د طالبانو د کډوالو او بېرته راستنېدونکو چارو وزارت مالي او اداري مرستیال کلیم الرحمان فاني، د دغه وزارت کارکوونکو ته ګوتڅنډنه کړې، چې هیڅ یو کارکوونکی حق نه لري، چې د ماسپښین لمانځه پر مهال په دفتر کې پاتې شي.
نوموړي دغه څرګندونې تېره ورځ د طالبانو د کډوالو او بېرته راستنېدونکو چارو وزارت په جومات کې تر لمانځه وروسته د دغه وزارت کارکوونکو ته کړې دي.
د طالبانو د کډوالو چارو وزارت پر اېکس پاڼه کاږلي، چې هغه دارنګه «په ورځنيو درسونو کې د کارکوونکو په ګډون او د الهي فریضې ته د هغوی پر ژمنتیا ټینګار کړی دی.»
واک ته د طالبانو له بیا راستنېدو وروسته، دغه ډله لاهم د خپلې لومړۍ واکمنۍ سختې تګلارې تکراروي.
د راپورونو له مخې، دغې ډلې په بېلابېلو ولایتونو کې خلک په زور لمونځ کولو ته اړ اېستي دي.
تر دې وړاندې هم په کابل ښار کې ځینو هټیوالو افغانستان انټرنشنل ته په رالېږل شویو پیغامونو کې ويلي و، چې د امربالمعروف وزارت محتسبان دوی اړ اېستي، چې د جمعې لمونځ دوه ځلې وکړي.
په یوې بلې پېښه کې د فاریاب یو اوسېدونکي افغانستان انټرنشنل ته د یوې ویډیو په لېږلو سره ویلي و، چې په میمنه کې د طالبانو امربالمعروف غړو د فوټبال په نندارچیانو په زور لمونځ کړی، چې لویې برخې یې بې اودسه لمونځ وکړ.
د کابل یو هټیوال بیا افغانستان انټرنشنل ته د یو غږیز پیغام په لېږلو سره ویلي و، چې د طالبانو امربالمعروف ډلې پرې په یوه ورځ کې درې ځله د ماسپښین لمونځ په زوره ادا کړی دی.
تر دې وړاندې هم د طالبانو د امر بالمعروف وزارت محتسبانو پلورونکي ګواښلي و، که د جمعې لمونځ ته ور نه شي؛ نو هټۍ ګانې به یې ور وتړي.
دارنګه (د تلې په ۵مه) له بدخشانه سیمهییزو سرچېنو افغانستان انټرنشنل ته ویلي و، چې د بدخشان په پوهنتون کې طالب چارواکو هغه ۲۹ تنه زدهکړیالان له پوهنتونه اېستي چې د لمانځه پر مهال یې د فوټبال لوبه کوله.
د بدخشان په پوهنتون کې یو زدهکړیال ویلي و، چې طالبانو دغه زدهکړیالان ګواښلي، وهلي او تر ربړولو وروسته یې له پوهنتونه هم شړلي دي.
د سرچېنو په وینا، طالبانو د دغو اېستل شویو زدهکړیالانو نوملړ د هغوی له عکسونو سره یو ځای د پوهنتون په دروازه ځړولی او لیکلي یې دي چې دغه کسان نور نه شي کولای خپلو درسي ټولګیو ته لاړ شي.
په ځینو ولایتونو کې بیا طالبانو په جوماتونو کې د سیمې د اوسېدونکو لپاره د لمانځه حاضرۍ جوړې کړې وې، چې لمونځ ته د نه ورتګ لپاره یې خلک جریمه کول.
