د طالبانو د ریاست الوزرا اقتصادي مرستیال ملا عبدالغني برادار وايي، ازبکستاني چارواکو ژمنه کړي، چې د اوړي په موسم کې به افغانستان ته خپله برېښنا زیاتوي او تعرفه به یې کموي. نوموړی وايي، دغه راز تر دشت الوان پورې د برېښنا مزي قرارداد چې ۲۵۲ میلیون ډالره و ۳۰ میلیونه ډالره کم شوی.
ملا عبدالغني برادر له ازبکستان نه تر راستنېدو وروسته په کابل کې خبریالانو ته وویل، چې په دغه سفر کې یې د ازبکستان له لومړي وزیر عبدالله عارف اوف او یو شمېر وزیرانو سره وکتل او ازبکستان تر دشت الوان پورې د ۵۰۰ کیلو ولټه برېښنا مزي قرارداد چې مخکې په ۲۵۲ میلیونه ډالرو شوی و، ۲۲۲ میلیونه ډالرو ته را کم کړ.
د برادر په وینا، ازبکستان ژمنه کړې، چې د اوړي په موسم کې به افغانستان ته خپله برېښنا زیاتوي او تعرفه به کموي. دغه هېواد ژمنه کړې، چې د افغانستان پر کرنیزو محصولاتو باندې لګولو شوي محدودیتونه لرې کوي.
دغه طالب چارواکی وايي، ازبکستاني چارواکو ژمنه کړې، چې له حیرتان نه تر هرات پورې د پټلۍ د جوړولو تخنیکي سروې لګښت دغه هېواد په غاړه اخیستی او ډیر ژر به یې عملي کارونه پیل شي.
پر همدغه مهال د طالبانو د سوداګرۍ وزیر نورالدین عزیزي وايي، چې د سوداګرۍ په برخه کې د اسانتیاوو د رامنځته کولو ترڅنګ د حیرتان او سپین بولدک ترمنځ د پټلۍ نښلولو په اړه یې له ازبکستاني چارواکو سره خبرې کړې دي.
