د لبنان حزب‌الله ډلې د وسلو په تړاو مذاکراتو ته چمتووالی وښود

د رویټرز نظر پوښتنه چې د یکشنبې په ورځ پای ته ورسېده، ښيي چې ۷۳٪ ګډونوالو ویلي چې په راتلونکو شپږو میاشتو کې به د هغو شیانو بیې لوړې شي، چې دوی یې هره ورځ اخلي، ځکه چې دا نوي مالیات به تقریباً پر ټولو وارداتو اغېز وکړي.

دغه نظرپوښتنه ښيي، چې ډېری امریکایان د ولسمشر ډونالډ ټرمپ له خوا د نویو پراخو تعرفو له اعلان وروسته، د ورځنیو توکو د بیو د لوړوالي اندېښنه لري.

یوازې ۴٪ ګډونوالو فکر کاوه چې بیې به راټیټې شي، په داسې حال کې چې پاتې کسانو یا ویلي چې کوم بدلون نه راځي یا یې پوښتنې ته ځواب نه دی ورکړی.

ټرمپ تېره اونۍ د تېرو څو لسیزو تر ټولو لویې تعرفې اعلان کړې، چې دا کار د وال سټریټ بازارونه لړزولي، ځکه ډېر اقتصادپوهان وایي دا تعرفې به بیې پورته کړي او ممکن د امریکا او نورو هېوادونو لپاره اقتصادي رکود رامنځته کړي.

د نظر پوښتنې له مخې، شاوخوا ۵۷سلنه امریکایانو چې په کې د ټرمپ د جمهوري غوښتونکي ګوند شاوخوا څلورمه برخه هم شامله ده ویلي، چې دوی د نویو تعرفو مخالف دي.

دا تعرفې تقریباً د هر هېواد پر وارداتو لږ تر لږه ۱۰سلنه تعرفه وضع کوي.

نږدې ۳۹ سلنه ګډونوالو له دغې تعرفې ملاتړ کړې او ۵۲ سلنې بیا ویلي، چې د ټرمپ د ادارې له دې خبرې سره موافق دي، چې نور هېوادونه د امریکا له اقتصاد څخه په نړۍوالو سوداګریزو اړیکو کې ناوړه استفاده کوي.

ټرمپ تل دا خبره کوي، چې د دې ډول سوداګریزو خنډونو له لارې به د امریکا تولید زیات شي، خو ۴۴٪ ګډونوالو له دې نظر سره مخالفت ښودلی.

د نظر پوښتنې نیمايي ګډونوالو چې په کې نږدې ټول جمهوري‌ غوښتونکي شامل وو، ویلي چې دوی د ټرمپ له دغو تعرفو سره موافق دي که څه هم لنډ مهاله اقتصادي زیان به ولري، خو دا ارزښت لري چې امریکا په اوږدمهال کې پیاوړې شي.

د رویټرز دغه نظر پوښتنه په ټول امریکا کې په انلاین ډول ترسره شوه، چې په کې یو زرو او ۲۷ امریکایانو ګډون کړی.

دا سروې په ټول هېواد کې انلاین ترسره شوې، ۱۰۲۷ امریکایان پکې شامل وو او د تېروتنې اندازه یې شاوخوا ۳سلنه وه.

د بېلد ورځپاڼې د رپوټ له مخې، د اتحادیې اواېس پي ډي ټول ۱۹ لوړپوړي مرکچیان له نن سهار راهیسې دسي ډي یو په مرکزي دفتر کې سره ناست دي.

دواړو خواوو د دې هوډ څرګندونه کړې چې نن ورځ باید هوکړه لاسلیک شي، خو دا لا نه ده جوته چې کره وخت به کله وي.

که څه هم خبرو پرمختګ کړی، خو مالي او مالیاتي سیاستونه لاهم د اختلاف مهم ټکی دي.

واکمن اېس پي ډي ګوند ټینګار کوي چې باید پر شتمنو او لوړ عاید لرونکو خلکو لوړې مالیې وضع شي، په داسې حال کې چې سي ډي یو نه یوازې د دې مخالف دی، بلکې غواړي د پیوستون مالیه په بشپړ ډول له منځه یوسي.

سي ډي یو د دې مالیې د پای غوښتنه کوي، خو د مقابل لوري د رضایت لپاره کیدای شي لوړه مالیه (Spitzensteuer) ۴۲ سلنې او د شتمنۍ مالیه(Reichensteuersatz) ۴۵ سلنې ته پورته شي.

دغه راز د تقاعد موضوع کې ایس پي ډي غواړي د تقاعد کچه (د منځني تقاعد کچه د منځني معاش په پرتله) په ۴۸ سلنې کې ثابته وساتي، چې دا به د کارکوونکو لپاره د قسطونو لوړوالي معنا ولري، خو سي ډي یو بیا د دا ډول « سخت تعریف شوي حد» مخالفت کوي.

له مرکچي ټیم سره نږدې سرچینو بیلد ته ویلي، چې ښايي نن شپه اوږده وي حتا د شپې تر ناوخته یا سبا سهار دوام وکړي.

که نن توافق وشي د نوې هوکړې رسمي اعلان به د چارشنبې ورځ وشي.

تمه ده چې فریدریښ مېرڅ به د مې پر۷مه د پارلمان له خوا د نوي لومړي وزیر په توګه انتخاب شي.

د اسنادو له مخې، چې رویټرز ته رسېدلي، هغه کډوال چې له متحده ایالتونو نه یې د وتلو امر تر لاسه کړی، خو لا هم له دغه هېواده نه دي وتلي، هره ورځ به تر ۹۹۸ ډالرو پورې جریمه کیږي.

په اسنادو کې راغلي، چې که کډوال دغه جریمه ور نه کړي، شتمنۍ به یې ضبط شي.

دا جریمې د ۱۹۹۶ کال هغه قانون ته ستنېږي چې لومړی ځل په ۲۰۱۸ کې د ټرمپ د لومړۍ دورې پر مهال فعال شوی و. اوس پلان دی چې دا جریمې تر پنځو کلونو پورې تطبیق شي، چې ښایي پر یو شمېر کډوالو تر یومیلیون ډالرو پورې مالي بوج راشي.

د امریکا د کورنیو چارو وزارت ویاندې ټریشیا مک‌لافلین ویلي، « غیرقانوني کډوال باید دCBP Home نومي موبایل اپ له لارې د وتلو اعلان وکړي او که ویې نه کړي، نو د قانون له مخې به ۹۹۸ ډالره د ورځې جریمه شي».

د اسنادو له مخې، سپینې ماڼۍ د ګمرک او سرحدي محافظت ادارې باندې فشار راوړی چې د جریمو، شتمنیو ضبط او د هغو د پلور چارې اداره کړي.

د ایف ډبلیو ډي په نامه د مهاجرت ملاتړ ډلې اټکل دا دی چې شاوخوا ۱۰میلیونه غیرقانوني کډوال د امریکایي وګړو یا قانوني مقیمینو سره یوځای ژوند کوي، چې دا جریمه به ډېرې بېوزلي کورنۍ تر فشار لاندې راولي.

د بایډن د دورې یوه لوړپوړي چارواکي سکاټ شوچارت ویلي چې دا اقدامات د قانون د پلي کولو لپاره نه، بلکې د وېرې خپرولو لپاره دي.

دسي بي پي یو یادښت چې رویټرز لیدلی، ښيي چې دا اداره د دا ډول جریمو د تطبیق تخنیکي امکانات نه لري او د سیستمونو نوي کول به خورا لګښت ولري.

د چین د سوداګرۍ وزارت وویل، چې د امریکا د تعرفو زیاتولو ګواښ تېروتنه دهاو داد «بلیک مېل» کولو طبیعت ښکارندويي کوي. وزارت زیاته کړې، چې «که امریکا خپله لاره تعقیب کړي، چین به تر پایه وجنګیږي».

چین، چې د نړۍ دویم لویاقتصادي ځواک دی، ځوابي تعرفې اعلان کړې دي او وزارت په خپل وروستي بیان کې اشاره وکړه چې ممکن نور تدابیر هم اخیستل شي.

د چین د سوداګرۍ وزارت وویل: «د چین ځوابي تدابیر د خپل حاکمیت، امنیت او پراختیايي ګټو د ساتنې لپاره دي او د نړیوالې سوداګرۍ د عادي نظم ساتلو لپاره هم دي. دا ټول تدابیر په بشپړه توګه مشروع دي».

د ټرمپ د ۵۰ سلنه اضافي تعرفو خبرداری د دې لامل شوی چې د نړیوال اقتصادي انډول په لټه کې اوسنی اقتصادي حالت لا پسې کړکېچن شي.

د بیجینګ په کوڅو کې خلک وايي چې دوی دا هرڅه انګیري، خو د خپل هېواد پر وړتیا باور لري چې دا کړکیچ بې خطره وڅاري.

د چین د بهرنیو چارو وزارت ویاند لین جیان د ټرمپ له ادارې سره د خبرو اترو په اړه وویل: « زه فکر نه کوم هغه څه چې امریکا یې کوي، د رښتینو خبرو اترو اراده وښیي».

د اروپا کمسیون رییسې اورسولا فن دیر لیین د چین له لومړي وزیر سره د ټیلفوني خبرو په ترڅ کې د یوه عادلانه سوداګریز سیسټم د ملاتړ اړتیا په ګوته کړې ده. هغې ویلي چې د چین د تعرفو پر وړاندې د امریکا اقدامات باید د خبرو له لارې حل شي.

په ورته وخت کې، اروپايي ټولنې د امریکا د تعرفو په ځواب کې د ۲۵ سلنه اضافي تعرفو وړاندیز کړی.

چینایي تولیدوونکي، چې د لوښو، غالیو او نورو توکو په تولید بوخت دي، د ټرمپ د تعرفو له امله پر متبادلو لارو غور کوي.

د رویټرز د رپوت له مخې، د ونډو بازارونه، چې په دې وروستیو ورځو کې یې شدید ټکانونه خوړلي وو، نن بیا په ثبات سره روان دي. د شانګهای او توکیو په ګډون په اسیایي مارکیټونو کې ښه والی راغلی، په داسې حال کې چې د انډونیزیا مارکیټونه ټکني شوي دي.

د جیو نیوز د رپوټ له مخې، د پاکستان لومړي وزیر شهباز شریف په اسلام اباد کې د پاکستان د کانونو د پانګونې فورم دوه ورځنۍ غونډې ته وویل چې پاکستان به اجازه ورنه کړي چې څوک خام مواد له دغه هیواده بهر ولېږدوي.

هغه وویل چې په هر ډول تړون کې به دا هم شامله وي، چې د کانونو د استخراج لپاره به نوي ټېكنالوژي هم پاكستان ته انتقالوي.

هغه وویل، متشبثین به د مسلکي زده کړو د مرکزونو په جوړولو سره د ځوانانو د عصري مهارتونو د روزنې لپاره د ګډو همکاریو فرصتونه رامنځته شي.

شهباز شریف په دې خبره زور راوړو چې مرکزي او ایالتي حکومتونه به له نورو ادارو سره په ګډه کار کوي چې پاکستان د نړۍ په يو مخکښ هېواد بدل کړي.

دې غونډې ته د پاکستان مرستیال لومړي وزیر اسحاق ډار وویل چې دغه هېواد د پراخو غیر استخراج شويو کانونو په ظرفیت سره د بهرنیو پانګونو جلبولو لپاره چمتو دی.

ډار وویل چې پاکستان د پالیسي اړوند اصلاحاتو او پر پانګوالو متمرکزو نوښتونو له لارې د کانونو سکتور ستراتیژیک پرمختګ ته لومړیتوب ورکړی.

د پاکستان لوی درستیز جنرال عاصم منیر دې غونډې ته وویل، « موږ نړیوالو سازمانونو ته هرکلی وایو، چې پاکستان په خپل تخصص سره روښانه کړي، د پانګونې فرصتونه وپلټي، او زموږ د پراخو سرچینو ظرفیت په پراختیا کې زموږ ملګرتیا وکړي».

نوموړي وويل چې د پاکستان د کاني شتمنیو د استخراج لپاره انجینرانو، جیولوجستانو، اپریټرانو او ډېرو ماهرو کان کیندونکو ته اړتیا ده او له همدې امله د بلوچستان ۲۷ زده کوونکي په بهر کې د معدنياتو د اکتشاف په برخه کې روزنه ترلاسه کوي.

د پاکستان د کانونو د پانګونې فورم دوه ورځنۍ غونډه کې د سیمې هېوادونو د استازو ترڅنګ د اروپايي هېوادونو او امریکايي بېلابېلو کمپنیو استازو هم ګډون کړی و.