د پښتونخوا د وزيراعلی د عامه اړيکو سلاکار: پاکستان د ترهګرۍ اور کې سوځي
د خيبر پښتونخوا د وزيراعلی د اطلاعاتو او عامه اړيکو سلاکار بېرېسټر سيف ويلي، چې هېواد د ترهګرۍ په اور کې سوځي، خو غير قانوني مرکزي حکومت لا هم ناغېړې کوي.
د خيبر پښتونخوا د وزيراعلی د اطلاعاتو او عامه اړيکو سلاکار بېرېسټر سيف ويلي، چې هېواد د ترهګرۍ په اور کې سوځي، خو غير قانوني مرکزي حکومت لا هم ناغېړې کوي.
هغه پر مرکزي حکومت نيوکه وکړه، چې نه يې اغیزمنې ډيپلوماټيکې هڅې کړي او نه يې د دې حالت د کابو کولو لپاره کومه داخلي تګلاره جوړه کړې ده.
سیف همداراز ویلي، چې غیر قانوني فډرالي حکومت افغانستان د ترورېزم مسوول بولي، خو ډیپلوماټیکو خبرو ته زړه نه ښه کوي.
هغه زیاته کړه، چې له افغانستان سره د خبرو اترو لپاره استول شوي شرطونو ته تر اوسه ځواب نه دی ورکړل شوی.
سیف وایي، د پاکستان مرکزي حکومت نه له افغانستان سره خبرې کوي او نه هم خیبر پښتونخوا ته اجازه ورکوي، چې د ترهګرۍ د مخنیوي لپاره له افغانستان سره خبرې اترې وکړي.
نوموړي زیاته کړه، چې دغه هېواد د ترهګرۍ په اور كې سوځي خو بيا هم تش په نامه وزيراعظم شهبازشريف بې حسه تماشه كوي۔
د نوموړي په وینا، غیرقانوني مرکزي حکومت په خیبرپښتونخوا او بلوچستان کې ترهګري جدي نه ګڼي.
نوموړي له وفاقي حکومته وغوښتل، چې دا باید ومني چې پاکستان یوازې پنجاب نه دی.
سیف خبرداری ورکړ، چې که د ترهګرۍ پر ضد سمدستي او اغېزمن ګامونه پورته نه شي، نو دا اور به پنجاب او سند ته هم خپور شي.
