د ننګرهار لپاره د طالبانو امنیه قوماندانۍ په کندوز کې د کابل بانک مخې ته تر ځانمرګي برید وروسته خپل پرسونل ته امر کړی، چې په امنیه قوماندانۍ کې دننه د عزیزي بانک له نمایندګۍ تنخا واخلي او په ښار کې د معاش له اخیستلو ډډه وکړي.
د ننګرهار د امنیه قوماندانۍ یو مکتوب افغانستان انټرنشنل پښتو ته رسیدلی، چې پکې ځايي چارواکو عزیزي بانک ته امر کړی، چې د طالبانو معاشونه باید په امنیه قواندانۍ کې دننه ورکول شي.
دغه مکتوب دوه ورځې وړاندې د ننګرهار د امنیه قوماندانۍ د مرستیال محمد طاهر مبارز په لاسلیک په ننګرهار کې د عزیزي بانک ادارې ته استول شوی.
په مکتوب کې له یاد بانک غوښتنه شوې، چې د دغه ولاییت د امنیه قوماندانۍ ټولو سرتیرو او چارواکو ته د قوماندانۍ د قراراګاه دننه د عزیزي بانک له څانګې معاشونه توزیع کړل شي او په نورو نماینده ګیو کې د معاشونو له ورکړې ډډه وکړي.
همدارنګه په دغه مکتوب کې د ننګرهار د امنیه قوناندانۍ ټولو منسوبینو ته جدي امر شوی، چې د عزیزی بانک له ښاري څانګو دې معاشونه نه اخلي او د سرغړونې په صورت کې به ورسره قانوني چلند وکړي.
افغانستان انټرنشنل ـ پښتو ته په رسیدلي مکتوب کې لیکل شوي، چې د ننګرهار امنیه قوماندانۍ د پولیسو لومړی او دوهمي حوزې ته امرکړی، چې د نظامي کسانو د معاشونو د ویش پرمهال دې په جلال اباد ښار کې د عزیزي بانک ټولې څانګې وڅاري او پولیسو ته دې اجازه نه ورکول کیږي، چې له امنیه قواندانۍ بیرون خپل معاشونه ترلاسه کړي.
په ننګرهار کې د طالبانو امنیه قواندانۍ دا پرېکړه په داسې مهال کوي، چې څلور ورځې وړاندې په کندوز کې د کابل بانک مخې ته هغه مهال ځانمرګی برید وشو، چې ګڼ کسان خپلو معاشونو د اخیستلو لپاره ورغلي وو.
د کندوز د برید مسولیت داعش ډلې په غاړه اخیستی و او سرچینو افغانستان انټرنشنل ته ویلي، چې په دغه برید کې د وژل شویو ۱۴ تنو جسدونه د کندوز روغتون ته وروړل شوي.
