ترکیې د حکومتي ضد لاریونونو د خبري پوښښ له امله د فرانس پرېس یو خبریال ونیوو
ترکیې د حکومتي ضد لاریونونو د خبري پوښښ له امله د سې شنبه په ورځ د فرانس پرېس خبریال یاسین اک ګول نیولی دی.
ترکیې د حکومتي ضد لاریونونو د خبري پوښښ له امله د سې شنبه په ورځ د فرانس پرېس خبریال یاسین اک ګول نیولی دی.
د ترکیې د خبريالانو اتحادیه وایي، چې د دغه هېواد یوې محکمې د فرانسپرېس خبري اژانس یاد خبریال د هغو څېړنو لپاره نیولی، چې د استانبول د نیول شوي ښاروال د بندي کېدو په تړاو یې د حکومتي ضد لاریونونه یې تر پوښښ لاندې نیولي و.
د محکمې د حکم له مخې، اکګول به د غیر قانوني تجمعاتو او لاریونونو کې د ګډون په تور د محکمې تر پیلېدو پورې په بند کې پاتې شي.
دغه خبریال محکمې ته ویلي، چې د خبریال په توګه د خبري پوښښ لپاره د لاریونونو په سیمه کې و او د نوموړي وکیلانو هم د هغه د خوشې کېدو غوښتنه کړې ده.
د فرانس پرېس خبري اژانس مشر فاریس فرایز هم د اک ګول د ژر خوشې کېدو ترڅنګ ویلي، چې هغه د یو خبریال په توګه د لاریونونو د خبري پوښښ لپاره په سیمه کې و.
د ترکیې د خبريالانو اتحادیې ویلي، چې اک ګول د هغو اوو نیول شویو خبریالانو له ډلې څخه دی، چې په لاریونونو کې د حضور له امله نیول شوی دی.
د ترکیې د کورنیو چارو وزیر علي یرلیکایا د سې شنبه ورځ وویل، چې د تېرو شپږو ورځو لاریونونو پرمهال څه باندې څوارلس سوه کسان نیول شوي، چې له یاد شمېر څخه ۴۷۸ کسان قضایي ادارو ته پېژندل شوي دي.
له دې پراخو نیونو سره - سره معترضین وایي، چې لاریونونو ته به همداراز دوام ورکړي.
دوی د استانبول د ښاروال اکرم اماماوغلو چې د ترکیې د ولسمشر جدي سیاسي سیال دی، د بندي کېدو پر ضد اعتراض کوي.
