تحریک طالبان پاکستان ډلې د روژې میاشتې په خپاره کړي راپور کې ویلي، چې په ۲۶۰ بریدونو کې یې ۳۸۷ امنیتي عسکرو ته مرګ ژوبله اړولې ده. د راپور له مخې، په دغو بریدونو کې ۱۷۵ پاکستاني امنیتي عسکر وژل شوي او ۲۱۲ نور بیا ټپیان شوي دي.
راپور زیاتوي، چې په تېره یوه میاشت کې یې د دغې مرګ ژوبلې ترڅنګ ۹ تنه پاکستاني امنیتي عسکر نیولي هم دي؛ خو په دې تړاو یې نور معلومات نه دي ورکړي.
په راپور کې راغلي، چې د دغو ۲۶۰ بریدونو له ډلې ۳۹ یې په سوېلي وزیرستان کې، ۳۲ یې په خیبر کې، ۲۶ شمالي وزیرستان کې، ۲۴ ډېره اسماعیل خان کې، ۲۰ په باجوړ کې، ۲۴ په لکي مروت کې، ۱۶ بنو کې، ۱۶ ټانک کې، ۱۱ سوېلي پنجاب کې، ۹ کورمه کې، ۶ پېښور کې، ۵،۵ په مهمند او کرک کې، ۴،۴ په مردان او پښین کې، ۳،۳ په کوهاټ او کویټې کې، ۲،۲ په کوز دېر، اورکزیو، ملاکنډ، چترال او قلات کې او یوه، یوه سوات، قلعه سیف الله او مکران کې ترسره شوي دي.
تر اوسه پورې دغه راپور خپلواکو سرچینو او یا هم د پاکستان پوځ نه دی تایید کړی.
دغه راپور کې راغلي، چې په دغو عملیاتو کې ۱۲۳ لیزري بریدونه، ۵۲ چریکي بریدونه، ۲۷ د لاسي بمونو چاودنې، ۲۱ متضاد بریدونه، ۹ ځوابي بریدونه او ۸ هدفي بریدونه شامل دي.
د راپور په ټکو، په دغو بریدونو کې د پوځ سرتېري، اېف سي ځواکونه، پولیس او د ترهګرۍ ضد څانګې کارکوونکي په نښه شوي دي.
خو د پاکستان د امنیتي مطالعاتو او څېړنو مرکز د راپور له مخې؛ د ۲۰۲۵ کال د لومړیو درېیو میاشتو په لړ کې ۸۹۷ کسان په بېلابېلو امنیتي پېښو کې وژل شوي او ۵۴۲ نور ټپیان دي.
