پاکستانۍ رسنۍ: عمران خان په زندان کې د غوږونو پر ناروغۍ اخته شوی
د پاکستان رسنۍ وايي، چې د دغه هېواد د تحریک انصاف ګوند (پيټيای) بنسټګر او مخکېنی لومړی وزیر عمران خان په اډیاله زندان کې د غوږونو پر ناروغۍ اخته شوی دی.
د پاکستان رسنۍ وايي، چې د دغه هېواد د تحریک انصاف ګوند (پيټيای) بنسټګر او مخکېنی لومړی وزیر عمران خان په اډیاله زندان کې د غوږونو پر ناروغۍ اخته شوی دی.
جیونیوز د دوشنبې په ورځ (د مارچ ۳مه) راپور ورکړی، چې د «پېمز» روغتون څلور ډاکټران د خان لپاره اډیاله زندان ته تللي او د هغه معاینه یې کړې ده.
دغې رسنۍ زیاته کړې، چې د نوموړي معاینې شاوخوا نیم ساعت دوام کړی او ډاکټرانو د هغه د غوږونو د وضعیت څېړنه کړې ده.
د راپور پر بنسټ، الطاف حسن، عمر فاروق، علي عارف او تاشفین امتیاز هغه څلور ډاکټران دي چې د عمران خان د معاینې لپاره زندان ته ورغلي دي.
په راپور کې راغلي، چې ډاکټرانو د پاکستان مخکېني لومړي وزیر ته د هغه تر معاینې وروسته د غوږونو ناروغۍ د ښهکېدو لپاره لازم درمل هم ورکړي دي.
دا په داسې حال کې ده، چې څه موده مخکې د پاکستان تحریک انصاف ګوند په یوه بیان کې د مخکېني لومړي وزیر عمران خان د ناسم روغتیايي وضعیت په تړاو اندېښنه ښودلې وه.
دغه ګوند د شهباز شریف په مشرۍ د پاکستان له حکومت څخه غوښتي و، چې د خان د معاینې او درملنې لپاره د نوموړي ډاکترانو ته اجازه ورکړي، څو زندان ته ورشي.
د یادونې ده، چې د پاکستان مخکېنی لومړی وزیر عمران خان او د هغه مېرمن بشرا بيبي د تېر ۲۰۲۴ کال د جنورۍ په ۱۷مه د دغه هېواد په راولپنډۍ ښار کې د یوې محکمې له خوا له اصلي بیو په کم ارزښت د دولتي سوغاتونو رانیولو په تور په ۱۴-۱۴ کاله بند سزا او د ۷۸۷ مېلیونه پاکستانۍ کلدارو په ورکولو محکوم شوي وو.
