د طالبانو ویاند ذبیح الله مجاهد وايي، چې هبت الله اخوندزاده له استخباراتيمسولینو سره په لیدنه کې له دوی څخه غوښتي، څو «د اسلامي نظام په وړاندې دې پټ فکرياو تخريبي پلانونه شنډ کړي.» د طالبانو مشر د بندیانو سره پر سم چلند او په شریعت د استقامت سپارښتنې هم کړي.
د طالبانو ویاند ذبیح الله مجاهد د شنبې په ورځ (د غويي ۲۰مه) په یوې اعلامیه کې ویلي، چې د د دوی مشر هبت الله د استخباراتو له مسولینو او کارکوونکو سره په یو ورځني سيمنار کې برخه اخیستې.
په اعلامیه کې ویل شوي، چې هبت الله د اسختباراتو څخه د نظام په وړاندي د تخریب کوونکو د مخنيوي غوښتنه کړې.
هغه زياته کړې: «استخبارات مکلف دی، چې ټول ښکاره او پټ فکري او تخریبي پلانونه شنډ کړي چې د اسلامي نظام دوښمنان یې پلانوي او غواړي چې داسلامي نظام په خلاف یې عملي کړي.»
نوموړي غوښتنه کړې، چې د «ديني شعایرو او سپکاوي او توهین کوونکو» مخه دې هم ونیول شي.
هبت الله ټينګار کړی، چې استخبارات دې د نورو ادارو سره په ګډه په ټولنه کې شریعت تطبیق او د خلکو ذهنونه جوړ کړي.
د طالبانو لهخوا د «شریعت» تر نامه لاندې د بشري حقونو سرغړونې یو له هغو موضوعاتو څخه دی، چې نړۍواله ټولنه یې په دوامداره توګه اندېښمنه ساتلې ده.
سره له دې چې طالبان خپل زیات شمېر اقدامات د اسلامي شریعت د پلي کېدو په نوم توجیه کوي، خو د بشري حقونو نړۍوال معیارونه او اسلامي اصول بیا دواړه د طالبانو ډېری کړنې د بشري سرغړونو په توګه ګڼي.
واک ته د طالبانو له رسېدو را وروسته دغه ډله په پرله پسې ډول په ټولنه کې د شریعت په نوم بېلابېل بندیزونه تطبیق کوي، چې په کور دننه او بهر له پراخو نیوکو سره مخ شوي هم دي.
د طالبانو د بهرنیو چارو وزارت د شنبې په ورځ د یوې اعلامیې په خپرولو سره ویلي، چې د دغه ډلې د بهرنیو چارو وزیر امیرخان متقي، په کابل کې د چین ځانګړي استازي شیایونګ او د افغانستان لپاره د پاکستان ځانګړي استازي محمد صادق سره په ننۍ ناسته کې د افغانستان ـ چین ـ پاکستان د بهرنیو چارو وزیرانو د ډیالوګ د پنځمې ناستې د موضوعاتو د تعقیب او د راتلونکي شپږمې ناستې او د افغانستان د ګاونډیو هېوادونو د بهرنیو چارو وزیرانو د راتلونکې پنځمې غونډې، سیاسي او اقتصادي همکاریو په اړه خبري وکړي.
اعلامیه زیاتوي، چې د طالبانو د بهرنیو چارو وزیر، د پاکستان او چین ځانګړو استازو هوکړه کړې، چې د درې واړو هېوادونو د بهرنو چارو وزیرانو راتلونکې ناسته به د کابل په کوربهتوب ترسره شي، خو د یادې ناستې د ترسره کېدو په اړه دقیقه نېټه نه ده په ډاګه کړې.
متقي له چین او پاکستان سره د افغانستان سیاسي او اقتصادي اړیکې مهمې بللي او د نورو پرمختګونو هیله یې ښودلې ده.