د امریکا د نیو میکسیکو په سوېل لوېدیځ کې په یوه پارک کې د ډزو له امله درې تنه وژل شوي او ۱۵ نور ټپیان شوي دي. د پېښې په تړاو څوک نه دي نیول شوي، خو پولیس وایي چې څېړنې روانې دي.
د لاس کروس پولیسو د فېسبوک په یوه بیان کې وویل: «دا پېښه نن سهار لس بجې د لاس کروز ښار په ینګ پارک کې شوې ده.»
چارواکو د وژل شویو او ټپیانو هویتونه نه دي په ډاګه کړي چې څوک دي او د کوم ځای اسېدونکي دي.
پولیسو ویلي، چې د دغه پېښې په تړاو تر اوسه څوک نه دي نیول شوي، مګر څېړونکي په فعاله توګه پېښه څاري او څېړنې روانې دي.
د قانون د نورو پلي کونکو په ګډون د متحده ایالاتو فدرالي استخبارات اېف بي ای او د نیو میکسیکو پولیس په څېړنو کې د لاس کروس له پولیسو سره مرسته کوي.
اسراییل د لبنان د راکټي بریدونو له شنډولو وروسته د شنبې په ورځ د دغه هېواد سوېلي سیمې په نښه کړي دي. دا بریدونه هغه اوربند له ګواښ سره مخ کوي، چې د اسراییل او د حزبالله ترمنځ د یو کلنې جګړې د پای ته رسېدو لامل شوی و.
دا شخړه د غزې د جګړې تر ټولو وژونکې پایله وه او د پولې دواړو خواوو ته د میاشتو ډزو وروسته د اسراییل سخت برید د حزب الله لوړپوړي قوماندانان، د دې ډلې ډېری وسلهوال او د دوی د وسلو ډېره برخه له منځه یوړه.
حزب الله د شنبې د ورځې د بریدونو مسوولیت رد کړ او ویې ویل، چې د توغندیو له بریدونو سره "هېڅ اړیکه نه لري" او اوربند ته ژمن پاتې دي.
دا په داسې حال کې ده، چې تر اوسه هېڅ ډلې د دې برید مسولیت نه دی منلی.
یوه اسراییلي چارواکي وویل، چې د هغه ډلې هویت چې راکټونه یې توغولي دي تایید شوی نه دی.
دغه چارواکي همداراز زیاته کړې، چې شپږ راکټونه توغول شوي وو، چې درې یې اسراییل ته ننوتل او شنډ شول.
د ورځې په وروستیو کې اسراییلي پوځ د حزب الله په اهدافو د بریدونو دویم پړاو اعلان وکړ.
د اسراییل د لومړي وزیر بنیامین نتنېاهو د بهرنۍ پالیسۍ سلاکار اوفیر فالک رویټرز ته ویلي: «موږ له لبنان څخه دا تمه لرو چې تړون ته دې پام وکړي.»
فالک وویل: «اسراییلي دفاعي ځواکونه به د اوربند د پلي کولو لپاره هر هغه څه وکړي، چې اړتیا ورته وي او ډاډ ترلاسه کړي چې زموږ ملکي وګړي په خوندي ډول بېرته خپلو کورونو ته ستانه شي.»
د اسراییل پوځ د شنبې په سهار وویل، چې دوی د لبنان له یوې ولسوالۍ څخه د پولې څخه شاوخوا شپږ کیلومتره شمال ته د اسراییل سرحدي ښار میتولا ته توغول شوي درې توغندي شنډ کړي دي.
دا د نومبر په میاشت کې د امریکا په منځګړیتوب د اوربند له پای ته رسېدو راهیسې د پولې دواړو خواوو ته دویم توغندی دی.
نتنیاهو پوځ ته امر کړی، چې د لبنان دننه د لسګونو ترهګريزو اهدافو پر ضد له ځواک څخه کار واخلي.
د امریکا ولسمشر ډونالډ ټرمپ اعلان کړی، چې د چین احتمالي کواښ ته په کتو سره د دغه هېواد د هوايي ځواک د لا پیاوړتیا لپاره به د بوینګ هوايي شرکت د نوي نسل جنګي جېټ الوتکو د جوړولو چارې پر غاړه واخلي.
د رویټرز خبري اژانس د راپور له مخې، د جمعې په ورځ ټرمپ په واشنګټن کې وویل، چې دغه جنګي جېټ الوتکه چې (F-47) نومېږي تر ټولو نورو الوتکو خورا پرمختللې او ډیره ویجاړونکې ده.
یاده الوتکه په سټلایټ ټیکنالوژۍ سمبال او تېرو پنځو کلونو کې یې ازماېښتي الوتنې هم ترسره کړې دي.
د امریکا د دفاع وزیر پېټ هېګسټ چې د ولسمشر ټرمپ څخه یې د ښو کړنو له امله جایزه ترلاسه کوله وویل، موږ خپلو متحدینو ته خورا روښانه او مستقیم ډول پیغام لېږو چې مونږ همدلته یو او هېڅ ځای ته نه ځو.
ورته مهال د متحده ایالاتو د هوایي ځواک مشر جنرال ډیویډ الوین وویل: «موږ به له دې جنګي الوتکې سره د عصري هوايي جګړې راتلونکي نسل تاریخ ولیکو.»
د اسوشیېټیډ پریس د راپور له مخې، دغه جګړه ییزې الوتکې به د بې پیلوټه الوتکو د یوې ډلې د قوماندان په توګه کار کوي چې اصلي دنده یې د چین او د امریکا د نورو سیالانو هوايي دفاعي سیسټمونو ته ننوتل دي.
په ورته وخت کې، د بوینګ شرکت د ځینو الوتکو د غورځېدلو او پر کارکونکو یې د برید له امله په دې وروستیو کلونو کې له ډیرو ننګونو سره مخ شوی.
د رویټرز په وینا، د دې قرارداد ارزښت سلګونه میلیارد ډالره اټکل شوی او د څو لسیزو لپاره به دوام وکړي.
رویټرز اژانس راپور ورکړی، متحده عربي اماراتو تابیا کړې، چې د راتلونکو لسو کلونو په اوږدو کې په امریکا کې ۱.۴ ټریلیونه ډالره پانګونه وکړي. دغه پانګونه به د مصنوعي ځېرکتیا، نیمه برېښنايي توکو، انرژۍ او تولیدي برخو کې ولګول شي.
سپینې ماڼۍ ویلي، چې دا هوکړه د امریکا ولسمشر ډونالډ ټرمپ او د متحده عربي اماراتو د ملي امنیت سلاکار شیخ طحنون بن زاید ال نهیان ترمنځ د ناستې پر مهال شوې ده.
سپینې ماڼۍ ټینګار کړی، چې به دې سره به د امریکا په اقتصاد کې د اماراتو د پانګونې کچه لا پسې زیاته شي.
رویټرز خبري اژانس د سپینې ماڼۍ د یوې سرچینې له قوله لیکلي، د دغه تړون تر ټولو مهمه برخه د امارات ګلوبل په د اوسپنې د یوې کمپنۍ پانګونه ده، چې په امریکا کې به د المونیم د ویلي کیدو نوې فابریکه هم جوړه کړي.
دا به د اوسپنې په برخه کې د تېرو ۳۵ کلونو په اوږدو کې د امریکا دننه تر ټولو لویه او مهمه پانګونه وي.
سپینې ماڼۍ هیله مندي ښودلې، چې له دې سره به د امریکا د اوسپنې داخلي تولید نږدې دوه برابره زیات شي.
متحده عربي امارات چې په نړۍ کې د تېلو له مخکښو تولیدونکو او د امریکا پخوانی امنیتي شریک ګڼل کېږي، په هڅه کې دی څو له واشنګټن سره خپلې اقتصادي اړیکې نورې هم پراخې کړي.
دغه هېواد هڅه کوي چې د مصنوعي ځېرکتیا په برخه کې ځان د نړۍ سرلاری کړي.
د بلوڅو د یووالي غورځنګ خبر ورکړی، چې د شنبې سهار د (وري دویمه) نېټه سهار مهال په بلوچستان ایالت کې د پاکستان امنیتي ځواکونو ډاکټر ماهرنګ بلوڅ او د هغې یو شمېر ملګري نیولي دي.
د یاد غورځنګ غړو ویلي، چې له تېرې ورځې راهیسې د بلوچستان ایالت په کویټې ښار کې د ډاکټر ماهرنګ په مشرۍ د بلوڅو د حقونو لپاره اعتراضیه ناسته پېل شوې چې د پاکستان امنیتي ځواکونو هڅه کوله چې خواره یې کړي.
داسې ادعا هم شوې، چې تېره ورځ هم پر دغه ناسته پاکستاني پولیسو ډزې کړي چې په پایله کې یې د دغه خوخښت دوه غړي وژل شوي دي.
ډاکټر ماهرنګ بلوڅ تر خپل نیول کیدو شپږ ساعته مخکې پر اېکس پاڼه د یوه دولس کلن هلک نهمت بلوڅ انځور خپور کړی او ادعا یې کړې، چې پاکستاني پولیسو د دوی پر اعتراضیه ناستې د برید پر مهال په ډزو کې وژلی دی.
د بلوڅو یووالي غورځنګ په خبرپاڼه کې ویلي، چې نن سهار پنځه نیمې بجې په کویټه کې د دوی پر اعتراضیه ناسته د پاکستان امنیتي ځواکونو برید کړی او د ډاکټر ماهرنګ بلوڅ په ګډون یې د دغه غورځنګ ځینې نورې ښځینه غړې هم نیولي دي.
خبرپاڼه کې راغلي، چې پاکستاني پولیسو د برید پر مهال اوښلن ګازونه شیندلي، اعتراض کوونکي یې په لرګیو ډبولي او سخت یې شکنجه کړي دي.
همدا راز زیاته شوې چې په سیمه کې مخابراتي شبکې هم تړل شوې وه او اعتراض کوونکو د انټرنیټي خدمتونو تر څنګ د اړیکو نیولو هېڅ ډول اسانتیاوو ته لاسرسی نه درلود.
د بلوڅو یووالي غورځنګ ویلي، چې د پولیسو په دغه تاوتریخوالي کې د دوی درې تنه لاریونوال هم وژل شوي او څور نور ټپیان دي.
پخوانی سناتور او د ملي ډیموکراټیک ګوند د رهبرۍ غړی افراسیاب خټک له بلوڅ سره د پولیسو نننی چلند غندي او د پاکستان له حکومته غوښتنه کوي چې نیول شوي کسان ژر تر ژره خوشې کړي.
هغه خبرداری ورکړی چې له بلوڅو سره دغه ډول چلند به په بلوچستان کې وضعیت لا کړکېچن کړي.
د ډاکټر ماهرنګ بلوڅ په مشرۍ د بلوڅو د یووالي غورځنګ د پاکستان حکومت او پوځ پر ضد له دې امله سوله ییز لاریونونه کوي چې ګوندې د دوی زرګونه ځوانان یې لادرکه کړي دي.
د بلوڅانو د حقونو دغه مبارزه او د هغې ملګري نیوکه کوي، چې پاکستان پوځ د «بلوڅانو نسل وژنه» پیل کړې ده.
تر دې دمخه هم د بلوڅو یووالي غورځنګ بېلابېل لاریونونه او ناستې د پاکستان د امنیتي ځواکونو له لوري ګډ وډ شوي دي.
د ماهرنګ بلوڅ په مشرۍ دغه غورځنګ څو ځله په پلازمېنه اسلام اباد کې هم د پاکستان پوځ او حکومت خلاف لاریونونه کړي او پرې یې غږ کړی چې له بلوڅو سره دې خپل توپیري چلند بند کړي.
د بشري حقونو یو شمېر نړۍوال سازمانونو په ځانګړې توګه د بښنې نړۍوال سازمان تازه پر پاکستان غږ کړی چې د بلوڅانو له زورولو او نیول کیدو څخه دې لاس په سر شي.
د بلوڅو د یووالي غورځنګ ور هاخوا په پښتونخوا کې د منظور پښتین په مشرۍ د پښتون ژغورنې غورځنګ بیا د پاکستان پوځ او حکومت د پښتنو پر لادرکه کیدو او ځورول کیدو تورنوي.
منظور پښتون لا ادعا لري چې د پاکستان پوځ په پښتونخوا کې جعلي نا امنۍ جوړې کړي او په لوی لاس یې دغه سیمه د ډالري جنګونو قرباني کړې ده.
هغه ادعا لري چې پښتانه په پاکستان کې محکوم او مظلوم دي.
د پاکستاني رسنۍ دنیا د خبر له مخې، د پښتونخوا والي فیصل کریم کنډي ویلي، چې له ۷۰ تر ۸۰ سلنه ترهګري له افغانستان څخه پاکستان ته راځي، او ترهګر په افغانستان کې له بهرنیو ځواکونو څخه د پاتې شویو وسلو په ګټه اخیستنې په دغه هېواد کې ترهګریز بریدونه ترسره کوي.
هغه پر ډیورنډ کرښه د شته ستونزو یادونه کړې او زیاته کړې یې ده، «مونږ له ډیرې اوږدې مودې راهیسې له ترهګرۍ سره مبارزه کوو، او په دې برخه کې یوې ځانګړې امنیتي پالیسې ته اړتیا ده.»
د پښتونخوا والي، په پاکستان کې د مېشتو افغان کډوالو بېرته ستنولو ته په اشارې سره وویل، دا یې وخت دی، چې افغان کډوال افغانستان ته ستانه شي او پخپل هېواد کې اباد شي.
وروسته له هغې چې د افغانستان پخوانی جمهوریت وپرځېد؛ د افغان طالبانو ملګرې ډله «ټيټيپي» په پښتونخوا کې خپل فعالیتونه خورا چټک او پراخ کړل.
د پاکستان حکومت ادعا لري، چې د یادې وسلهوالې ډلې د فعالیتونو د پراخېدو یو لوی لامل دا دی چې افغان طالبانو په خپله خاوره کې ورته پناه ځایونه ورکړي او له هماغه ځایه په دغو ایالتونو کې بریدونه تنظیموي.
پاکستان په نړۍوالو غونډو او رسنیو کې غوغا جوړه کړې، چې طالبان د افغانستان خاوره د دوی پر ضد کاروي.
افغان طالبانو بیا تل د پاکستان دغه ادعاوې رد کړې او «ټيټيپي» یې د یاد هېواد کورنۍ امنیتي ستونزه بللې ده.