د پښتونخوا پولیس: لکي مروت ولسوالۍ کې یې د بریدنو پرمهال ۲ وسلوال ووژل
د پښتونخوا د پولیسو لهخوا په خپره شوې خبرپاڼه کې راغلي، چې د شنبې په غرمه یې د لکي مروت په ولسوالۍ کې د جګړې پر مهال دوه وسلوال وژلي دي. پولیس زیاتوي، چې د وسلوالو دوه بریدونه یې شنډ کړي دي او ځینې وسلې یې هم نیولي دي.
د پښتونخوا د پولیسو په خپره شوې خبرپاڼه کې ویل شوي، چې د پولیسو او وسلوالو ترمنځ له سختې جګړې وروسته دوه وسلوال وژل شوي دي.
پولیس زیاتوي، چې له وسلوالو څخه یې نوې پرمختللې وسلې هم ترلاسه کړې دي.
تر دې دمه تحریک طالبان پاکستان د یادو بریدونو په اړه کوم غبرګون نه دی ښودلی.
همداراز، د پاکستان د پوځ رسنیز دفتر ویلي، چې تازه یې د پښتونخوا په باجوړ ولسوالۍ او شمالي وزیرستان کې په بېلابېلو استخباراتي عملیاتو کې پنځه وسلوال وژلي دي.
د راپور له مخې، په مومند ولسوالۍ کې بیا دوه نور وسلوال تر جګړې وروسته ژوندي نیول شوي دي.