د ملګرو ملتونو د څار ټیم په خپل یوه نوي راپور کې ویلي چې پاکستاني طالبانو (ټيټيپي) او جماعت انصارالله (جياې) په افغانستان کې د القاعدې او افغاني طالبانو په مرسته نوي روزنیز مرکزونه جوړ کړي دي.
د ملګرو ملتونو د څار ټیم د معلوماتو پر بنسټ، ټيټيپي دغه روزنیز مرکزونه د خوست، کونړ، ننګرهار او تخار په ګډون د افغانستان په بېلابېلو سیمو کې جوړ کړي دي.
د ملګرو ملتونو د څار ټیم په خپل راپور کې زیاته کړې، چې القاعده او د دغې ډلې ملګري اوس د افغانستان له ۳۴ ولایتونو څخه په ۱۴ ولایتونو کې فعالیت لري او په وینا یې، د پخوانیو راپورونو په پرتله د پام وړ زیاتوالی په ګوته کوي.
د ملګرو ملتونو یاد ټیم له دې مخکې د افغانستان په ۱۲ ولایتونو کې د القاعدې د حضور په تړاو راپور ورکړی و، په داسې حال چې د نوي راپور پر بنسټ، دا ډله اوس د هېواد په ۱۴ ولایتونو کې پراخ حضور لري.
د نوموړي سازمان د څار ټیم په خپل راپور کې څرګنده کړې، چې د القاعدې له ۲۵ تر ۳۰ وسله وال له منځني ختیځ څخه د افغانستان کونړ ولایت ته تللي څو هلته د دغې ډلې اړوند کتیبه عمر فاروق ډلې سره یو ځای شي.
په راپور کې راغلي چې ټيټيپي په دوامداره توګه د پاکستان پر وړاندې بریدونه کوي او جماعت انصارالله چې د تاجکستاني طالبانو په نوم پیژندل کېږي، هڅه کوي څو د دغه هېواد دولت نسکور کړي.
د ملګرو ملتونو د څار ټيم د راپور پر بنسټ، تحریک طالبان پاکستان یا ټيټيپي د افغانستان په بېلابېلو ولایتونو کې نوي روزنیز کمپونه جوړ کړي او د خپلو لیکو د پیاوړتیا لپاره د افغان طالبانو له غړو څخه هم کار اخلي. په راپور کې دا هم راغلي چې القاعده د ټيټيپي غړو ته ایډیالوژیکي او پوځي روزنه ورکوي.
د ملګرو ملتونو نوی راپور په څرګند ډول د طالبانو له تکراري ادعاوو سره چې وايي، دوی په افغانستان کې هېڅ ترهګرې ډلې ته پناه نه ده ورکړې، په ټکر کې دی.
دا په داسې حال کې ده چې طالبانو تل دا څرګندونې رد کړي، خو د ملګرو ملتونو نوی راپور ښيي چې دوی د ټيټيپي، القاعده او تاجکستاني طالبانو په څېر له ترهګرو ډلو خپل ملاتړ ته دوام ورکړی دی.
