د پاکستان د مالیې وزارت سلاکار وايي، چین دغه هېواد ته د دوه میلیارد ډالرو ور کړي پور د ترلاسولو موده یو کال نوره هم غځولې ده. چین تېر کال هم د دې پور موده یو کال غځولې وه او پاکستان ته پکار و، چې د روانې میلادي میاشتې په ۲۴ یې بېجینګ ته دا پور ور کړی وی.
خو د پاکستان د مالیې وزارت سلاکار خرم خرم شهزاد دا خبره له بلومبرګ نیوز سره په مرکه کې کړې، چې دا نېټه د یو بل کال لپاره نوې شوې ده.
چین د لار او کمربند پروژې له مخې په پاکستان کې میلیاردونه ډالره پانګونه کړې او هم یې دغه هېواد ته پور ور کړی دی.
پاکستان ته د چین د دوه میلیارد ډالرو پور یو کال موده اوږدولو سره هممهاله د پیسو نړیوال صندوق اسلام اباد ته د خپل ور کړي اوه میلیارده پور لومړنۍ بیا کتنه کوي.
د پاکستان دولتي رادیو د راپور له مخې، پانګوال دا کتنه له نږدې څاري او اقتصادي سمون کې د پرمختګ په سترګه ورته ګوري.
د کاناډا ټاکلی لومړی وزیر مارک کارني وایي، «د ډونلډ ټرمپ په مشرۍ د امریکا حکومت غواړي پر کاناډا ولکه وکړي، خو دې هڅې یې باید له ماتې سره مخ شي.» ولسمشر ټرمپ هم یو وخت ویلي و، که کاناډا د امریکا برخه شي، نو د دغه هېواد نقشه به ډېره ښکلې ښکاره شي.
مارک کارني د لومړي وزارت لپاره د لېبرال ګونډ ټاکنو کې تر خپلې بریا وروسته د خپل هېواد په تړاو له امریکا اندېښنه وښوده.
هغه په یوه غونډه کې وویل، «امریکا، زموږ سرچینې، زموږ اوبه، زموږ خاوره او زموږ هېواد غواړي او که بریالئ شي، نو زموږ د ژوند ډول به له منځه یوسي.»
هغه دا هم وویل، چې د ډونلډ ټرمپ په مشرۍ د امریکا له حکومت سره د جنجالونو له امله ټورنټو «تورې ورځې په مخ کې لري.»
نوموړي پر ډونلډ ټرمپ له دې امله نیوکه وکړه چې پر کاناډا یې تعرفې لګولې او دا چې غواړي د امریکا ۵۱ ایالت یې کړي.
د کاناډا پخواني لومړي وزیر جسټن ټروډو هم د مخه ښې وینا کې د خپل هېواد په تړاو د ډونالډ ټرمپ ګواښونو ته اشاره وکړه او ویې ویل، د خپل ګاونډي له سخت ګواښ سره مخ دي.
ښاغلی ټرمپ نه یواځې وخت نا وخت دا خبرې کړې چې کاناډا دې د امریکا برخه شي، بلکې کله کله یې د دغه هېواد لومړی وزیر جسټن ټروډو د لومړي وزیر پر ځای والي بللی دی.
د عرب نیوز د راپور له مخې روسیې نن دوشنبه اعلان کړی، چې په مسکو کې د بریتانيا سفارت دوه ډیپلوماټان د جاسوسۍ په تور له دغه هېواده باسي.
د روسیې د فډرالي امنیت ادارې د بریتانیا د سفارت دویم سکرټر او د لومړي سکرټر مېرمن د اېستلو له اعلان سره سم وویل، چې د فډرالي امنیت خدمتونو ضد استخباراتي عملیاتو په مسکو کې د دغه هېواد د سفارت تر پوښښ لاندې د بریتانیا استخباراتي حضور افشا کړی دی.
اېف اېس بي ویلي، چې د روسیې بهرنیو چارو وزارت د دوی اسناد لغوه کړي او دوی ته یې امر کړی چې په دوو اونیو کې له دغه هېواده ووځي.
د مسکو او لندن اړیکې د روسیې ولسمشر ولادیمیر پوتین د حکومت په څلورمه دوره کې هغه وخت خړې شوې، چې پر یو بل یې د جاسوسۍ تورونه پورې کړل.
بریتانې په ۲۰۰۶ کال کې په روسیه تور پورې کړ، چې د روسیې یو پخوانی کارکوونکی او د کرملېن سرسخته نیوکه کوونکی الکساندر لیتویننکو یې په لندن کې مسموم کړی دی.
له هغه وروسته په ۲۰۱۸کال کې بریتانیا او د هغې متحدینو د روسیې د سفارت لسګونه چارواکي وشړل، چې د دوی په وینا جاسوسان وو.
دا اعلان په داسې حال کې کېږي، چې روسیه د اوکراین د شخړې مسوولیت له متحده ایالاتو څخه د اروپا پر غاړه وراچوي؛ ځکه چې د ولسمشر ډونالډ ټرمپ اداره له کرملېن سره د نږدې اړیکو په لټه کې ده.
پاکستانۍ رسنۍ خراسان ډایري خبر ورکړی، چې د خیبرپښتونخوا په کوهاټ کې نامعلومه وسلهوالو د ترهګرۍ ضد دوه پولیس په ډزو وژلي دي.
د کوهاټ ولسوالۍ د ځایي پولیسو په وینا،دغه پېښه په نانډه بند سیمه کې شوې ده.
پولیسو زیاته کړې، چې په وژل شویو کې یو تن د پولیسو افسر او بل یې ساتونکی پولیس دی.
لاتراوسه د دغې پېښې پړه کومې ډلې پر غاړه نده اخیستې.
له بل پلوه بیا په پنجاب کې د تراویح لمانځه پر مهال په ډزو ۳ تنه وژل شوي دي.
د جیو نیوز د راپور له مخې، د پنجاب په نارووال ولسوالۍ کې تېره شپه د تراویح د لمانځه پر مهال د ډزو له امله ۳ تنه وژل شوي دي.
د پنجاب پولیسو جیو نیوز ته د دغې پېښې پخلی کړی او ویلي یې دي، چې په وژل شویو کسانو کې یو تن یې چې عمران نومېږي؛ د خپلو ورورو لهخوا په وسلهوالو د پیسو په بدل کې وژل شوی دی.
د پولیسو په وینا، په لومړنیو څېړنو کې څرګنده شوې چې د وژل شوي کس ورور زمان نومېږي چې اوسمهال په کاناډا کې اوسېږي.
پولیسو دا هم ویلي، چې دغه وسلهوال د وزیرستان اصلي اوسېدونکي دي.
د نارووال پولیسو مشر طیب حفیظ چیما وایي، د وژل شوي عمران او د هغه د ورور زمان ترمنځ د موټرو د یوه تمځای د مالکیت پر سر پخوانۍ شخړه روانه وه.
طیب حفیظ زیاته کړي، چې د دغو وروڼو په تړاو د دوی د پولیسو په مرکز کې له پخوا ځینې قضیې ثبتې شوې وې.
اوکرایني او امریکايي چارواکي نن په سعودي عربستان کې غونډه کوي، چې له روسیې سره د جګړې د پای ته رسولو د څرنګوالي په اړه خبرې وکړي.
د رویټرز خبري اژانس د خبر له مخې، امریکایي پلاوی به هڅه وکړي چې ځان پوه کړي او وګوري چې ایا کیف د ډونالډ ټرمپ او د اوکراین ولسمشر ولادیمیر زېلېنسکي تر منځ له لیدنې وروسته چې په لفظي شخړه بدله شوه؛ د "رېښتینې" سولې تړون سره لېوالتیا لري او که نه.
ویل کېږي، د یادې غونډې یوه مهمه موخه دا هم ده چې د امریکا او اوکراین اړیکو ته اوښتي زیانونه له سره ورغول شي.
په یاده غونډه کې به د امریکا استازیتوب د دغه هېواد د بهرنیو چارو وزیر مارکو روبیو، د ملي امنیت سلاکار مایک والټز او د منځني ختیځ لپاره د ډونالډ ټرمپ استازی سټیو وېتکوف وکړي.
د اوکراین استازیتوب به په غونډه کې د ښاغلي زېلېنسکي د دفتر رییس اندري یرمک په غاړه ولري.
د اوکرین ولسمشر ولادیمیر زېلېنسکي د شپې ناوخته په یوې ویډیويي وینا کې وویل، چې هغه به د دوشنبې په ورځ سعودي عربستان ته سفر وکړي؛ ترڅو د سولې په برخه کې خپلو چارو ته دوام ورکړي.
د بشري حقونو بنسټونو د څو اونیو له نیوکو او قانوني ستونزو وروسته د پانامې حکومت د تېرې شنبې په ورځ د افغانانو په ګډون لسګونه هغه کډوال خوشې کړي، چې له امریکا څخه تر اېستل کېدو وروسته د دغه هېواد په پنډغالو کې ساتل کېدل.
د پانامې حکومتي چارواکو دغو کډوالو ته ۳۰ ورځې وخت ورکړی، چې ژر تر ژره دغه هېواد پرېږدي.
په خوشې شویو کډوالو کې د حیات الله اېماق په نوم یو ۲۹کلن افغان ځوان هم شامل دی، چې د طالبانو تر واکمنۍ وروسته په ۲۰۲۲ زېږدېز کال کې یې خپل هېواد پرېښی و.
د نورو کډوالو په څېر هغه هم له خپل راتلونکي برخلیکه نه دی خبر چې څه به ورسره کېږي.
حیات الله د اسوشیېټډ پرېس خبري اژانس سره په مرکه کې وویل:« موږ پناه غوښتونکي یو، پیسې نه لرو، نه هوټل نیولی شو او نه هم دلته خپلوان لرو».
هغه زیاته کړه: «زه هېڅکله نشم کولی افغانستان ته ولاړ شم، هلته طالبان دي او که بېرته ولاړ شم ؛نو ما به ووژني».
د پانامې حکومت ویلي، کډوال کولای شي د ۶۰ نورو ورځو لپاره دلته پاتې شي؛ خو وروسته له هغې به د ډېرو برخلیک ناڅرګند وي.
حیات الله او ۶۵ نور کډوال چې له چین، روسیې، پاکستان، افغانستان، ایران، نیپال او نورو هېوادونو امریکا ته تللي وو؛ له یوې اوږدې مودې بند تېرولو وروسته د ټرمپ د پرېکړې له مخې پانامې ته ولېږدول شول.
پانامې مخکې ویلي و، چې دوی له امریکا سره کار کوي؛ ترڅو هغو کسانو ته «یو روښانه پېغام» ورکړي، چې غواړي امریکا ته ځان ورسوي.
هغه مهال چې پانامه کې دغه کډوال خوشې شول د بشري حقونو وکیلان او د کډوالو ملاتړې ډلې یې هرکلي ته ورغلې وې؛ څو ورسره مرسته وکړي؛ خو لا هم لسګونه کډوال په پنډغالو کې بند پاتې دي.
په خوشې شویو کسانو کې د پاکستان، ایران او روسیې کډوال هم شامل وو.
یو روسی ځوان، «نیکیتا ګاپونوف» چې د نرښخیانو ټولنې غړی دی وویل، چې د امریکا پر پوله ونیول شو او اجازه ورنه کړل شوه چې د پناه غوښتنه وکړي.
هغه وویل: «زه به نن شپه پر سړک ویده شم».
دغه کډوال د هغه تړون برخه دي، چې د امریکا ولسمشر ډونلډ ټرمپ له پانامې او کاستاریکا سره کړی و؛ ترڅو کډوال د دغو هېوادونو له لارې بېرته خپلې اصلي خاورې ته واستوي.
له امریکا څخه د دغه اېستل شویو کډوالو په تړاو اندېښنې وروسته له هغې ډېرې شوې، چې د هوټلونو له کړکیو یې پر سپینو پاڼو لیکل کړي وو او له خلکو یې د مرستې غوښتنه کړې وه.
د نړۍوال قانون له مخې، هغه کسان چې له جګړې، شکنجې یا د ګواښونو له کبله خپل هېوادونه پرېږدي حق لري چې د پناه غوښتنې وکړي.
هغه مهال چې دغو کډوالو خپلو هېوادونو ته د ستنېدو مخالفت وکړ، دوی د پانامې او کولمبیا پولې ته نږدې یوه پنډغالي ته ولېږدول شول.
دغو کډوال هلته له ټلېفوني اړیکو او حقوقي اړیکو څخه په اونیو، اونیو بې برخې پاتې شوي دي.
حیات الله او نورو خوشې شویو کډوالو وویل، چې دوی نشي کولای بېرته خپلو هېوادونو ته ستانه شي.
حیات الله چې په افغانستان کې له هزاره توکم څخه دی؛ ځان بې دینه ګڼي او وایي، افغانستان ته بېرته تګ ورته د مرګ معنا لري.
هغه وویل: «زه پاکستان، ایران او نورو هېوادونو ته ولاړم؛ خو هیچا راته ویزه رانکړه، نو بیا امریکا ته لاړم. هلته مې پناه وغوښته؛ خو رد شوه».
حیات الله زیاته کړه: «زما یوازینۍ هیله ازادي وه؛ خو هغوی دا چانس رانکړ».
د هغه په ګډون نورو کډوالو شکایت وکړ، چې په پنډغالي کې یې خواړه کم وو، هوا ګرمه وه او چارواکو ورسره بد چلند کاوه.
د پانامې چارواکو دغه تورونه رد کړي؛ خو خبریالانو ته اجازه نه ورکول کېږي، چې د کډوالو پنډغالي ته لاړ شي.
نړۍوالې مرستندویه ادارې وايي، دوی هڅه کوي د هغو کډوالو لپاره درېیم هېواد پیدا کړي چې بېرته خپلو هېوادونو ته ستنېدل نه غواړي؛ خو پانامې ویلي، خوشې شویو کډوالو دغه مرسته رد کړې ده.
د حیات الله په وینا: َ«ما څو ځله وغوښتل، چې په پانامه کې پناه واخلم؛ خو راته وویل شول چې پناه منونکي نه دي».
د پانامې د بهرنیو چارو مرستیال وزیر کارلوس روییز-هرناندز ویلي، هېڅ کډوال نه غواړي دلته پاتې شي او ټول بېرته امریکا ته تلل غواړي.