طالبان وايي په دوحه کې د کینیا له سفیر سره د ظاهر قدیر قضیه تعقیبوي

د طالبانو د ریاست الوزرا اقتصادي معاونیت نن یکشنبه، د غويي ۲۱مه، پر اېکس ولیکل، چې ملا عبدالغني برادر په خپل کاري دفتر کې د افغان انوېسټ خصوصي شرکت له مسوولینو سره کتلي او د شبرغان – الوان دښتې ۵۰۰ کیلو ولټه مزي غځولو پروژې، د دښت الوان سب‌سټېشن د پراختیايي چارو او همداراز د غور ولایت د تولک ولسوالۍ د سرب او جستو کان د کاري پرمختګونو په اړه یې رپوټونه اورېدلي.

د شرکت مسووولینو ویلي چې د شبرغان – الوان دښتې ۵۰۰ کیلو ولټ مزي غځولو پروژې چارې په ښه ډول روانې دي چې اوسمهال یې ۸۵ سلنه کارونه پرمخ تللي او په ټاکلي وخت به بشپړ شي.

دوی زیاته کړې، چې د دښت الوان سب‌سټېشن تخنیکي مطالعات بشپړ شوي او په نږدې وخت کې به یې ساختماني چارې هم پيل شي.

په دې لیدنه کې ویل شوي، چې په هېواد کې دننه د غور تولک ولسوالۍ کان د پروسس په موخه د معیاري فابریکې ډیزاین هم پيل شوی، چې له بشپړېدو وروسته به د فابریکې د جوړولو چارې پيل کړي.

طالبان وايي، د دغې لیدنې پر مهال د قراردادي شرکت مسوولینو په یوشمېر برخو کې خپلې ستونزې هم شریکې کړې چې د ملاعبدالغني برادر له لوري ورته د حل په موخه ډاډ ورکړل شوی.

د دغې ډلې د ځمکو د غصب مخنيوي او د بېرته راګرځولو کمېسیون د خپلو دوه نیمو کلونو فعالیتونو په اړه د یوې خبرې ناستي پرمهال ویلي، چې د طالبانو مشر ملا هبت الله د غصب شویو ځمکو د راګرځولو لپاره د نوي وزارت جوړولو فرمان صادر کړی دی.

د طالبانو د ځمکو د غصب مخنېوي او د بېرته راګرځولو کمېسیون سکرتر احسان الله وثیق وايي، دغه کمېسیون به ډیر ژر د «اراضۍ چارو او اماراتي غصب شویو ځمکو د استرداد» په وزارت بدل شي.

وثیق وايي:«که څه هم د غصب شویو ځمکو د استرداد او اراضۍ لپاره د نوي وزارت فرمان د اسلامي امارت د رهبرۍ له خوا صادر شوی، خو د دغه وزارت تر رامنځته کېدو پورې، کمېسیون د پخوا په څېر او په جدي ډول خپل فعالت ته دوام ورکوي.»

نوموړی وايي، نوی جوړیدونکی وزارت به د یاد کمېسیون د تېرو چارو په پرتله ډیر پیاوړی وي.

د طالبانو د ځمکو د غصب مخنېوي او د بېرته راګرځولو کمېسیون وايي، چې د طالبانو د واکمنۍ له پیل راهیسې یې نږدې پنځوس مېلییونه جریبه ځمکه دولتې ثابته کړې او ۳.۹ مېلیونه جریبه غصب شوې ځمکه له غاصبینو بېرته راګرځول شوې ده.

د طالبانو د کورنیو چارو وزارت ویاند عبدالمتین قانع نن یکشنبه، د غويي ۲۱ مه، وویل، چې ددې ډلې د کورنیو چارو وزیر سراج الدین حقاني په کابل کې د چین له ځانګړي استازي یوی شیایونگ او د پاکستان ځانګړي استازي محمد صادق او ورسره مل پلاويو سره وکتل.

دا لیدنه د افغانستان، چین او پاکستان د بهرنیو چارو وزیرانو د ډیالوګ د پنځمې ناستې د موضوعاتو د تعقیب، راتلونکې شپږمې ناستې، د افغانستان د ګاونډیو هېوادونو د بهرنیو چارو وزیرانو د پنځمې غونډې او د درې واړو هېوادونو تر منځ د سیاسي او اقتصادي همکاریو د پراخولو په موخه ترسره شوې ده.

په خپره شوې خبرپاڼه کې راغلي، چې د طالبانو د کورنیو چارو وزیر سراج الدین حقاني د سیمې هېوادونو تر منځ د اړیکو پر پراختیا ټینګار کړی.

هغه ویلي چې ددې ډلې له نظره، د اقتصادي او سیاسي اړیکو پراختیا او سیمه‌ییز تفاهم د متقابل درناوي او تعامل له لارې تر لاسه کېدای شي.

د طالبانو د کورنیو چارو وزارت خپرپاڼه کې لیکل شوي، چې د چین او پاکستان ځانګړو استازو له افغانستان سره د ښه ګاونډیتوب او پر متقابل تعامل ولاړو اړیکو د لا پیاوړتیا ژمنه تازه کړې ده.

په دې ناسته کې ویل شوي، چې د درې واړو هېوادونو د بهرنیو چارو وزیرانو د ډیالوګ شپږمه ناسته به د یاد میکانیزم د تسلسل په توګه، په کابل کې ترسره شي.

د ځینو معلوماتو له مخې چین غواړي چې د طالبانو او پاکستان ترمنځ د منځګړیتوب رول ادا کړي او ترمنځ خړې پړې اړیکې یې ورغوي.

پاکستان له طالبانو غواړی چې په خپله کې خاوره کې د پاکستان مخالفو ډلو ته ځای ورنه کړي او د ټي ټي پي په لیکو کې د افغان طالبانو د حضور مخنوی وکړي، خو طالبانو تل د پاکستان دا ادعاوې رد کړې او پر پاکستاني پوځ تور لګوي، چې داعش خراسان ته یې پټنځایونه ور کړي دي.

د طالبانو د بهرنیو چارو وزارت د یکشنبې په ورځ وویل، چې د دغه وزارت د دېپلوماسۍ انسټیټیوت څخه یې ۱۷۱ طالبان له درې میاشتنیو سیاسي او ډېپلوماټیکو زده کړو وروسته فارغ کړي دي.

د طالبانو د بهرنیو چارو وزارت یاد انسټیټیوټ وړاندې هم ۶۲۶ تنه طالبانو ته سیاسي او دېپلوماټیکې زده کړې ورکړې دي.

د طالبانو د بهرنیو چارو وزیر امیرخان متقي له سیاسي او ډېپلوماټیکو لنډمهاله زده کړو د طالبانو د فراغت په مراسمو کې ویلي چې افغانستان په هره برخه کې مسلکي اشخاصو ته اړتیا لري.

متقي د خپلو خبرو پرمهال زیاته کړې، «موږ که په علمي ډګر کې قدمونه وانخلو، ځان پوه نه کړو، پر ځان خواري تېره نه کړو، د دنیا په حالاتو خبر نه شو، د وطن له نزاکتونو خبر ونه اوسو، له خپل تېر تاریخ نه خبر نه شو، بیا خپل راتلونکی هم نه شو جوړولای».

نوموړی وایي، « د هر پند لپاره رجال شته او دا ټولنه ورته ضرورت لري».

نوموړی په داسې حال کې مسلکي کسانو ته د اړتیا په تړاو دا څرګندونې کوي، چې پر افغانستان د یادې ډلې له واکمنېدو وروسته د افغانستان سلګونه کادرونه او مسلکي کسان له دندو ګوښه او پر ځای یې دغې ډلې خپل کسان په دندو ګومارلي دي.

سرچینې افغانستان انټرنشنل ته وايي، د شطرنج ملي لوبډلې لوبغاړي د بدني روزنې ریاست ته ورغلي وو؛ څو د فعالیت اجازه او میاشتني معاش ترلاسه کړي، خو ورته ویل شوي چې دغه لوبه «حرامه» اعلان شوې.

د سرچینو په وینا؛ د بدني روزنې چارواکو ویلي چې د طالبانو د امر بالمعروف او شکایتونو اورېدو وزارت شطرنج حرام اعلان کړی او له همدې امله یې د اړونده فدراسیون فعالیتونه بند کړي دي.

د شطرنج فدراسیون د طالبانو د اوسنۍ بیا ځل واکمنۍ ترمخه د نارینه‌و او ښځو لپاره فعال و او په هېواد کې‌ یې په منظم ډول سیالۍ جوړولې.

د ۱۴۰۳هجري لمریز کال د لړم په میاشت کې دغه فدراسیون چې نه یې رییس لاره او نه سرپرست؛ په نارسمي ډول وځنډول شو.

لامل یې دا ښوول شوی، چې د دغه فدراسیون پخوانی مشر غلام علي ملک‌زاده چې د نړۍوال شطرنج فدراسیون (FIDE) له‌خوا په رسمیت پېژندل کېده جرمني ته کډوال شوی او دندې ته نه حاضرېده.

تر دې څه موده وروسته د طالبانو د ورزش ادارې عبیدالله قریشي د شطرنج فدراسیون د سرپرست په توګه وټاکه؛ خو نوموړی د طالبانو د هغه وخت د بدني روزنې له مشر نظرمحمد مطمین سره د اختلاف له امله خپل کار پرېښی و.

د طالبانو د ورزش ادارې تر دې وړاندې هم د ازادو سیالیو یا «MMA» پر لوبو بندیز لګولی و.