د لیتوانیا دفاع وزیرې دوویلې ساکالیینه رویټرز ته وویل چې اروپا باید د دفاعي لګښتونو د پور اخیستلو محدودیتونه لرې کړي، که نه نو له روسیې سره د جګړې له خطر سره به مخ شي.
هغې وویل، « اوس دفاع یوه حیاتي مساله ده، دا له جوړښتي اصلاحاتو مهمه ده. که خپلو سرتېرو ته کافي مهمات نه شئ برابرولای، نو نورې خبرې هېڅ ارزښت نه لري».
ساکالیینه ټینګار وکړ، « موږ فرصت لرو چې خپل خلک د روسي بمونو او مرمیو له وېروونکو وژنو وژغورو، خو باید همدا اوس خپلو دفاعي وړتیاوو ته بودجه ورکړو».
لیتوانیا، چې د ناټو او اروپايي اتحادیې غړی دی، د راتلونکي کال لپاره د خپل ناخالص کورني تولید ۵،۵ سلنه په دفاع لګوي، چې دا کال یې کچه ۳،۹سلنه ده.
د اروپايي اتحادیې د مالیې وزیرانو په دې وروستیو کې د ګډ دفاعي صندوق د جوړېدو پر طرح بحث وکړ، چې د ګډو وسلو پیرودل ممکن کړي.
دا بحثونه له دې امله کېږي چې اروپايي هېوادونه نور نشي کولای یوازې پر امریکا تکیه وکړي.
د روسیې دفاع وزیر پخوا ویلي و چې روسیه باید د راتلونکې لسیزې لپاره له ناټو سره مستقیمې جګړې ته چمتو شي.
ساکالیینه وویل اروپايي اتحادیه باید د دفاع لپاره د پور اخیستلو ټول محدودیتونه لرې کړي او غړو هېوادونو ته باید بې له سود پورونه نه، بلکې بېواپسۍ مرستې ورکړي.
هغې د امریکا د ولسمشر ډونالډ ټرمپ خبرې توجیه کړې، چې ګواکي که متحدین د خپلې دفاع لګښت نه کوي، نو امریکا به یې دفاع ونه کړي.
خو هغې زیاته کړه چې لیتوانیا، استونیا، لاتویا او پولنډ لا هم د امریکا ملاتړ لري، ځکه دوی د خپلې دفاع لپاره کافي لګښت او له امریکا سره نږدې کار کوي.
