د تورخم دروازه نن د څلورمې ورځې لپاره هم د هر ډول تګ راتګ لپاره تړلې ده. تازه په ننګرهار ولایت کې د طالبانو د رسنیو دفتر خبر ورکړی، چې د دغې ستونزې د حل لپاره د یادې ډلې یو لوړپوړی پلاوی نن تورخم ته ځي.
دا په داسې حال کې ده، چې همدا تېره ورځ په تورخم ښارګوتي کې سرچینو افغانستان انټرنشنل ته ویلي و، چې د دروازې د پرانیستو په اړه د طالبانو او پاکستاني چارواکو ترمنځ خبرې بې پایلې پای ته ورسېدې.
د سرچینې په خبره، په دغه ناسته کې د ننګرهار لپاره د طالبانو مرستیال والي عزیز الله مصطفا او له پاکستاني لوري د دغه هېواد پوځیانو ګډون لاره.
په ننګرهار ولایت کې هم د طالبانو د رسنیو دفتر پر اېکس پاڼه په خپرې کړې خبرپاڼه کې ویلي، چې تېره ورځ د ننګرهار ولایت لپاره د طالبانو مرستيال په مشرۍ دغه مذاکرات بې پایلې پای ته رسېدلي و.
په خبرپاڼه کې راغلي، چې طالبان غواړي د سیاسي او سوداګريزو اړیکو د دوام لپاره باید د ستونزو حل د دیپلوماسۍ له لارې وشي.
خبرپاڼه زیاتوي، چې پاکستاني لوری د ډيورنډ کرښې په اوږدو کې د طالبانو لهخوا د تاسیساتو د جوړولو پر سر اختلاف لري او د خپلو تاسيساتو د جوړولو غوښتنه کوي.
په خبرپاڼه کې دارنګه راغلي، چې د تورخم دروازې د تړلو له امله سلګونه لارۍ موټر بند پاتې دي.
طالبانو له پاکستانه غوښتي، چې د دواړو غاړو ولسي ستونزو او بشري اړتیاوو ته په کتو دې د بېځایه خنډونو له جوړولو ډډه وکړي.
د تورخم فرضي کرښې لار د پاکستان لهخوا څلور ورځې وړاندې د طالبانو د پوله ساتو ځواکونو له لوري د تاسیساتو جوړولو په غبرګون کې تړل شوې ده.
