د امریکا متحدهایالاتو د بهرنیو چارو وزیر مارکو روبیو وايي، چې د چین حکومت پر بېلابېلو هېوادونو جدي فشار اچوي څو ایغور مسلمانان او نور قومي اقلیتونه بېرته دغه هېواد ته وسپاري.
نوموړي د جمعې په ورځ (د مارچ ۱۴مه) د خپلې اېکسپاڼې له لارې خبرداری ورکړی چې چین ته د دغو کسانو د سپارلو په صورت کې به هغوی له شکنجې او یا جبري ورکېدو سره مخ شي.
د امریکا د بهرنیو چارو وزارت د ټایلېنډ لهخوا چین ته د ۴۰ ایغورانو سپارلو ته په اشارې زیاته کړې، هېواد به پر ټولو هغو دولتي چارواکو د ویزو د ورکړې بندیز ولګوي چې په دې پېښه کې ښېکل دي.
ورته مهال، مارکو روبیو له ټایلېنډ پرته د هغو هېوادونو نومونه نه دي په ډاګه کړي چې د چین لهخوا د ایغور مسلمانانو د سپارلو تر فشار لاندې دي.
د متحدهایالاتو د بهرنیو چارو وزارت دغه اقدام په چین کې د بشري حقونو له سرغړونو سره د مبارزې او په دغه هېواد کې د ایغورانو او نورو لږکیو د ملاتړ لپاره د واشنګټن قوي دریځ څرګندوي.
د یادونې ده چې تېرکال د جو بایډن دولت هم په نړۍ کې د مذهبي ازادۍ په تړاو په خپل وروستي کلني راپور کې چین او هند د مسلمانانو له حقونو څخه پر «سرغړونې» تورن کړي وو.
د بشري حقونو د څار سازمان په ګډون د یو شمېر نړۍوالو بنسټونو د راپورونو پر بنسټ، شاوخوا یو میلیون ایغور مسلمانان په چین کې له ۳۰۰ څخه تر ۴۰۰ بندخونو ځایونو کې ساتل کېږي.
د بشري حقونو په چارو کې دغه فعال نړۍوال بنسټونه د چین حکومت د مسلمانانو پر نسلوژنې، شکنجې او ځورونې تورنوي.
