د پښتونخوا په چارسده کې د دوکان مخ ته د کټ اېښودو پر سر نښته کې ۵ کسان ووژل او ۲ ژوبل شول
د پښتونخوا د چارسدې په ترنابکې د دوکان مخ ته د کټ اېښودو پر سر د دوو ډلو ترمنځ د نښتې له امله ۵کسان ووژل او ۲نور سخت ژوبل شول.
د پښتونخوا د چارسدې په ترنابکې د دوکان مخ ته د کټ اېښودو پر سر د دوو ډلو ترمنځ د نښتې له امله ۵کسان ووژل او ۲نور سخت ژوبل شول.
ځايي پولیسو هم منلې چې شخړه د یوه دوکان مخې ته د کټ د ایښودو پر سر شوې ده.
پېښه پسې پولیس او د ژغورنې ډلې سیمې ته ورسېدلې مړي یې د طبي معایناتو لپاره او ټپیان یې د درملنې لپاره د چارسدې مرکزي روغتون ته لېږدولي دي.
پولیسو ویلي د پېښې پلټنې روانې دي او د تورنو کسانو د نیولو لپاره چاپې وهل کېږي.
د سیمې امنیت ته په کتو اضافي ځواکونه ځای پر ځای شوي ترڅو د هر ډول نورې شخړې مخه ونیول شي.
د پاکستان پیپلز پارټۍ د پښتونخوا اسمبلۍ غړي احمد کنډي د اسمبلۍ په غونډه کې یو پرېکړه لیک جمع کړی، چې پکې له مرکزي حکومت د تورخم بندر د ژر تر ژره پرانیستلو غوښتنه شوې ده.
په قرارداد کې راغلي چې تورخم د پاکستان او افغانستان تر ټولو مصروفه لار ده، خو له تېرو ۱۶ورځو راهیسې د هر ډول تګ راتګ لپاره بنده شوې او له امله یې دواړو خواوو ته عام ولس او سوداګرۍ ته دروند زیان اوښتی.
احمد کنډي په پرېکړه لیک کې ویلي چې د تورخم بندیدو له امله نه یوازې هره ورځ میلیونونه افغانۍ تجارتي زیان کېږي، بلکې عام ولس ته هم سختې ستونزې پیدا شوې دي.
د نوموړي په خبره، د بندر د بندیدو له کبله سوداګرو ټرانسپورټرانو او نورو کاروباري خلکو ته نه جبرانېدونکی تاوان اوښتی او همداراز ګڼ کسان د سرحد دواړو خواو ته بند پاتې دي.
په قرارداد کې د پښتونخوا حکومت ته سپارښتنه شوې چې له مرکزي حکومت سره اړیکه ونیسي او ژر تر ژره د بندر پرانستلو لپاره لازم ګامونه پورته کړي، ترڅو دواړو هېوادونو ترمنځ تجارتي فعالیتونه بیا پیل شي.
د تورخم د لارې خلاصولو لپاره پرون د دواړو غاړو قومي مشرانو او سوداګرو جرګې هم د دواړو خواوو ترمنځ د دوو ورځو اوربند وکړ.
ویل کېږي کابل کې هم ځینې سوداګرو نن له طالب چارواکو سره لیدلي او ترې غوښتي یې دي چې د لارې خلاصېدو هڅې وکړي.
د اسراییل اورشلیم پوسټ ورځپاڼه وايي، د اسپانیا پولیسو ۱۱ پاکستاني وګړي د پاکستان طالبانو غورځنګ سره د اړیکو په شک نیولي دی. د پولیسو څېړنې ښيي چې نیول شویو کسانو اروپا کې د خپلو ملګرو د هڅولو او مهمو هدفونو په نښه کولو لپاره منظمې ټلیفوني اړیکې کارولې.
اورشلیم پوسټ نن د دې خبر خپرولو سره د دې کسانو د نیولو کره نېټه نه ده یاده کړې.
دا رسنۍ د اسپانیا ملي پولیسو په حواله وايي، په دې ۱۱ کسانو کې لس په بارسلونا او یو هم د ایټالیايي پولیسو په مرسته په هغه هېواد کې نیول شوی د.
د اسپانیايي چارواکو په خبره، دا په تېرو دریو کلونو کې د ورته کسانو د نیولو دریم ځل دی چې ټول شمېر یې ۳۰ کسانو ته رسېږي.
اوریشلم پوسټ د اسپانیايي رسنیو په حواله وايي، چې له نورو سره د اړیکو لپاره یو ټلیفوني چینل د ښځو له خوا اداره کېده، چې د دې چینل پر پراخولو سربېره یې د کسانو موندلو کې هم کارند رول درلود.
پاکستانۍ رسنۍ خراسان ډایري خبر ورکړی، چې د خیبرپښتونخوا په کوهاټ کې نامعلومه وسلهوالو د ترهګرۍ ضد دوه پولیس په ډزو وژلي دي.
د کوهاټ ولسوالۍ د ځایي پولیسو په وینا،دغه پېښه په نانډه بند سیمه کې شوې ده.
پولیسو زیاته کړې، چې په وژل شویو کې یو تن د پولیسو افسر او بل یې ساتونکی پولیس دی.
لاتراوسه د دغې پېښې پړه کومې ډلې پر غاړه نده اخیستې.
له بل پلوه بیا په پنجاب کې د تراویح لمانځه پر مهال په ډزو ۳ تنه وژل شوي دي.
د جیو نیوز د راپور له مخې، د پنجاب په نارووال ولسوالۍ کې تېره شپه د تراویح د لمانځه پر مهال د ډزو له امله ۳ تنه وژل شوي دي.
د پنجاب پولیسو جیو نیوز ته د دغې پېښې پخلی کړی او ویلي یې دي، چې په وژل شویو کسانو کې یو تن یې چې عمران نومېږي؛ د خپلو ورورو لهخوا په وسلهوالو د پیسو په بدل کې وژل شوی دی.
د پولیسو په وینا، په لومړنیو څېړنو کې څرګنده شوې چې د وژل شوي کس ورور زمان نومېږي چې اوسمهال په کاناډا کې اوسېږي.
پولیسو دا هم ویلي، چې دغه وسلهوال د وزیرستان اصلي اوسېدونکي دي.
د نارووال پولیسو مشر طیب حفیظ چیما وایي، د وژل شوي عمران او د هغه د ورور زمان ترمنځ د موټرو د یوه تمځای د مالکیت پر سر پخوانۍ شخړه روانه وه.
طیب حفیظ زیاته کړي، چې د دغو وروڼو په تړاو د دوی د پولیسو په مرکز کې له پخوا ځینې قضیې ثبتې شوې وې.
د پاکستانۍ ورځپاڼې «ده نیوز The News» د راپور له مخې، پاکستان پرېکړه کړې چې په دغه هېواد کې د ملګرو ملتونو او د دوی له حکومت سره ثبت ۲.۱ مېلیونه افغان کډوال په بېلابېلو پړاوونو کې بېرته خپل هېواد ته ولېږي.
بې اسناده افغان کډوالو ته خبرداری ورکړل شوی، چې د مارچ میاشتې تر ۳۱مې نېټې دغه هېواد پرېږدي.
اوسمهال د ملګرو ملتونو له ثبت شویو کډوالو پرته سلګونه زره نور افغان کډوال په ناقانونه توګه دغه هېواد کې مېشت دي، چې د پاکستان د پرېکړې له مخې په لومړي پړاو کې به د دوی د اېستل کېدو لړۍ چټکه کړي او که د مارچ میاشتې تر پایه په خپله خوښه خپل هېواد ته ستانه نشي؛ نو په زور به یې وباسي.
د «ده نیوز» د راپور پر بنسټ، په ۲۰۲۳ کې ځیني کډوال د «داوطلبانه ستنېدو» پروګرام له لوري خپل هېواد ته ستانه شوي دي.
په پاکستان کې د ملګرو ملتونو د کډوالو عالي کمېشنرۍ ویاند قیصر افریدی وایي:« له ۲.۱ مېلیونه افغان کډوالو څخه ۱.۳ مېلېونه کسان د POR کارت لرونکي دي، چې د افغان کډوالو ۵۲سلنه برخه جوړوي او ډېری یې په خېبر پښتونخوا کې مېشت دي».
نوموړي زیاته کړه، چې شاوخوا ۸۰۰ زره افغانان د ملګرو ملتونو د ACC کارت لرونکي دي چې د دوی له ډلې یې هم زیاتره په خېبر پښتونخوا کې ژوند کوي.
د POR کارتونه په ۲۰۰۶ کال کې د ملګرو ملتونو د کډوالو عالي کمېشنرۍ په همکارۍ افغان کډوالو ته ورکړل شول او د ACC کارتونه بیا په ۲۰۱۷ کال کې د پاکستان د «ملي عمل پلان (NAP)» تر چتر لاندې ووېشل شول.
پاکستان له نږدې پنځه لسیزو راهیسې د مېلیونونو افغانانو کوربه پاتې شوی دی.
که څه هم په وروستیو کلونو کې سلګونه زره افغانان خپل وطن ته ستانه شوي؛ خو لا هم ۲.۱ مېلیونه افغانان د خیبر پښتونخوا او نورو ایالتونو په بېلابېلو سیمو کې ژوند کوي.
پاکستاني چارواکو د مارچ ۳۱مې وروستۍ نېټه ټاکلې، چې له مخې یې باید ټول «بې اسناده» افغانان او د ACC کارت لرونکي کسان د پاکستان خاوره پرېږدي.
هغه زرګونه افغانان چې په پاکستان کې زېږېدلي او هېڅکله افغانستان ته نه دي تللي؛ اوس د روژې میاشتې سره سم د دغه ضربالاجل له امله د خپل راتلونکي په اړه ژورې اندېښنې لري.
پېښور د خېبر پښتونخوا یو له هغو ښارونو دی، چې د افغان کډوالو شمېر پکې خورا زیات دی چې پکې لوی کاروبارونه او سوداګرۍ هم لري.
دوی د خېبر پښتونخوا له خلکو سره لوی شوي او څنګ په څنګ یې ورسره له ماشتوبه ژوند کړی دی.
تېر کال د پاکستان حکومت یوازې د «بې اسنادو» بهرنیانو لپاره (د اکټوبر ۳۱مه) وروستۍ نېټه ټاکلې وه، چې ورپسې ګڼ شمېر بې اسناده افغانان د تورخم پر ګډون پر ځینو نورو لارو د ډیورنډ کرښې هغې غاړې خپلو سیمو ته ستانه شول.
پاکستاني پولیسو له تېرو درېیو میاشتو راهیسې په اسلام اباد کې دروازه په دروازه د ناقانونه افغانانو د نیول کېدو لپاره عملیات پیل کړي؛ خو په پلازمېنه کې ډېری هغه افغانان مېشت دي، چې د طالبانو تر واکمنۍ وروسته یې ژوند له ګواښ سره مخ و او د لوېدیځو هېوادونو د پناه غوښتنو پسې یاد هېواد ته تللي دي.
د پاکستان حکومت دغو افغانانو ته هم خبرداری ورکړی، چې د مارچ میاشتې وروسته دې اسلام اباد او راولپندۍ ښارونو څخه ووځي او په نورو هېوادونو کې دې مېشت شي.
د یاد هېواد بهرنیو چارو وزیر اسحاق ډار لا ویلي، د هغو افغانانو د اېستل کېدو په اړه هم فکر کوي چې لوېدیځو هېوادونو او امریکا یې د بیا مېشتېدو غوښتنلیکونه رد کړي دي.
د پاکستان په کراچۍ ښار کې د افغان کډوالو په کمپ کې د چت د نړېدو له امله د خېبرپښتونخوا شپږ نجونې مړې شوي، چې پنځه خوېندې او یوه د دوی خپلوانه وه. د دغه چت د رغېدو چارې روانې وې چې ونړېد.
چارواکو د یکشنبې په ورځ وویل، په دغه پېښه کې د دوو ماشومانو په ګډون څلور تنه نور ټپیان شوي هم دي، چې د يوه ټپي روغتيايي حالت د اندېښنې وړ بلل شوى دى.
چارواکي د چت د نړېدو احتمالي لامل د ساختماني موادو دروند بار په ګوته کړی دی.
پاکستاني چارواکو دغه راز ویلي، چې د افغان کمپ په یوه کور کې د کور چت راپرېوتلی او په پایله کې یې د یوې کورنۍ ۱۰ غړي تر خاورو لاندې شوي دي.
د دوی په خبره، د ژغورنې د هڅو په پایله کې څلور ماشومان مړه شوي، خو دوه نورې ځوانې نجونې په روغتون کې مړې شوې دي.
هغه يادونه وکړه، چې که څه هم پېښه په افغان کمپ کې شوې خو قربانيان يې افغان کډوال نه وو.
دوی په اصل کې د خېبر پښتونخوا د بنو اوسېدونکي وو.