د امریکا ولسمشر د جمعې په ورځ یو اجرایوي فرمان لاسلیک کړ، چې له مخې یې د امریکا غږ او شپږو نورو فدرالي ادارو فعالیتونه محدودېږي. ډونالډ ټرمپ امریکا غږ او شپږو نورو ادارو ته امر کړی، چې د امکان تر حده خپلې دندې، واکونه او کارکوونکي کم کړي.
دا اجرايوي فرمان د هغو سازمانونوپر فعالیتونو، چې د موزیمونو او کتابتونونو په تمویل او د هغو موسیسو چې د بې کوره کېدو سره د معاملو په برخه کې کار کوي هم اغيز کوي
په فرمان کې راغلي: «دا حکم د فدرالي بیوروکراسي غیر ضروري عناصرو کمولو لپاره د ولسمشر د هڅو برخه ده.»
ټرمپ چې د خپلې ولسمشرۍ په لومړۍ دوره کې یې له «امریکا غږ» سره ترینګلتیا درلوده، د دې رسنۍ د نوي مشر په توګه یې پخوانی خبریال او خپل یو نژدې متحد کیري لیک ټاکلی دی.
لیک په مکرر ډول اصلي رسنۍ د ټرمپ ضد تمایلاتو په درلودلو تورنې کړې.
امریکا غږ، چې د نړۍ په ۴۰ ژبو کې فعالیت کوي د «متحده ایالاتو د نړیوالو رسنیو د اژانس» لخوا اداره کیږي.
دغه اژانس د ازادې اروپا راډيو او د ازادې اسیا رډيو تمويل هم کوي.
د نړيوالو رسنيو اژانس د دې ترڅنګ د «فدرالي منځګړیتوب او پخلاینې خدمت، د څېړونو لپاره د ووډرو ویلسن نړیوال مرکز، د موزیم او کتابتون خدماتو انسټیټیوټ، د بې کوره شویو لپاره د متحده ایالاتو فدرالي شورا، د ټولنې پراختیا مالي بنسټونو فنډ، او د اقلیت سوداګرۍ پراختیا ادارې» هم په نښه کړې دي
د حکم له مخې، دا ادارې باید ټول هغه فعالیتونه ودروي، چې د کانګرس لخوا تصویب شوي قوانینو کې نه وي تعریف شوي او همدارنګه «د دوی قانوني دندې او اړونده پرسونل لږ تر لږه د اړتیا تر حده کم کړي.»
دا اقدام د فدرالي بیوروکراسي د جوړښت د بدلون لپاره د ټرمپ وروستی ګام دی.
دا پروژه په عمده توګه د ایلان ماسک او د هغه د «دولتي موثریت دفتر(DOGE) » ملکیت دی.
تر اوسه پورې، دا هڅې د ۲.۳ میلیون فدرالي ملکي کارمنانو ترمنځ د ۱۰۰ زره زیاتو دندو وړاندیز شوي کمښت، د بهرنیو مرستو بندولو او د زرګونو پروګرامونو او قراردادونو لغوه کولو پایله لري.
ځینو جمهوري غوښتونکي له اوږدې مودې راهیسې (امریکا غږ) او نورې دولتي رسنۍ د محافظه کارانو په وړاندې په تعصب تورنوي.
تېره میاشت، ایلان ماسک په اېکس پاڼه کې د «امریکا غږ» او « ازادې راډیو» د بشپړ بندولو غوښتنه وکړه او ادعا یې وکړه، چې دا رسنۍ د خلکو پيسې ضایع کوي.
د محافظه کاره سیاسي کنفرانس (CPAC) په ترڅ کې کېري لیک د امریکا غږ سره په مرکه کې د اصلاحاتو د اړتیا د دفاع په ترڅ کې وویل، هغه پوهیږي چې ولې ځینې خلک غواړي دغه رسنۍ په بشپړه توګه منحل شي؛ خو هغه باور لري چې دا اداره ښه کولی شي.
