د طالبانو مرستيال ویاند حمدالله فطرت وایي، د افغانستان په اړه د روڼتيا نړیوال سازمان راپور شمېرې ناسمې دي. دغه سازمان له درغلیو سره د مبارزې په برخه کې د ۱۸۰ هېوادونو نوملړ خپور کړی او وايي، افغانستان له فساد سره د مبارزې په برخه کې د تېر کال په پرتله ۳ درجې شاتګ کړی.
د طالبانو تر واک لاندي ملي ټلویزيون د دې ډلې د مرستيال ویاند حمدالله فطرت له قوله ویلي، چې «افغانستان کې د فساد پر وړاندي کوټلي ګامونه پورته شوي او کچه يې صفر ته نژدې شوې.»
فطرت زياتوي، چې د افغانستان په اړه د روڼتیا سازمان وروستی راپور د «عقده يي کړيو په لمسون له ناسمو سرچينو» جوړ شوی.
هغه ټينګار کړی، چې د افغانستان په اړه د دغه سازمان قضاوت ناسم دی او د دوی د حکومتولۍ سیسټم له فساده پاک شوی دی.
د روڼتیا نړیوال سازمان له لوري خپرو شویو معلوماتو کې لیدل کیږي، چې افغانستان ته له فساد سره د مبارزې په برخه کې له ۱۰۰ نومرو څخه ۱۷ نومرې ورکړل شوې او د فساد پر وړاندې د مبارزې نوملړ په ۱۸۰ هېوادونو کې په ۱۶۵ مقام کې ځای لري.
د رونټیا نړیوال سازمان هغه هېواد ته چې په بشپړه توګه له فساد څخه پاک وي ۱۰۰ او په فساد تر ټولو ککړ دولت ته صفر ورکوي.
د دغه نړیوال سازمان له لوري له فساد سره د مبارزې په برخه کې ډنمارک د ۹۰ نومرو په لرلو سره په لومړي، فنلنډ د ۸۸ نمرو په لرلو دویم، سینګاپور د ۸۴ نومرو په درلودو سره درېیم او افغانستان د ۱۷ نومرو په لرلو سره ۱۶۵ هېواد دی.
