د جمعيت اسلامي ګوند يو مشر او د بلخ پخواني والي عطا محمد نور ويلي، چې د افغانستان لپاره د ملګرو ملتونو د استازولۍ (یوناما) هڅې چې غواړي طالبانو ته سياسي مشروعيت ورکړي، نه يوازې د اندېښنې وړ دي، بلکې دا د افغان ولس سره خيانت او د نړيوالو ادارو پر بېطرفۍ داغ دی.
نوموړي زياته کړې: «هر ډول هڅه چې له طالبانو سره د نړيوالو اړيکو عاديکولو په هدف وي، دا د خلکو له ارادې تېرېدل او نړیوالو ادارو ته د شرم وړ ده».
په یوه اعلامیه کې چې د جمعيت اسلامي ګوند له خوا خپره شوې، ټينګار شوی چې یوناما او ځینې اړوندې ادارې د «مماشات» سیاست غوره کړی، له خلکو سره د روانو کړاوونو پر وړاندې بېپروا پاتې شوې او د طالبانو د تحميلي نظام لپاره ښکاره لابي کوي.
عطا محمد نور همدارنګه ويلي چې طالبانو له ښځو د تعليم او کار حق اخیستی، سياسي مشارکت نشته او خلک به د نړيوالو «انتخابي چوپتيا او دوهګوني چلندونه» هېڅکله هېر نه کړي.
نوموړي له نړیوالو دموکراتيکو بنسټونو او نړيوالې ټولنې غوښتي، چې طالبانو ته پر مشروعیت ور کولو تمرکز ونه کړي، بلکې د خلکو پر محور د عادلانه حللارو لټه وکړي.
دا څرګندونې داسې مهال کېږي، چې رپوټونه خپاره شوي چې ملګرو ملتونو د افغانستان لپاره يوه سياسي طرح تر کار لاندې نیولې، چې ښايي د طالبانو استازی سهیل شاهین د افغانستان دایمي استازي په توګه ومنل شي.
