طالبان: د خسرګنۍ له لوري پلار کره د ښځې نه پرېښودل د «شریعت» خلاف کړنه ده

د طالبانو تر واک لاندې باختر خبري اژانس د شنبې په ورځ (د غويي ۲۰مه) په هرات کې د فلسطین لپاره د مرستو د راټولو د مسوول له قوله ویلي، چې دغه مرسته یې په ۳۴ پړاونو کې راټوله کړې.

امیرمحمد خادم ویلي، چې په وروستي پړاو کې یې ۵ زره ډالره مرسته راټوله کړې.

هغه زیاته کړې، چې د غزې خلکو سره د افغانستان د لوېديځو ولایتونو څخه ۱۲ زره ډالره مرسته هم شوې.

نوموړي ويلي: «له فلسطینیانو سره درېدل د مسلمانانو لپاره یو مذهبي او بشري مسوولیت دی.»

طالبانو تر دې وړاندي هم په یو شمېر نورو ولایتونو کې د غزې د خلکو سره د مرستې ټولو کمپيانونه تر سره کړي وه.

اسراییل د مارچ په ۲مه د اوربند پر مهال غزې ته د هر ډول مرستو په داخلېدو بندیز ولګاوه، چې تر اوسه لا هم دوام لري.

د ملګرو ملتونو بېلابېلې مرستندویه ادارې وايي، چې اسراییل غزې ته د بشري مرستو د رسولو مخه نیولې او دا مرستې یې د فشار وسیله ګرځولي دي.

اسراییلي چارواکو د یوه پلان له مخې مرستندویو ادارو ته ویلي، چې یوازې د غزې په سوېل کې یو څو مرکزونه جوړ کړي او هغوی ته اجازه نه ورکول کېږي چې مرستې د غزې ټولو سیمو ته ورسوي.
د ماشونو د ملاتړ ادارې ویاند وايي، که د اسراییل دا پلان عملي شي، تر ټولو ډېر به ماشومان، زاړه کسان، ناروغان او ټپیانو له سختو ستونزو سره مخ شي.

په ورته وخت کې، د ملګرو ملتونو د بشري چارو دفتر (اوچا) ویلي، چې د اپرېل میاشتې راهیسې څه باندې ۸۰ هغه ځایونه د توکو د کمښت له امله بند شوي، چې په غزه کې یې خلکو ته خواړه چمتو کول.

د طالبانو ویاند ذبیح الله مجاهد د شنبې په ورځ (د غويي ۲۰مه) په یوې اعلامیه کې ویلي، چې د د دوی مشر هبت الله د استخباراتو له مسولینو او کارکوونکو سره په یو ورځني سيمنار کې برخه اخیستې.

په اعلامیه کې ویل شوي، چې هبت الله د اسختباراتو څخه د نظام په وړاندي د تخریب کوونکو د مخنيوي غوښتنه کړې.

هغه زياته کړې: «استخبارات مکلف دی، چې ټول ښکاره او پټ فکري او تخریبي پلانونه شنډ کړي چې د اسلامي نظام دوښمنان یې پلانوي او غواړي چې داسلامي نظام په خلاف یې عملي کړي.»

نوموړي غوښتنه کړې، چې د «ديني شعایرو او سپکاوي او توهین کوونکو» مخه دې هم ونیول شي.

هبت الله ټينګار کړی، چې استخبارات دې د نورو ادارو سره په ګډه په ټولنه کې شریعت تطبیق او د خلکو ذهنونه جوړ کړي.

د طالبانو له‌خوا د «شریعت» تر نامه لاندې د بشري حقونو سرغړونې یو له هغو موضوعاتو څخه دی، چې نړۍواله ټولنه یې په دوامداره توګه اندېښمنه ساتلې ده.

سره له دې چې طالبان خپل زیات شمېر اقدامات د اسلامي شریعت د پلي کېدو په نوم توجیه کوي، خو د بشري حقونو نړۍوال معیارونه او اسلامي اصول بیا دواړه د طالبانو ډېری کړنې د بشري سرغړونو په توګه ګڼي.

واک ته د طالبانو له رسېدو را وروسته دغه ډله په پرله پسې ډول په ټولنه کې د شریعت په نوم بېلابېل بندیزونه تطبیق کوي، چې په کور دننه او بهر له پراخو نیوکو سره مخ شوي هم دي.

د پښتونخوا صوبي د کورنیو او قبایلي چارو اداره وايي، د شنبې په ورځ یې د تورخم له لارې د د ښځو او ماشومانو په کډون د افغان سټیزن کارټ لرونکي او ناقانونه ۷۳۰ افغان کډوال بېرته افغانستان ته ستانه کړل.

همدا راز د کډوالو ستونزو ته د طالبانو د رسېدنې عالي کمېسیون ویلي، چې تېره ورځ هم د تورخم، سپین بولدک، بهرامچې، اسلام کلا او ورېښمو پله له لارې ۳۹۱۰ افغان کډوال هېواد ته راستانه شوي دي.

دا په داسې حال کې ده، چې د سره صلیب نړۍوالې کمېټې خپل وروستې راپور کې ویلي، چې یوازې د اپریل میاشت کې، شاوخوا ۱۴۵،۰۰۰ افغان کډوال له پاکستان څخه اېستل شوي، چې د فېبرورۍ پرتله اته برابره زیات دي.

دغه کمېټ‍ې له پاکستان او ایران څخه د ډیریو راستنېدونکو کډوالو وضعیت د اندېښنې وړ بللی دی.

د طالبانو د ریاست الوزرا اقتصادي معاونیت د پنجشنبې په ورځ (د غویی ۲۰مه) د یوې خبرپاڼې په خپرولو سره پر اېکسپاڼه د ملابرادر له قوله لیکلي، چې طالبانو قراردادي شرکت ته د پروژې د چارو پر‌مخ بیولو لپاره لازمې اسنتیاوې برابرې کړې دي.

ملا برادر له قراردادي شرکت څخه غوښتي چې ژر تر ژره دې د یادې پروژې ساختماني چارې پیل او هغه ستونزې دې هوارې کړي چې د پروژې په کارونو کې د ځنډ لامل ګرځي.

طالبانو په خبرپاڼه کې لیکلي، چې د ام‌سي‌سي شرکت عمومي رییس وانګ جي چینګ د مس عنیک پروژې په پرمخ بیولو کې د طالبانو همکاري ستایلې ده.

د طالبانو د کانونو او پټرولیم وزارت ددې ډلې په روانه واکمنۍ کې د مس عینک کان د پروژې رسمي پرانېستنه وکړه.
د پروژي تړون په ۲۰۰۸ میلادي کال کې د حامد کرزي حکومت کې د اېم سي سي په نوم د یوې چنايي کمپنۍ سره د ۳۰ کلونو لپاره لاسلیک شوی و، خو د امنیتي ستونزو او په سیمه کې د لرغونو اثارو د اوږدې کیندنې له امله یې د کان کیندنه وځنډېده.

د طالبانو د کانونو او پټرولیم وزارت د معلوماتو له مخې؛ دغه کان ۱۱ میلیونه ټُنه مس لري او په نړۍ کې د مسو دویم ستر کان بلل کېږي.

د طالبانو د بهرنیو چارو وزارت د شنبې په ورځ د یوې اعلامیې په خپرولو سره ویلي، چې د دغه ډلې د بهرنیو چارو وزیر امیرخان متقي، په کابل کې د چین ځانګړي استازي شیایونګ او د افغانستان لپاره د پاکستان ځانګړي استازي محمد صادق سره په ننۍ ناسته کې د افغانستان ـ چین ـ پاکستان د بهرنیو چارو وزیرانو د ډیالوګ د پنځمې ناستې د موضوعاتو د تعقیب او د راتلونکي شپږمې ناستې او د افغانستان د ګاونډیو هېوادونو د بهرنیو چارو وزیرانو د راتلونکې پنځمې غونډې، سیاسي او اقتصادي همکاریو په اړه خبري وکړي.

اعلامیه زیاتوي، چې د طالبانو د بهرنیو چارو وزیر، د پاکستان او چین ځانګړو استازو هوکړه کړې، چې د درې واړو هېوادونو د بهرنو چارو وزیرانو راتلونکې ناسته به د کابل په کوربه‌توب ترسره شي، خو د یادې ناستې د ترسره کېدو په اړه دقیقه نېټه نه ده په ډاګه کړې.

متقي له چین او پاکستان سره د افغانستان سیاسي او اقتصادي اړیکې مهمې بللي او د نورو پرمختګونو هیله یې ښودلې ده.