د کاناډا د بهرنیو چارو نوې وزیرې انیتا انند د چارشنبې په ورځ اسراییل تورن کړ چې په غزه کې د خوړو کموالی د فشار د وسیلې په توګه کاروي او ټینګار یې وکړ چې باید له حماس سره د اوربند لپاره هڅې دوام ومومي.
انند، چې نوی ماموریت یې د سې شنبې په ورځ پیل کړ، وویل، « موږ نه شو کولای چې خواړه د سیاسي فشار د وسیلې په توګه ومنو، تر ۵۰ زرو زیات فلسطینیان وژل شوي دي. دا ډول چلند د منلو نه دی».
هغې زیاته کړه چې کاناډا د دوهدولتي حل ملاتړ کوي او دغه دریځ ته دوام ورکوي.
اسراییل له مارچ میاشتې راهیسې غزه تړلې ده او د اوربند له ناکامېدو وروسته یې خپل نظامي عملیات بیا پیل کړي.
د فلسطیني چارواکو په وینا، تر اوسه له ۵۲،۹۰۰ زیات کسان وژل شوي او مرسته رسوونکې ادارې وایي، غزه د قحطۍ له ګواښ سره مخ ده.
اسراییل بیا دغه ادعاوې ردوي او وایي حماس مرستې غلا کوي او خلکو ته یې نه رسوي.
