سمېع سادات: د دوحې تړون او د ۵ زره طالبانو خوشې کېدو پوځیان له تکتیکي او رواني اړخه وځپل
د متحدې جبهې مشر جنرال سمېع سادات وايي، چې د دوحې تړون او د ۵ زره طالب بندیانو خوشې کېدو افغان امنیتي ځواکونه له تکتیکي او رواني پلوه سخت وځپل.
د متحدې جبهې مشر جنرال سمېع سادات وايي، چې د دوحې تړون او د ۵ زره طالب بندیانو خوشې کېدو افغان امنیتي ځواکونه له تکتیکي او رواني پلوه سخت وځپل.
د نوموړي په خبره: «کله چې د جمهوري نظام له خوا پنځه زره طالب بندیانو خوشې شول، دغه کار د طالبانو لپاره د مثبتې انګېزې لامل شوه.»
د متحدې جبهې مشر په وینا، د دوحې له تړون وروسته هغه قراردادیان چې د افغان پوځ وسلې او تجهیزات یې جوړول واېستل شول او تر هغه وروسته پرلهپسې دوه کاله پر پوځ وسلې بندې شوې او هر څه صفر ته ورسېدل.
جنرال سمېع سادات همداراز زیاته کړه، چې د دوحې تړون او د پنځه زره طالب بندیانو له خوشې کېدو وروسته افغان پوځ نه یوازې له وسلو او تجهیزاتو بې برخې شو، بلکې دغه وضعیت پر پوځیانو دومره ناوړه اغېز وکړ، چې له تکتیکي او رواني پلوه سخت وځپل شول.
نوموړي دغه خبرې د دوحې تړون له پنځه کلنۍ سره سم کړي دي.
د افغانستان د امنیتي ادارو پخواني مسوولان د افغان امنیتي ځواکونو د اوسني وضعیت لامل د دوحې تړون او تر هغه وروسته د امریکا او د متحدینو د مرستو د بندېدو لامل ګڼي، خو د ۱۴۰۱ کال په کب میاشت کې د افغانستان د بيارغونې لپاره د امریکا ځانګړي پلټونکي یا سیګار بیا په یوه راپور کې وویل، چې د مخکېني حکومت د پوځ د ړنګېدو او له نړۍوال پام څخه د غورځېدو یو لامل فساد و.
سیګار په دې راپور کې زیاته کړې وه، چې د تېرو شلو کلونو په لړ کې امریکا د مخکېني حکومت پر امنیتي او دفاعي ځواکونو ۹۰ میلیارد ډالره لګښت کړی دی، خو فساد د امنیتي ځواکونو وړتیاوې له منځه وړي دي.
د دوحې تړون او د ۵ زره طالب بندیانو د خوشې کېدو پرېکړه
پخواني ولسمشر محمد اشرف غني د ۲۰۲۰ کال د مارچ په ۱۰مه د افغان دولت او طالبانو ترمنځ دخبرو د پیل په مناسبت د دغې ډلې د بندیانو د عفوې او خوشي کولو اړوند فرمان لاسلیک کړ.
د طالب بندیانو د خوشي کولو موضوع سره له دې چې د افغان سولې په بهیر کې یوه مهمه خو جنجالي موضوع ده.
یاد شمېر بندیان د ځينو شرایطو پربنسټ خوشې شول، چې تر ټولو مهم شرط یې دا و، هغه طالب بندیان چې خوشي کېږي، لیکلې ژمنه به کوي چې د جګړې ډکر ته به نه ستنېږي، خو وروسته بیا داسې راپورونه هم خپاره شول چې ډېر شمېر خوشې شوي طالبان د جګړو لیکو ته ستانه شوي و.
له دې سره، د ۲۰۲۰ کال د فېبرورۍ پر وروستۍ نېټه د امریکا او طالبانو ترمنځ د دوحې د سولې تړون لاسلیک شو او له دې تړون سره باید د افغان دولت او طالبانو تر منځ د بین الافغاني خبرو په ترڅ کې د افغانستان پر راتلونکې پرېکړه شوې وای، خو داسې ونشول.
د امریکا او طالبانو ترمنځ په دوحه کې اوږدې خبري وشوې، خو په افغانستان کې د جګړې اور لا پسي تود شو، چې پایله کې یې لومړی د افغانستان بېلابېلو ولسوالیو او بیا ولایتونو یو په بل پسي سقوط وکړ.
پر دې سربېره، طالبان د خبرو له لارې نه، بلکي د زور له لارې د ۲۰۲۱ کال د اګست پر ۱۵ د دویم ځل لپاره افغانستان کې واک ته ورسېدل.
دا په داسې حال کې ده، چې د طالبانو ویاند ذبیح الله مجاهد د دوحيې د پنځمې کلیزې به مناسبت په یوه مرکه کې ويلي، چې له امریکا سره دغه تړون پای ته رسېدلی او دوی دا مهال د خپلو اصولو له مخي مخ ته ځي.
مجاهد زياته کړې، چې امریکا لا هم د دوحيې د تړون ځیني ژمنې نه دي عملي کړي.
