د افغانستان د امنیت څار بنسټ موندنې ښیي، چې د روان کال د جنورۍ میاشتې پرمهال په افغانستان کې ۲۲ امنیتي پېښې ثبت شوې دي. له دې پېښو څخه شاوخوا ۹ د طالبانو د مخالفو جبهو او ۳ پېښې د داعش له خوا ترسره شوي دي.
دغه بنسټ د دوشنبې په ورځ (د کب ۶مه) د جنورۍ میاشتې پرمهال په ټول افغانستان کې د امنیتي پېښو په تړاو موندنې د خپلې اېکسپاڼې له لارې خپرې کړې دي.
د افغانستان د امنیت څار بنسټ د راپور پر بنسټ، هغه پېښې چې مسوولیت یې د طالبانو مخالفو جبهو پر غاړه اخیستي، د ډېسمبر میاشتې په پرتله کمې دي.
نوموړي بنسټ له دې مخکې راپور ورکړی و، چې د ډېسمبر میاشتې پرمهال په ټول افغانستان کې ۳۹ امنیتي پېښې رامنځته شوي، چې ډېری یې د مقاومت او ازادۍ جبهو په ګډون د طالبانو د مخالفو ډلو له خوا ترسره شوي دي.
یاد بنسټ د جنوري په میاشت کې د داعش درېیو بریدونو ته په اشارې څرګنده کړې، چې یو په تخار او دوه هم په بغلان ولایتونو کې ترسره شوي دي.
په کابل، تخار او هرات کې لږترلږه درې بریدونه نورې هغه پېښې بلل کېږي، چې د افغانستان امنیت څارونکو ورته اشاره کړې ده.
د دې پیښو عاملان ناڅرګند دي.
همداراز د دغه بنسټ موندنې ښيي، چې دا پېښې په هرات، کابل، بغلان، کندوز، پروان، تخار، کاپیسا او خوست کې په ترتیب سره متمرکزې وې.
د افغانستان د امنیت څاربنسټ په ټول هېواد کې د طالبانو په اجراییوي بنسټونو کې له۵۰۰ څخه د ډېرو پېښو ثبتېدو ته هم اشاره کړې، خو د نوعیت په تړاو یې نور جزییات نه دي ورکړي.
