احمد مسعود: د دوحې بهیر ناکام شوی او ویانا خلکو ته د درناوي وړ یوازنی بهیر دی
د افغانستان د مقاومت په نوم جبهې مشر احمد مسعود وايي، چې د دوحې بهیر له ناکامۍ وروسته یوازینی بهیر چې د افغانانو باور او پام یې ځانته را اړولی دی، د ویانا بهیر دی.
د افغانستان د مقاومت په نوم جبهې مشر احمد مسعود وايي، چې د دوحې بهیر له ناکامۍ وروسته یوازینی بهیر چې د افغانانو باور او پام یې ځانته را اړولی دی، د ویانا بهیر دی.
نوموړي دغه بهیر په افغانستان کې د تلپاتې سولې د ترلاسهکېدو لپاره یوه مناسبه لار بللې ده.
مسعود تېره ورځ له هډسن انسټېټیوټ سره په یوه مرکه هیلهمندي ښودلې، چې د هېوادونو او نړۍوالو سازمانونو ډېر استازي به د ویانا بهیر په راتلونکو ناستو کې ګډون وکړي.
هغه زیاته کړې: «د دوحې بهیر له ناکامۍ سره، ویانا وکولای شول چې د افغانانو باور، درناوی او ملاتړ راجلب کړي او په ټول هېواد کې د بېلابېلو ډلو ترمنځ د یووالي د رامنځتهکېدو لپاره د یوې مناسبې لارې په توګه کار وکړي.
د افغانستان د مقاومت په نوم جبهې مشر ادعا کړې، چې د ویانا بهیر له باور او لازم ظرفیت څخه برخمن دی او له نړۍوال ملاتړ سره به د تلپاتې سولې د ترلاسهکېدو لپاره پر یو واقعي جوړښت بدل شي.
احمد مسعود وړاندې وايي، چې د امریکا د مرستو بندیز پر طالبانو قوي اغېزه کړې او په وینا یې، دغې ډلې په تېرو درېیو کلونو کې له نړۍوالو مرستو ناوړه ګټه اخیستې، خو اوس د دغو سرچینو په بندېدو سره، د دوی ترمنځ داخلي شخړې ډېرې شوې دي.
له دې وړاندې د افغانستان د مقاومت په نوم جبهې مشر احمد مسعود له افغانستان انټرنشنل سره په یوې مرکې کې ویلي و، چې که طالبان د ټاکنو، سولې او عدالت اصولو ته غاړه کېږدي، چمتو دی څو خبرې ورسره وکړي.
د یادونې ده، چې د ویانا غونډه د تېرې اونۍ د سېشنبې او چهارشنبې پر ورځو د احمد مسعود او یاسین ضیا په ګډون د طالبانو د لسګونو مخالفو سیاسي څېرو په حضور کې د اتریش په ویانا ښار کې جوړه شوې وه.
