د پاکستان د پوځ مشر عاصم منير د لومړي وزير په ماڼۍ کې خبريالانو ته ويلي، چې له هیچا یې لیک نه دی تر لاسه کړی. پرون د عمران خان وکیل فیصل چوهدري ویلي و، چې خان د پاکستان په ټاکنو کې د درغليو په اړه د پوځ مشر ته دريم لیک ليږلی.
د پاکستان جيونيوز د پنجشنبې په ورځ په یوه خبر کې ویلي، چې د پوځ مشر عاصم منير د لومړی وزير په ماڼۍ کې د ترکیې د ولسمشر د ميلمستيا په څنډه کې له خبريالانو سره په نارسمي خبرو کې ویلي، چې له هیچا يې لیک نه دی ترلاسه کړی.
جیونیوز د پوځ د مشر له قوله لیکلي: « ما د هیچا لخوا هیڅ لیک نه دی ترلاسه کړی، که زه کوم لیک ترلاسه کړم، زه به یې لومړي وزیر ته ورسوم.»
د پوځ مشر دا هم ويلي، چې پاکستان د پرمختګ په حال کې دی او لا به مخ ته وړاندې لاړ شي.
پرون د پاکستان د تحریک انصاف ګوند د مشر عمران خان وکيل فیصل چوهدري ویلي و، چې خان د اډياله زندان د پوځ مشر ته په ټاکنو کې د درغليو په اړه درېيم لیک لېږلی.
چوهدري خبريالانو ته ویلي: «عمران خان عاصم منير ته په درېيم لیک کې په ټاکنو کې د درغليو او اقلیت ته په اکثريت د ترجیح ورکول موضوع ياده کړې.»
جيونيوز د خپلو امنيتي سرچينو له قوله ويلي، چې د پوځ مشر ته د عمران خان لیک نه دی رسيدلې او عاصم منير د داسي لیکونو لوستلو ته لوالیتا نه لري.
