونو کې د جمهوري نظام پر مهال له بزګرانو څخه د عُشر او زکات په نوم باجونه ټولول.
له دې سره، په بېلابېلو ولایتونو کې شتمنو کسانو هم شکایتونه کړي، چې دوی چمتو نه دي چې طالبانو ته زکات ورکړي او دوی غواړي چې خپله په ټولنه کې اړمنو کسانو ته زکاتونه ووېشي؛ خو طالبانو یې مخه نیولې ده.
