په اکوړه خټک حقانیه مدرسه کې له ځانمرګي برید سره جوخت، د پښتون ژغورنې غورځنګ مشر منظوراحمد پښتین دا برید غندلی او د مولانا حامدالحق له کورنیو او خواږو سره یې د غمرازۍ د شریکولو ترڅنک پر ټولو پښتنو غږ کړی چې په داسې سختو شرایطو کې یو لاس شي.
پښتین د جمعې په ورځ (دکب ۱۰مه) د ټولنیزو شبکو له لارې په یوه خپاره کړي بیان کې ویلي چې د پاکستاني جنرالانو او د هغوی د استخباراتي سازمانونو د سیاستونو په ترڅ کې له کلونو راهیسې د پښتنو په وطن کې ویجاړي روانه ده.
ځوان پښتون سیاستوال پاکستاني جنرالانو ته په اشارې ټینګار کړی چې د روانو سیاستونو مخنیوی په کار دی. هغه لیکي: «زمونږ په خاوره کې د دې وژنو د مخنیوي لپاره ټول یو لاس شئ او د نیابتي جګړو او پوځي سیاستونو پر وړاندې ودرېږئ. د سولې د رامنځته کولو لپاره هڅې وکړئ.»
د پښتون ژغورنې غورځنک مشر، منظور احمد پښتین دا څرګندونې داسې مهال کوي چې په د پښتونخوا په مشهوره اکوړه خټک دیني مدرسه کې د ځانمرګي برید په ترڅکې د نوموړې مدرسې د مشر مولانا حامدالحق په ګډون یو شمېر کسان وژل شوي او ټپیان دي.
له دې مخکې طالبانو هم په یادې مدرسه کې چاودنه غندلې او د مولانا حامدالحق وژنه یې یوه «لویه ضایعه» بللي ده.
تر اوسه کومې ډلې یا شخص د دغه برید مسوولیت نه دی منلی.
