د غزې کړکېچ؛ په غزه کې په تېرو ۲۴ ساعتونو کې کابو ۶۰ کسان وژل شوي
د غزې د روغتیا وزارت د معلوماتو له مخې، په تېرو ۲۴ ساعتونو کې د اسراییلي پوځ د بریدونو له امله لږ تر لږه ۶۰ فلسطینیان وژل شوي او ۲۱۳ نور ټپیان شوي دي.
د غزې د روغتیا وزارت د معلوماتو له مخې، په تېرو ۲۴ ساعتونو کې د اسراییلي پوځ د بریدونو له امله لږ تر لږه ۶۰ فلسطینیان وژل شوي او ۲۱۳ نور ټپیان شوي دي.
دغه وزارت ویلي، خبریال احمد منصور چې د دوشنبې په ورځ د سوېلي غزې په خان یونس کې د ناصر روغتون ته نږدې د رسنیو پر خیمه د اسراییلي برید پر مهال سخت سوځېدلی و، له سختو ټپونو وروسته مړ شو.
په غزه کې د ۱۷ میاشتو راهیسې روانه جګړه کې تر اوسه ۲۱۱ فلسطینی خبریالان وژل شوي دي.
د غزې د روغتیا وزارت د معلوماتو له مخې، د اسراییلي پوځ د بریدونو له امله تر اوسه لږ تر لږه ۵۰ زره فلسطینیان وژل شوي دي؛ خو د غزې د حکومتي رسنیو دفتر وايي چې د وژل شمېر له ۶۱ زرو اوښتی دی.
بل لور ته د اسراییل لومړي وزیر د امریکا له ولسمشر ډونالډ ټرمپ سره لیدلي او ټرمپ ویلي، چې د غزې جګړه ښايي ژر تر ژره پای ته ورسېږي.
په همدې حال کې د ملګرو ملتونو سرمنشي انتونیو ګوتریش ویلي، چې جبري بېځایه کول او د جګړې دوام د نړۍوالو قوانینو ښکاره سرغړونه ده.
ډیلي ټېلګراف ورځپاڼې په یوې مقاله کې لیکلي، چې که څه هم د داعش ګواښ جدي دی، خو دا د امریکا لپاره یوه تېروتنه ده، چې د دې ډلې د کنټرول لپاره له طالبانو سره همکاري وکړي. دغې ورځپانې لیکلي: "موږ باید د نورو ترهګرو څخه د ساتنې لپاره په طالبانو تکیه ونه کړو."
د دې مقالې د لیکوال په وینا، د طالبانو "ناکام" حکومت د داعش د خراسان څانګې د ودې اصلي لامل دی.
جیمز سنل چې د امریکا د نیو لاینز د فکري مرکز پخوانی څېړونکی او سلاکار دی، په ډیلي ټېلګراف کې په خپله مقاله کې خبرداری ورکړی، چې په لوېدیځو هېوادونو کې د داعش له خوا د لوی برید احتمال وړاندوینه کېږي.
هغه اندېښمن دی، چې کابل ته د امریکايي پلاوي سفر یا په افغانستان کې د امریکا د سفارت د بیا پرانیستلو اوازې د طالبانو سره د امریکا د اړیکو د عادي کولو د تدریجي پروسې پیل دی.
د سنل په وینا، د سراج الدین حقاني د نیولو لپاره د ۱۰ میلیون ډالرو انعام په لغوه کولو سره، امریکا شاید په دې باور وي، چې په افغانستان کې د داعش په نوم یو لوی دوښمن شتون لري او له همدې امله باید له طالبانو سره همکاري وکړي.
د داعش خراسان څانګې ۱۴۰۰ کال په زمري میاشت کې د طالبانو له خوا د افغانستان د نیولو راهیسې په روسیه او ایران کې مرګوني بریدونه کړي دي او په افریقا کې یې هم خپل شتون پراخ کړی دی.
سنل وايي، چې که څه هم داعش د طالبانو دوښمن دی، خو طالبان د ترهګرو دوښمن نه دی.
د کابل له سقوط وروسته "د القاعدې د مشر اېمن الظواهري په ګډون د دې نور ډلې غړي په کابل کې مېشت شول."
اېمن الظواهري د ۱۴۰۱ کال د زمري په میاشت کې د کابل په وزیر اکبر خان کې په سراج الدین حقاني پورې اړوند مېلمستون کې د امریکایي الوتکې له خوا د توغول شوي توغندي په واسطه ووژل شو.
د خپرې شوې مقالې لیکوال وايي: "امریکا یو ځل له افغانستان څخه د القاعدې د اېستلو لپاره جګړه پیل کړه، خو له افغانستان څخه د امریکا له وتلو څو میاشتې وروسته، طالبانو القاعده بېرته هېواد ته راوبلله."
د امریکا د بهرنیو چارو وزیر د تېر کال په فېبرورۍ کې څرګنده کړه، چې طالبانو "په ځینو مواردو کې" له متحده ایالاتو سره همکاري کړې ده.
مارکو روبیو وویل، چې دا استخباراتي همکاري په افغانستان کې د داعش پر وړاندې د عملیاتو په اړه وه او طالبانو په دې اړه عمل وکړ.
سنل د دې همکارۍ منطق تر پوښتنې لاندې راولي.
نوموړی وايي: "طالبان حتا د داعش څخه ځان نه شي ساتلی. دا ډله زموږ په دفاع کې څه ګټه لري؟ موږ باید په دې اړه لږ فکر وکړو مخکې له دې چې دا وښیو چې یو ترهګر موږ د بل ترهګر څخه ساتلی شي."
د لبنان د حزبالله ډلې یوه لوړپوړوي چارواکي رویټرز خبري اژانس ته ویلي، چې دا ډله د لبنان له سوېل څخه د اسراییلي ځواکونو د وتلو او د هغوی د هوايي بریدونو د بندېدو په صورت کې چمتو ده، څو خپلو جنګیالیو ته د بېوسلوکېدو په تړاو د لبنان له ولسمشر سره مذاکرات وکړي.
دغه اژانس د حزبالله د لوړپوړي چارواکي په حواله زیاته کړې، چې دا ډله د ملي ستراتیژي په چوکاټ کې او د لبنان له سوېل څخه د اسراييلي پوځ د وتلو په شرط مذاکراتو ته چمتو ده.
د دغې ډلې چارواکي رویټرز ته وویل: «حزبالله هغه وخت چمتو دی چې د وسلو په تړاو مذاکرات وکړي چې اسراییلي پوځ د لبنان له پنځو سیمو څخه ووځي او پر دغه هېواد خپل هوايي بریدونه پای ته ورسوي.»
د رویټرز د راپور پر بنسټ، د لبنان د ولسمشر دفتر تر اوسه د لبنان د حزبالله ډلې د دغه لوړپوړي چارواکي د څرګندونو په تړاو څه نه دي ویلي.
رویټرز د حزبالله لبنان په حواله دا راپور داسې مهال ورکوي، چې څو ورځې مخکې اسراییل او د لبنان حزبالله یو بل د ۲۰۲۴ د نوامبر میاشتې د اوربند پر ماتېدو تورن کړل او اسراييلي پوځ یو وار بیا له څو میاشتني ځنډ وروسته د بیروت پر سوېلي څنډو هوايي بریدونه وکړل.
اسراییلي پوځ په یوه بیان کې ادعا کړې وه، چې د دغو بریدونو په ترڅ کې یې د بیروت په سوېلي څنډو کې یوه ودانۍ چې حزبالله لبنان د مرکز په توګه پېژندل کېده، په نښه کړې ده.
د یادونې ده، چې د اسراییل او لبنان تر منځ د تاوتریخوالي له پیله تر اوسه شاوخوا څلور زره لبنانیان وژل شوي او زرګونه نور بېکوره شوي دي.
د رویترز له خوا نوې نظر پوښتنه ښيي، چې ډېری امریکایان د ولسمشر ډونالډ ټرمپ له خوا د نویو پراخو تعرفو د لګولو وروسته د ورځنیو توکو د بیو د لوړوالي لپاره ځان چمتو کوي.
د رویټرز نظر پوښتنه چې د یکشنبې په ورځ پای ته ورسېده، ښيي چې ۷۳٪ ګډونوالو ویلي چې په راتلونکو شپږو میاشتو کې به د هغو شیانو بیې لوړې شي، چې دوی یې هره ورځ اخلي، ځکه چې دا نوي مالیات به تقریباً پر ټولو وارداتو اغېز وکړي.
دغه نظرپوښتنه ښيي، چې ډېری امریکایان د ولسمشر ډونالډ ټرمپ له خوا د نویو پراخو تعرفو له اعلان وروسته، د ورځنیو توکو د بیو د لوړوالي اندېښنه لري.
یوازې ۴٪ ګډونوالو فکر کاوه چې بیې به راټیټې شي، په داسې حال کې چې پاتې کسانو یا ویلي چې کوم بدلون نه راځي یا یې پوښتنې ته ځواب نه دی ورکړی.
ټرمپ تېره اونۍ د تېرو څو لسیزو تر ټولو لویې تعرفې اعلان کړې، چې دا کار د وال سټریټ بازارونه لړزولي، ځکه ډېر اقتصادپوهان وایي دا تعرفې به بیې پورته کړي او ممکن د امریکا او نورو هېوادونو لپاره اقتصادي رکود رامنځته کړي.
د نظر پوښتنې له مخې، شاوخوا ۵۷سلنه امریکایانو چې په کې د ټرمپ د جمهوري غوښتونکي ګوند شاوخوا څلورمه برخه هم شامله ده ویلي، چې دوی د نویو تعرفو مخالف دي.
دا تعرفې تقریباً د هر هېواد پر وارداتو لږ تر لږه ۱۰سلنه تعرفه وضع کوي.
نږدې ۳۹ سلنه ګډونوالو له دغې تعرفې ملاتړ کړې او ۵۲ سلنې بیا ویلي، چې د ټرمپ د ادارې له دې خبرې سره موافق دي، چې نور هېوادونه د امریکا له اقتصاد څخه په نړۍوالو سوداګریزو اړیکو کې ناوړه استفاده کوي.
ټرمپ تل دا خبره کوي، چې د دې ډول سوداګریزو خنډونو له لارې به د امریکا تولید زیات شي، خو ۴۴٪ ګډونوالو له دې نظر سره مخالفت ښودلی.
د نظر پوښتنې نیمايي ګډونوالو چې په کې نږدې ټول جمهوري غوښتونکي شامل وو، ویلي چې دوی د ټرمپ له دغو تعرفو سره موافق دي که څه هم لنډ مهاله اقتصادي زیان به ولري، خو دا ارزښت لري چې امریکا په اوږدمهال کې پیاوړې شي.
د رویټرز دغه نظر پوښتنه په ټول امریکا کې په انلاین ډول ترسره شوه، چې په کې یو زرو او ۲۷ امریکایانو ګډون کړی.
دا سروې په ټول هېواد کې انلاین ترسره شوې، ۱۰۲۷ امریکایان پکې شامل وو او د تېروتنې اندازه یې شاوخوا ۳سلنه وه.
د جرمني د مسیحي دموکرات ګوند(سي ډي یو) مشر فریدریښ مېرڅ او د سوسیال دموکرات ګوند (اېس پي ډي) مشر لارس کلینګبایل د نوي ایتلافي حکومت پر جوړولو نږدې نهایي هوکړې ته رسېدلي دي.
د بېلد ورځپاڼې د رپوټ له مخې، د اتحادیې اواېس پي ډي ټول ۱۹ لوړپوړي مرکچیان له نن سهار راهیسې دسي ډي یو په مرکزي دفتر کې سره ناست دي.
دواړو خواوو د دې هوډ څرګندونه کړې چې نن ورځ باید هوکړه لاسلیک شي، خو دا لا نه ده جوته چې کره وخت به کله وي.
که څه هم خبرو پرمختګ کړی، خو مالي او مالیاتي سیاستونه لاهم د اختلاف مهم ټکی دي.
واکمن اېس پي ډي ګوند ټینګار کوي چې باید پر شتمنو او لوړ عاید لرونکو خلکو لوړې مالیې وضع شي، په داسې حال کې چې سي ډي یو نه یوازې د دې مخالف دی، بلکې غواړي د پیوستون مالیه په بشپړ ډول له منځه یوسي.
سي ډي یو د دې مالیې د پای غوښتنه کوي، خو د مقابل لوري د رضایت لپاره کیدای شي لوړه مالیه (Spitzensteuer) ۴۲ سلنې او د شتمنۍ مالیه(Reichensteuersatz) ۴۵ سلنې ته پورته شي.
دغه راز د تقاعد موضوع کې ایس پي ډي غواړي د تقاعد کچه (د منځني تقاعد کچه د منځني معاش په پرتله) په ۴۸ سلنې کې ثابته وساتي، چې دا به د کارکوونکو لپاره د قسطونو لوړوالي معنا ولري، خو سي ډي یو بیا د دا ډول « سخت تعریف شوي حد» مخالفت کوي.
له مرکچي ټیم سره نږدې سرچینو بیلد ته ویلي، چې ښايي نن شپه اوږده وي حتا د شپې تر ناوخته یا سبا سهار دوام وکړي.
که نن توافق وشي د نوې هوکړې رسمي اعلان به د چارشنبې ورځ وشي.
تمه ده چې فریدریښ مېرڅ به د مې پر۷مه د پارلمان له خوا د نوي لومړي وزیر په توګه انتخاب شي.
د ټرمپ اداره پلان لري چې غیر قانوني کډوال هره ورځ تر ۹۹۸ ډالرو پورې جریمه کړي. رویټرز د ترلاسه شویو سندونو له مخې وايي، چې که کډوال جریمې ور نه کړي، شتمنۍ به یې ضبط شي.
د اسنادو له مخې، چې رویټرز ته رسېدلي، هغه کډوال چې له متحده ایالتونو نه یې د وتلو امر تر لاسه کړی، خو لا هم له دغه هېواده نه دي وتلي، هره ورځ به تر ۹۹۸ ډالرو پورې جریمه کیږي.
په اسنادو کې راغلي، چې که کډوال دغه جریمه ور نه کړي، شتمنۍ به یې ضبط شي.
دا جریمې د ۱۹۹۶ کال هغه قانون ته ستنېږي چې لومړی ځل په ۲۰۱۸ کې د ټرمپ د لومړۍ دورې پر مهال فعال شوی و. اوس پلان دی چې دا جریمې تر پنځو کلونو پورې تطبیق شي، چې ښایي پر یو شمېر کډوالو تر یومیلیون ډالرو پورې مالي بوج راشي.
د امریکا د کورنیو چارو وزارت ویاندې ټریشیا مکلافلین ویلي، « غیرقانوني کډوال باید دCBP Home نومي موبایل اپ له لارې د وتلو اعلان وکړي او که ویې نه کړي، نو د قانون له مخې به ۹۹۸ ډالره د ورځې جریمه شي».
د اسنادو له مخې، سپینې ماڼۍ د ګمرک او سرحدي محافظت ادارې باندې فشار راوړی چې د جریمو، شتمنیو ضبط او د هغو د پلور چارې اداره کړي.
د ایف ډبلیو ډي په نامه د مهاجرت ملاتړ ډلې اټکل دا دی چې شاوخوا ۱۰میلیونه غیرقانوني کډوال د امریکایي وګړو یا قانوني مقیمینو سره یوځای ژوند کوي، چې دا جریمه به ډېرې بېوزلي کورنۍ تر فشار لاندې راولي.
د بایډن د دورې یوه لوړپوړي چارواکي سکاټ شوچارت ویلي چې دا اقدامات د قانون د پلي کولو لپاره نه، بلکې د وېرې خپرولو لپاره دي.
دسي بي پي یو یادښت چې رویټرز لیدلی، ښيي چې دا اداره د دا ډول جریمو د تطبیق تخنیکي امکانات نه لري او د سیستمونو نوي کول به خورا لګښت ولري.