د افغانستان لپاره د پاکستان ځانګړی استازی وایي، د دوحې پروسې د نشه یې توکو په وړاندې د مبارزې کاري ډلې په غونډه کې یې له افغانستان سره د نشه یې توکو خلاف مبارزې په برخه کې د پاکستان پر ژمنو ټینګار کړی.
د افغانستان لپاره د پاکستان ځانګړي استازي د دوحې د نشه يي توکو ضد کاري ډلې غونډې ته د وینا پر مهال له افغانستان سره د دې ستونزې په حل کې د مرستې ژمنه تازه کړه.
د پاکستان ځانګړي استازي محمد صادق ټینګار کړی، چې پاکستان به افغانستان ته د نشه يي توکو د مخنیوي لپاره اړینې اسانتیاوې برابرې کړي.
هغه پر خپل اېکس ددې اسانتیاوو د جزئیاتو په اړه وویل، چې پاکستان به د ځانګړي سوداګریز امتیاز، د توکو د ترانزیټ اسانتیاوو او له اقلیمي تغییراتو سره د مقاومت کوونکو کرنیزو تخنیکونو په برخه کې له طالبانو سره تخنیکي مرسته کړي، چې افغان ولس ته قانوني او تلپاتې اقتصاد برابر شي.
هغه دغه راز دې انلاین غونډې ته په خبرو کې وویل چې پاکستان د ۴۵۰۰ افغان محصلانو لپاره د تحصیلي بورسونو ژمنه کړې او له نشه يي توکو سره په مبارزه کې د طالب امنیتي ځواکونو د ظرفیت لوړولو په تړاو مرستې ته ژمن دی.
د نوموړي په باور، د دې مرستو هدف دا دی چې د قانون پلي کوونکي ادارې پیاوړې شي او د نشهیي توکو د تولید او قاچاق مخه ونیول شي.
طالبان په افغانستان کې د نشه یې توکو د تولید او کر له منځه وړل خپله لاسته بولي او په ځلونو یې له نړیوالو غوښتي، چې د نشه یي توکو د بدیل په برخه کې له افغان کروند ګرو سره مرستې وکړي.
سره له دې چې طالبان وايي، په افغانستان کې یې د نشه یې توکو کر صفر ته رسولی، خو لا هم د ایران په ګډون ځینو نورو ګاونډیو هېوادونو ته له افغانستان نه نشه یي توکي قاچاق کیږي.
