محمد صادق: په افغانستان کې سوله او پرمختګ د سیمې د ثبات لپاره اړین دي
د افغانستان لپاره د پاکستان ځانګړی استازی محمد صادق وايي، د اسلام اباد او کابل اقتصادي اړېکې له یو بل سره تړلې دي او په دغه هېواد کې سوله او پرمختګ د سیمې د ثبات لپاره اړین دی.
د افغانستان لپاره د پاکستان ځانګړی استازی محمد صادق وايي، د اسلام اباد او کابل اقتصادي اړېکې له یو بل سره تړلې دي او په دغه هېواد کې سوله او پرمختګ د سیمې د ثبات لپاره اړین دی.
محمد صادق، چې دوه ورځې مخکې کابل ته په سفر تللی د افغانستان او پاکستان اقتصادي اړیکې له یوبل سره ژورې او تړلې بولي.
نوموړي د یکشنبې په ورځ په یوه خبرپاڼه کې په ډاګه کړه، چې دواړه هېوادونه باید د سیمې د اقتصاد د ودې لپاره خپلې هڅې همغږې کړي.
صادق افغانستان د پاکستان لپاره مهم سیمه ییز شریک بللی او وايي، چې دواړه هېوادونه باید د دوه اړخیزې سوداګرۍ د پراخولو او سیمه ییز اتصال د پیاوړتیا لپاره ګډ کار وکړي.
صادق خان وايي، پاکستان له افغانستان سره پیاوړو او متقابلو ګټورو اړیکو ته ژمن دی.
محمد صادق د جمعې په ورځ کابل ته ولاړ او تېره ورځ یې د طالبانو د بهرنیو چارو وزیر امیرخان متقي په ګډون ځینو نورو طالب چارواکو سره هم لیدلي او د سوداګرۍ، امنیت، سیاسي او اقتصادي همکاریو او دواړو لوریو ته د مساپرو دتګ راتګ په اړه یې خبرې اترې کړې دي.
پاکستاني رسنیو ویلي، چې د پاکستان او افغانستان ترمنځ د ترینګلو اړیکو د ښه والي نښې لیدل کېږي او کابل ته تللی محمد صادق هڅه کوي، چې له طالبانو سره د خپل هېواد د اړیکو رغېدو ترڅنګ د تعامل کچه لوړه کړي.
