د هند کرېکټ بورډ: د ای پي اېل سیالۍ د مې په ۱۷مه بېرته پیلېږي
د پاکستان او هند ترمنځ له اوربند وروسته د هند کرېکټ بورډ د کرېکټ تجارتي سیالیو ای پي اېل د بیا پیل اعلان وکړ.
د پاکستان او هند ترمنځ له اوربند وروسته د هند کرېکټ بورډ د کرېکټ تجارتي سیالیو ای پي اېل د بیا پیل اعلان وکړ.
دا په داسې حال کې ده، چې تېره اوونۍ د پاکستان او هند ترمنځ د تاوتریخوالي له امله د ای پي اېل سیالۍ ځنډول شوې وې.
تر دې یوه ورځ مخکې هم په دهرمشاله کې د ای پي اېل یوه لوبه درول شوې وه او د لوبغالي څراغونه بند شوي وو.
د هندي کرېکټ بورډ (BCCI) په وینا، پاتې لوبې به د مې له ۱۷مې د جون تر ۳مې په شپږو ښارونو کې ترسره شي.
د هند کرېکټ بورډ د معلوماتو له مخې، د مې پر ۱۷مه به د رایل چیلنجرز بنګلور او کولکتې نایټ رایډرز ترمنځ لوبه ترسره شي.
افغانستان انټرنشنل ته رسېدلو معلوماتو کې په ډاګه شوې، چې د طالبانو د بدني روزنې ادارې تازه د افغانستان د شطرنج فدراسیون فعالیتونه ځنډولي او دغه لوبه یې «حرامه» بللې ده.
سرچینې افغانستان انټرنشنل ته وايي، د شطرنج ملي لوبډلې لوبغاړي د بدني روزنې ریاست ته ورغلي وو؛ څو د فعالیت اجازه او میاشتني معاش ترلاسه کړي، خو ورته ویل شوي چې دغه لوبه «حرامه» اعلان شوې.
د سرچینو په وینا؛ د بدني روزنې چارواکو ویلي چې د طالبانو د امر بالمعروف او شکایتونو اورېدو وزارت شطرنج حرام اعلان کړی او له همدې امله یې د اړونده فدراسیون فعالیتونه بند کړي دي.
د شطرنج فدراسیون د طالبانو د اوسنۍ بیا ځل واکمنۍ ترمخه د نارینهو او ښځو لپاره فعال و او په هېواد کې یې په منظم ډول سیالۍ جوړولې.
د ۱۴۰۳هجري لمریز کال د لړم په میاشت کې دغه فدراسیون چې نه یې رییس لاره او نه سرپرست؛ په نارسمي ډول وځنډول شو.
لامل یې دا ښوول شوی، چې د دغه فدراسیون پخوانی مشر غلام علي ملکزاده چې د نړۍوال شطرنج فدراسیون (FIDE) لهخوا په رسمیت پېژندل کېده جرمني ته کډوال شوی او دندې ته نه حاضرېده.
تر دې څه موده وروسته د طالبانو د ورزش ادارې عبیدالله قریشي د شطرنج فدراسیون د سرپرست په توګه وټاکه؛ خو نوموړی د طالبانو د هغه وخت د بدني روزنې له مشر نظرمحمد مطمین سره د اختلاف له امله خپل کار پرېښی و.
د طالبانو د ورزش ادارې تر دې وړاندې هم د ازادو سیالیو یا «MMA» پر لوبو بندیز لګولی و.
نیویارک ټاېمز راپور ورکړی، چې د فوټبال نړۍوال فدراسیون (فیفا) د جلاوطنه افغان ښځینه لوبغاړو پخوانۍ ملي لوبډله په جلاوطنۍ کې په رسمیت پېژندلې ده.
د یادې ورځپاڼې د راپور له مخې، دغه لوبډله د فیفا تر څار لاندې په رسمي دوستانه سیالیو او نړۍوالو تورنمنټونو کې ګډون کولای شي.
فیفا ویلي، چې دغه جلاوطنه ښځینه لوبډله به د یوه کال لپاره د ازمایښتي پروژې په توګه فعاله وي؛ څو په راتلونکې کې د نورو کډوالو لهخوا د ورته لوبډلو د جوړېدو زمینه برابره شي.
فیفا ویلي، دغه اداره به د جلاوطنه افغان ښځینه لوبغاړو او اړوندو بنسټونو په همکارۍ ډېر ژر د دغې نوې لوبډلې جوړښت، تنظیم او فعالیتونو پیل کړي.
له دې سره به د طالبانو د سختو بندیزونو څخه جلاوطنه شوې افغان لوبغاړې یو ځل بیا د سیالیو ډګر کې راڅرګندې شي.
طالبانو نه یوازې په فوټبال؛ بلکې د ښځو پر هر ډول ورزشونو په هېواد کې سخت بندیزونه لګولي، چې له همدې کبله ډېری افغان ورزشکارانې جلاوطنۍ ته اړې شوې دي.
د فیفا مشر جیاني اینفانتینو ویلي:« دا یو تاریخي نوښت دی. فیفا ژمنه لري، چې هره نجلۍ د نړۍ په هر ګوټ کې ان افغان نجونې هم باید وکولای شي فوټبال وکړي.»
که څه هم د طالبانو تر واک لاندې د افغانستان فوټبال فدراسیون تر اوسه په دې اړه څه نه دي ویلي؛ خو راپورونه ښيي چې دغه نوښت له یاد فدراسیون څخه دباندې ترسره کېږي.
د دغې لوبډلې مالي او تخنیکي ملاتړ به د فیفا د پرمختیايي څانګې لهخوا ورکول کېږي.
تر دې دمخه د ښځینه کرېکټ ملي لوبډلې یو شمېر غړې هم په اسټرالیا کې سره راټولې شوې وې او جلاوطنه لوبډله یې اعلان کړه.
د کرېکټ نړۍوالې شورا له لوري یاده لوبډله په رسمیت وپېژندل شوه او خپله یوه سیالي یې هم ترسره کړه.
د احمدشاه ابدالي فرسټ کلاس (ټېسټ) اتم پړاو درېیمه لوبه نن۱۰:۰۰ بجې د میوند اتلان او ماهیپر ستوري لوبډلو ترمنځ د ننګرهار په نجیب تره کي لوبغالي کې پیلېږي.
همدا ډول څلورمه سیالي نن ۱۰:۰۰ بجې د پامیر لیجنډز او هندوکش سټرایکرز لوبډلو تر منځ د ننګرهار په غازي امان الله خان لوبغالي کې پیلېږي.
یاده دې وي، چې تېره ورځ د پامیر لېجنډز او میوند اتلان لوبه بې پایلې پای ته ورسېده.
د کرېکټ بورډ د معلوماتو له مخې، د احمدشاه ابدالي فرسټ کلاس څلور ورځنۍ لوبې چې د څلورو پیاوړو لوبډلو تر منځ د ملي، ملي الف، ملي نولس کلنو او د کورني کرکټ د لوبغاړو په شتون کې پیل شوي، دویمه لوبه یې د پامیر لېجنډز او میوند اتلان لوبډلو تر منځ پرته له کومې پایلې پای ته ورسېده.
دغه سیالۍ د ننګرهار په نجیب تره کي لوبغالي کې پیل شوې وه، چې د لوبې پر وروستۍ څلورمه ورځ پرته له کومې پایلې ختمه شوه.
د افغانستان کرېکټ ملي لوبډلې د لومړي ځل لپاره د کرېکټ نړۍوالې شورا (ای سي سي) د یو ورځنیو سیالیو تازه درجه بندۍ کې اووم مقام ترلاسه کړی.
تر دې وړاندې افغان کرېکت لوبډله په اتم کې مقام کې و، خو ورستیو پرله پسې بریاوو د کرېکټ نړۍوالې شورا درجه بندۍ بدلې کړې او افغان لوبډله له اتم نمبر څخه اووم مقام ته پورته شوه.
په نړۍوالو یو ورځنیو سیالیو کې د تېرو څو کلونو راهیسې افغان ملي لوبډلې غوره کارکردګي کړې.
کرېکټ بورډ په خپلې فېسبوک پاڼې لیکلي: «په دې جمله کې د ۲۰۲۳ کال یو ورځنیو سیالیو نړۍوال جام کې د افغان لوبډلې غوره کارکردګي، دغه راز ۲۰۲۴ کال کې په پرلپسې ډول د یو شمېر یو ورځنیو سیالیو لوبلړۍ ګټل او اتلانو جام کې غوره کارکردګي هغه څه دي چې افغان ملي لوبډله یې د بریا نویو لوړو ته ورسوله.»
د افغانستان د کرېکټ ملي لوبډلې په اړه په نړۍواله کچه نظر دا و، چې دا لوبډله تر ډېره شل اوریزه سیالیو کې پرمختللې ده ولې ورستیو بریاوو دا وښوده چې د نړۍ یو له غوره لوبډلو څخه ده.
یوازې څلور ورځنۍ (ټېسټ) سیالۍ دي چې افغان لوبډله پکې هغه ډول نه ده ځلېدلې، خو په دې وروستیو کې کرېکټ بورډ دغه سیالیو لپاره هم هڅې ګړندۍ کړي دي.
تاره په کور دننه د احمدشاه ابدالي فرسټ کلاس (څلور ورځنۍ) لوبې د ننګرهار په کوربتوب پیل شوي دي، په دغه لوبو کې څلور لوبډلې ګډون لري، چې د ملي، الف، نولس کلنو او د میرویس نیکه لوبو ځلېدونکي لوبغاړي پکې برخه لري.
واک ته د طالبانو له رسېدو سره سم دغې ډلې د ښځو د نورو ورزشونو تر څنګ د افغانستان د فوټبال ښځینه لوبغاړې هم له لوبو منعه کړې دي؛ خو اوس د دغه لوبډلې غړو په جلا وطنۍ کې فعالیتونه پیل کړي او د فوټبال له نړۍوالې شورا څخه د رسمیت پېژندنې غوښتنه کوي.
د نیویارک ټاېمز ورځپاڼې د راپور له مخې، فاطمه فولادي چې په ۲۰۲۱ کال کې د افغانستان د ۱۷ کلنو ملي لوبډلې لپاره یې د تاجکستان پر وړاندې ګول وهلی و؛ تر هغې سیالۍ یوازې دوه میاشتې وروسته اړه شوه، چې له هېواده ووځي.
هغه د کابل هوایي ډګر له لارې د تخلیې پر مهال امریکا ته تللې ده.
د ۲۰۲۱ کال په اګسټ میاشت کې د ښځو د ملي لوبډلې له ۷۵ څخه زیاتو غړو، لوبغاړو، روزونکو او کورنیو یې د FIFPro یا د نړۍوالو لوبغاړو ټولنې په مرسته اسټرالیا او یو شمېر نورو اروپایي هېوادونو ته پناه یووړه.
اوسمهال په افغانستان کې ښځینه ورزشونه بشپړ بند دي او د طالبانو تر واک لاندې فوټبال فدراسیون د ښځو لوبډلې په رسمیت نه پېژني.
د فیفا له مقرراتو سره سم، هره رسمي لوبډله باید د خپل هېواد د رسمي فدراسیون لهخوا تایید شي.
د طالبانو د بیا ځلي واک راپه دېخوا د افغانستان د ښځو لوبډلې کومه رسمي لوبه نه ده ترسره کړې او له نړۍوالو رده بندیو هم لرې پاتې شوې ده.
نیلاب محمدي چې مخکې د ملي ټیم بریدګره او کپتانه وه؛ اوس د اسټرالیا په ملبورن ښار کې د Sky United لوبډلې لپاره لوبه کوي.
هغې له افغانستانه د وتلو وروسته د استرالیا د ښځو د اووم لیګ په AWT کې بیا له سره لوبې پیل کړې. نیلاب وايي، د افغانستان لوبډله د بریا او هیلو نښه ده.
خالده پوپل، چې د افغانستان د ښځو د ملي فوټبال ټیم بنسټ اېښودونکې او د فوټبال فدراسیون لومړۍ ښځینه غړې وه؛ اوس په ډنمارک کې ژوند کوي.
سره له دې چې د امنیتي ګواښونو سره مخ ده، لا هم د افغان ښځو فوټبال ته کار کوي.
هغې ویلي، فوټبال د افغان ښځو د غږ انعکاس دی او دغه لوبغاړې له رواني ستونزو سره سره لا هم هوډمنې دي.
هغې د فوټبال له نړیوال فدراسیون څخه غوښتنه کړې، چې په غوره امنیتي چاپېریال کې دې د افغانستان ښځینه فوټبالرانو ته د سیالیو اسانتیاوې برابرې کړي.
فیفا د ۲۰۲۵ کال د مارچ میاشت کې د SRA یا د سپورتي حقونو د ټلوالې راپور په غبرګون کې ژمنه وکړه، چې له افغان ښځو او نجونو ملاتړ کوي او هغو لوبغاړو ته چې بهر مېشت دي، د لوبو زمینه برابروي؛ خو تر اوسه د افغانستان د ښځو د ملي لوبډلې رسمي پېژندنې په اړه پرېکړه نه ده شوې.
نیلاب محمدي وايي: «که فیفا موږ په رسمیت ونه پېژني، دا به لویه ماتې وي؛ خو موږ به تسلیم نه شو.»
دغې لوبډلې یو انلاین کمپاین هم پیل کړی، چې تر دې دمه یې له ۱۸۵ زرو زیاتو کسانو لاسلیک کړی.
دغه ستونزې یوازې فوټبال پورې محدودې نه دي پاتې؛ بلکې د کرېکټ نړۍوالې شورا (ICC) هم د افغانستان د ښځو د کرېکټ اړوند خورا محتاط چلند کړی دی.
د افغانستان د کرېکټ ښځینه لوبغاړې چې په اسټرالیا او ځینو نورو هېوادونو کې جلا وطنه دي، په دې وروستیو کې یې یو ځل بیا خپله لوبډله راټوله کړې او سیالۍ یې هم پیل کړې دي.