د شمالي مقدونیې په یوه شپني کلب کې اورلګېدنې ۵۱ کسان مړه کړي دي
د مقدونیې د کورنیو چارو وزیر ویلي، د شمالي مقدونیې په کوچاني ښارګوټي کې په یوه شپني کلب کې د اور لګېدنې له امله لږ تر لږه ۵۱ کسان مړه شوي او تر ۱۰۰ ډېر بیا ټپیان دي.
د مقدونیې د کورنیو چارو وزیر ویلي، د شمالي مقدونیې په کوچاني ښارګوټي کې په یوه شپني کلب کې د اور لګېدنې له امله لږ تر لږه ۵۱ کسان مړه شوي او تر ۱۰۰ ډېر بیا ټپیان دي.
د شمالي مقدونیې دولتي خبري اژانس راپور ورکړی، چې د دغه هېواد د کورنیو چارو وزیر پانچ توشکوفسکي د یکشنبې په سهار په یوه خبري کنفرانس کې د تلفاتو خبر ورکړ.
هغه زیاته کړې، چې ټپیان د سکوپجي ښار روغتونونو او کلینیکونو ته وړل شوي دي.
د شمالي مقدونیې لومړي وزیر هریستیجان مېکوسکي وویل، چې دا یوه سخته او غمجنه ورځ ده.
هغه زیاته کړې، چې په دغه اورلګېدنه کې د ګڼو ځوانانو مړینه نه جبرانېدونکې ده.
سیمهییزو رسنیو راپور ورکړی، چې اورلګېدنه د کوچاني په "پلس" شپني کلب کې شوې ده.
ویل کېږي، چې د اورلګېدنې پرمهال شاوخوا ۱۵۰۰ کسان د یوه کنسرت لپاره په دغه کلب کې راټول شوي وو.
د امریکا متحده ایالاتو مرکزي قوماندې سینټکام ویلي، چې د عراق استخباراتي او امنیتي ځواکونو سره د ګډو عملیاتو په ترڅ کې یې د داعش ډلې چیچنیایي غړې ام حسین نیولې ده.
سېنټکام زیاتوي، چې نیول شوې ام حسین د داعش ډلې د بهرنیو ترهګریزو عملیاتو مشر ابو خدیجه چې بشپړ نوم یې عبدالله مکي مصلح الرفيعي و؛ مېرمن ده.
سېنټکام ویلي، چې په دغو عملیاتو کې د داعش دوه نور غړي هم نیول شوي او دا یې د داعش شبکې د له منځه وړلو په برخه کې د عراق سره د ژمنتیا نښه بللې ده.
چیچنیایي ام حسین د عبدالله مکي مصلح الرفاعي مېرمن ده، چې د داعش تر ټولو په لوړه کچه پرېکړه کوونکی مشر او د نړۍوالو عملیاتو، لوژستیک او پلان جوړونې مسول و.
نوموړي د دغې ډلې د نړۍوال سازمان د مالي چارو د یوې مهمې برخې رهبري کوله، چې تېره ورځ په یوه هوایي برید کې د امریکایي ځواکونو لهخوا په نښه او ووژل شو.
د عراق لومړي وزیر محمد شیعه السوداني وویل، مصلح الرفاعي په عراق او ټوله نړۍ کې یو له خورا خطرناکو ترهګرو څخه و.
متحده ایالاتو په۲۰۲۳ کال کې عبدالله مکي مصلح الرفاعي د داعش د مشر په توګه د نړۍوال ترهګر په توګه د ترهګرو په تور نوملړ کې شامل کړ.
د امریکا د مرکزي قوماندې قوماندان مایکل اېریک کوریلا وویل:« موږ به د خپل هېواد او د متحده ایالاتو د متحدینو او سیمهییزو همکارانو د دفاع لپاره د ترهګرو لټون ته دوام ورکړو.»
قوماندان اېریک وویل، دا عملیات د امریکا او د هغې د سیمهییزو ملګرو لهخوا په عراق کې د ترهګرو ډلو سره د مبارزې او د متحده ایالاتو او متحدینو ګټو په وړاندې د بریدونو د خپرېدو د مخنیوي لپاره د پراخو هڅو یوه بېلګه ده.
د بلوچستان ایالت په نوشکي ولسوالۍ کې ځانمرګي بریدګر له چاودېدونکو توکو ډک موټر د پاکستاني پوځیانو پر کاروان وربرابر کړ، چې د چاودنې په پایله کې یې ۱۱تنه وژل شوي او ۲۱ نور ټپیان دي.
د پاکستانۍ رسنۍ خراسان ډایري د راپور له مخې، د پاکستاني پوځیانو دغه کاروان چې پکې اوه ټرانسپورټي بسونه او دوه موټرې شاملې وې؛ له کوټې څخه د بلوچستان تفتان سیمې ته پر لاره و.
د راپور پر بنسټ، تر برید وروسته وسلهوالو د پاکستاني ځواکونو پر یو موټر توغندی وېشتی.
په پېښه کې د وژل شویو او ټپیانو د هویت په تړاو څه نه دي ویل شوي؛ خو زیاته شوې چې ټپیان یو سیمهییز روغتون ته لېږدول شوي دي.
د بلوڅو ازادۍ غوښتونکي پوځ د دغه برید مسوولیت منلی او ادعا یې کړې، چې د دوی د مجید لېوا یوه ځانمرګي بریدګر دغه برید کړی دی.
بلوڅ بېلتون پاله وسلهوالو ادعا کړې، چې په دغه برید کې یې نږدې «۹۰ تنه پاکستاني پوځیان» وژلي دي؛ خو لا تر اوسه د پاکستان پوځ د دغه ادعا په تړاو څه نه دي ویلي.
د بلوڅ ازادۍ غوښتونکو پوځ څو ورځې وړاندې د بلوچستان په بولان ایالت کې د جعفر اېکسپرېس پر رېل ګاډي برید کې ۳۰۰ پاکستاني پوځیان تر برمته کېدو وروسته ووژل.
د پاکستان پوځ بیا ویلي، چې ټول برید کوونکي یې وژلي وو او لسګونه مساپر یې هم د بلوڅ بېلتون پالو له منګولو ژغورلي.
بلوڅ بېلتون پالو په دې وروستیو کې خپل فعالیتونه پراخ کړي او د پاکستان پوځ ادعا لري، چې د رېل ګاډي د برید پر مهال د دغه ډلې بریدګر په افغانستان کې له خپلو مشرانو سره په اړیکه کې وو.
په بلوچستان کې بیا په یوې بله پېښه کې وسلهوالو یوه ښځه په ډزو وژلې ده.
د ځايي رسنیو د معلوماتو له مخې ناپېژانده وسلهوالو پر یو موټر ډزې وکړې او هڅه یې کوله یو ځایي وګړي وتښتوي؛ خو هغې مېرمنې یې مخنېوی کاوه، چې وسلهوالو په ډزو ووژله.
په بلوچستان او خېبر پښتونخوا کې په بې سارې توګه نا امنۍ مخ په پراخېدو دي او د پاکستان حکومت یې پړه پر افغان طالبانو ور اچوي.
په افغانستان کې واک ته دطالبانو له رسېدو وروسته داسې ښکاري، چې په سیمه کې وسلهوال فعالیتونه مخ په ډېرېدو دي او «ټيټيپي» بیا پښتونخوا کې خپل فعالیتونه پراخ کړي دي.
د امریکا ولسمشر ډونالډ ټرمپ د شنبې په ورځ د یمن پر حوثي وسلهوالو د پراخو هوايي بریدونو امر ورکړ، چې پکې لږ تر لږه ۳۱ کسان وژل شوي دي. د ایران ملاتړ لرونکې دغه ډله وروسته له هغې په نښه شوه، چې د سره سمندر پر سوداګریزو بېړیو یې بریدونه وکړل.
د حوثیانو تر واک لاندې سرچینو رویټرز ته ویلي، چې د امریکا په دغو تازه هوایي بریدونو کې لږ تر لږه ۳۱ کسان وژل شوي دي.
ټرمپ همداراز ایران ته چې د حوثیانو ستر ملاتړی ګڼل کېږي، خبرداری ورکړی چې په سملاسي توګه باید د دغه ډلې له ملاتړ څخه لاس واخلي.
نوموړي وویل:« که ایران امریکا ته ګواښ پېښ کړي، موږ به یې پوره مسوول وګڼو او دا ځل به زموږ چلند کې نرمښت نه وي».
یو امریکايي چارواکي رویټرز ته ویلي، چې دغه بریدونه ښايي څو اوونۍ دوام وکړي او دا د ټرمپ د واکمنۍ له پیله تر ټولو لوی پوځي عملیات ګڼل شوي دي.
د حوثیانو تر واک لاندې روغتیا وزارت ویلي، چې د امریکا په بریدونو کې « ۱۳ ملکي کسان وژل شوي او ۹ نور ټپیان» شوي دي.
د المسیره ټلوېزیون د راپور له مخې، په صعده ولایت کې هم د امریکا د هوايي بریدونو له امله ۱۱ تنه چې ۴ ماشومان او یوه ښځه پکې شامل دي هم وژل شوي او ۱۴ تنه ټپیان دي.
حوثي ډلې دغه بریدونه «جنگي جنایت» بللی او ویلي یې دي، چې د هر ډول تاوتریخوالي ځواب به په ورته ورکړي.
د حوثیانو غبرګون او د سره سمندر وضعیت
حوثیان چې د یمن ګڼې سیمې یې تر ولکې لاندې دي، له ۲۰۲۳ کال راهیسې د سوداګریزو بېړیو پر ضد یې لسګونه بریدونه ترسره کړي دي.
دغه بریدونو نړۍوالې سوداګرۍ ته جدي ګواښونه پېښ کړي او امریکا یې اړه کړې، چې د حوثیانو د توغندیو او بېپیلوټه الوتکو د مخنیوي لپاره پراخ پوځي عملیات وکړي.
د امریکا دفاع وزارت (پینټاګان) ویلي، چې له ۲۰۲۳ راهیسې حوثیانو « ۱۷۴ ځله د امریکا پر پوځي بېړیو او ۱۴۵ ځله پر سوداګریزو بېړیوو» بریدونه کړي دي.
د امریکا د دفاع وزیر پېت هګزت وویل: «موږ به د حوثیانو بریدونه ونه زغمو او ایران باید پوه شي چې موږ کرار ناست نه یو».
ټرمپ هم خبرداری ورکړی:« که حوثیان خپل بریدونه ودروي، ښه به وي که نه نو داسې اور به پرې خوشې کړو چې لا یې نه دی لیدلی».
د ایران غبرګون
د ایران د بهرنیو چارو وزیر عباس عراقچي د امریکا بریدونه غندلي او ویلي یې دي:« امریکا د ایران د بهرني سیاست د کنټرول صلاحیت نه لري.»
نوموړي پر اېکس لیکلي:« امریکا باید د اسراییل له ملاتړه لاس واخلي او د یمن د خلکو وژنه ودروي».
د ایران چارواکو اندېښنه ښودلې، چې د امریکا وروستي اقدامات به د ایران پر ضد کورني اعتراضونه هم زیات کړي.
بل خوا د امریکا د بهرنیو چارو وزیر مارکو روبیو د روسیې له وزیر سرګي لاوروف سره خبرې کړې، چې ښيي امریکا غواړي له روسیې سره اړیکې تنظیم کړي.
دا په په داسې حال کې ده، چې مسکو د اوکراین په جګړه کې د ایران وسلو ته په ځانګړې ډول توغندیو او د ډرون الوتکو مرستې ته اړتیا لري.
افغانستان انټرنشنل ته سرچینو ویلي، په تېرو ۲۴ ساعتونو کې په خېبر پښتونخوا او بلوچستان ایالتونو کې نږدې ۳۷ بریدونه شوي چې پکې وسلهوالې نښتې، بمي چاودنې او د لاسي بمونو پېښې شاملې دي.
د سرچینو په خبره، به دغو بریدونو کې یوازې پښتونخوا کې ۲۳ کوچني او لوی بریدونه شوي، چې له ډلې یې ۹ یوازې بمي چاودنې دي.
په دغو چاودنو کې یوه هم د پېښور په اورمړو سیمه کې د شنبې مازیګر په یوه ځايي جومات کې پر مشهور دیني عالم مفتي منیر شوې ده. په یاده پېښه کې نوموړی وژل شوی او درې تنه نور ټپیان دي.
سرچینې وايي، تېره شپه ناوخته نامعلومه وسلهوالو د خېبر پښتونخوا په خېبر ولسوالۍ کې د مېچنۍ دروازې د پولیسو پر پوستې وسلهوال برید کړی و چې نږدې یو ساعت یې دوام وکړ.
په دغه برید کې یو پولیس وژل شوی او وسلهوال په شاه تنبول شوي دي.
هممهاله بیا په کرک ولسوالۍ کې د پولیسو پر یوې حوزې وسلهوالو بریدونه کړي؛ خو د مرګ ژوبلې کره جزییات یې لا نشته.
د سرچینې د معلوماتو له مخې، د باجوړ ولسوالۍ د پولیسو پر یو موټر د وسلهوالو برید کې یو تن پولیس او درې ملکیان ټپیان شوي دي.
په خېبر پښتونخوا او بلوچستان کې نا امنۍ مخ په پراخېدو دي، چې له امله یې د پاکستان د لومړي وزیر په ګډون پوځي چارواکي سخت وارخطا شوي دي.
بلوڅ بېلتون پالو په بلوچستان کې څو ورځې وړاندې د جعفر اېکسپرېس نومې پر یوه رېل ګاډي لوی وسلهوال برید وکړ، چې د ادعا له مخې یې پکې د پاکستان د امنیتي ادارو د ۳۰۰کارکوونکي تر برمته کېدو وروسته وژلي دي.
بل خوا د پاکستان پوځ بیا ویلي، چې د بلوڅ بېلتون پالو یاد برید یې په شاه تنبولی و او لسګونه وسلهوال یې هم ورته وژلي دي.
بلوچستان کې تر ډېره بلوڅ بېلتون پاله جنګي ډلو خپل فعالیتونه پراخ کړي او په خېبر پښتونخوا کې بیا «ټيټيپي» وروسته تر هغې سترګې وکړې، چې افغان طالبانو پر کابل واک ترلاسه کړ.
د «ټيټيپي» جنګیالي هره ورځ د پښتونخوا په بېلابېلو سیمو کې له پاکستاني پوځیانو سره نښتي وي او د فعالیتونو د پراخېدو ادعاوې کوي.
پاکستان بیا افغان طالبانو ته ګوته نېسي، چې د «ټيټيپي» په ګډون یې د دوی ضد وسلهوالو ته په افغانستان کې پناه ځایونه ورکړي او له هماغه ځایه پر دوی بریدونه پلانوي؛ خو افغان طالبان بیا نه یوازې چې دا ادعاوې ردوي بلکې وايي، روانه نا امني د پاکستان کورنۍ ستونزه ده.
د پښتونخوا سیاستوال د پاکستان پر مرکزي حکومت او پوځ نیوکه کوي، چې د ناسمو تګلارو له کبله یې پښتونخوا د جګړې په نامعلومه اور کې سوځي.
د پښتونخوا ملي عوامي ګوند د رهبرۍ شورا غړي حیدر خان هوتي تازه دا هم ویلي، چې پختونخوا کې وینې بهېږي؛ خو ایالتي حکومت سوله نه غواړي او سیاست کوي.
د امریکا د بهرنیو چارو وزیر مارکو روبیو ویلي، چې امریکا د سوېلي افریقا سفیر له دې هېواد څخه باسي. هغه دغه سفیر په «نژاد پرستۍ» تورن کړی او ویلي یې دي، چې هغه له ټرامپ څخه نه یوازې کرکه، بلکې د هغه د سیاست سره مخالفت لري.
د امریکا او سوېلي افریقا اړیکې له هغې وروسته خرابې شوې، چې ټرمپ د سویلي افریقا لپاره مالي مرستې بندې کړې.
د سوېلي افریقا د ولسمشرۍ او نړۍوالو اړیکو وزارت په دې اړه ویلي، چې دا اقدام خواشینونکی دی، خو دوی لا هم ژمن دي چې د متقابلې ګټو پر بنسټ اړیکې جوړې کړي او د دې موضوع په اړه به د ډیپلوماټیکو چینلونو له لارې خبرې وکړي.
روبیو د ښي اړخي ویب پاڼې "بریټبارټ" څخه یوه مقاله بیا خپره کړه، چې د سفیر په حواله یې ویلي وو، چې ټرمپ د سپین پوستو د برتري غورځنګ مشري کوي.
د امریکا د بهرنیو چارو وزارت ویاند د شنبې په ورځ وویل چې هغه باید د مارچ تر ۲۱مې پورې له دې هېواد څخه ووځي.
د امریکا د بهرنیو چارو وزارت یوه ویاند زیاته کړې، چې امریکا اوس د سوېلي افریقا پر سیاستونو په ځانګړي توګه د ځمکې، د سوېلي افریقا د روسیې او ایران سره د اړیکو پراختیا او د امریکا او ملګرو هېوادونو پر وړاندې د "تهاجمي دریځونو" په اړه بیا کتنه کوي.
رویټرز لیکلي، چې له افریقايي سفیر سره په اړیکه نیولو بریالي شوي نه دي.
د ټرمپ پر سیاستونو د سوېلي افریقا سفیر ابراهیم رسول له نیوکو وروسته د متحدهایالاتو د بهرنیو چارو وزیر پرون وویل، چې هغه نور په امریکا کې د هرکلي وړ نه دی او په وینا یې، یو «نامطلوب عنصر» ګڼل کېږي.
مارک روبیو وویل، چې د سوېلي افریقا سفیر د امریکا خلاف دریځ او له ولسمشر ټرمپ څخه کرکه لري.
په متحدهایالاتو کې د سوېلي افریقا سفیر ابراهیم رسول څو ورځې مخکې په جوهانسبرګ کې د بهرني سیاست په تړاو یوه کنفرانس کې د امریکا ولسمشر ډونالډ ټرمپ پر روانو سیاستونو سختې نیوکې کړې وې.
د هغه په وینا، ټرمپ په امریکا او ټوله نړۍ کې د سپینپوستو د غورهوالي غورځنګ مشري پر غاړه لري چې دغه غورځنګ د نړۍوال نظم، ملګرو ملتونو او جي ۲۰ ډلې په څېر بنسټونو ته سپکاوی دی.
ابراهیم رسول په خپلې وینا کې د سوېلي افریقا د املاکو مصادرې قانون پر وړاندې د ډونالډ ټرمپ د وروستیو سیاستونو او له ایران او حماس سره د دغه هېواد د اړیکو په تړاو هم خبرې کړې وې.