ملګرو ملتونو بې ځایه شویو او له ګاونډیو هېوادونو اېستل شویو کډوالو ته سرپناوې جوړې کړي
د ملګرو ملتونو د کډوالو عالي کمېسارۍ لسګونو بې ځایه شویو او له ګاونډیو هېوادونو اېستل شویو کډوالو ته دایمي سرپناوې جوړې کړي دي.
د ملګرو ملتونو د کډوالو عالي کمېسارۍ لسګونو بې ځایه شویو او له ګاونډیو هېوادونو اېستل شویو کډوالو ته دایمي سرپناوې جوړې کړي دي.
یاد سازمان د یکشنبې په ورځ (د کب ۵مه) په خپل اېکس کې د یوه بیان په خپرولو سره ویلي، چې په ۲۰۲۴ کال کې یې ۱۹۰ دایمي سرپناوې جوړې کړي دي.
د بیان له مخې، یاد شمېر سرپناوې د افغانستان په مرکزي سیمو کې جوړې شوي دي، چې په جوړېدو سره یې د بې ځایه شویو کسانو د اوسېدو ستونزې حل شوې دي.د ملګرو ملتونو د کډوالو عالي کمېسارۍ زیاته کړې ده، چې دغه کورونه او سرپناوې د جاپان په مالي ملاتړ او د وطن موسسې په فني همکاریو سره جوړې شوې دي.دا په داسې حال کې ده، چې دغه سازمان تر دې وړاندې په جوزجان ولایت کې هم ۱۱۱ کورنیو بې ځایه شویو ته دایمي سرپناوې جوړې کړي دي.اوسمهال په افغانستان کې د طبیعي پېښو سلګونه زیانمنې کورنۍ او زرګونه هغه کډوال چې په زور سره له ایران او پاکستان څخه اېستل شوي دي، د سرپناه له نشتون سره لاس او ګرېوان دي.د دې ترڅنګ د بېوزلۍ او وزګارتیا د کچې د لوړوالي او همداراز د بهرنیو مرستو کمېدل هم د دې لامل شوي، چې د بې ځایه شویو کسانو ستونزې لا پسې زیاتې کړي.ملګرو ملتونو په افغانستان کې اړمنو افغانانو سره د بشري مرستو د پروګرامونو لپاره په ۲۰۲۴ کال کې د نړۍوالې ټولنې څخه ۳.۰۶ میلیاردو ډالرو د بودیجې د برابرولو غوښتنه کړې وه، چې د دغې بودیجې یوازې شاوخوا ۳۸ سلنه ورته برابره شوه. ملګرو ملتونو د بودیجې له کمښت وروسته اړمنو افغانانو ته د خوراکي توکو په ګډون خپل ځیني پروګرامونه یا بند او یا هم محدود کړل.
